BYAPHY 19 - Zotung Bible 2016

Vaawlang kya Lungtuanaw

¹ Tukoute vaawlang a umpaw ccungccaw zapi patae roi tahawpaw myarya accaepaw roi kha ka thae zah, “Hallelujah! Khumnaw, phu-enaw te thungnaw tuh ah Pachia kya-e nynh thua.

² Pawccecize a byapianaw tuh kyh zah ading; ohhuakunaw a raenaw te laephi a rosahpaw ohhuanung lepaw kha bya a pia vae; tuh-e nung kuih te luasah athuapaw Pachia ryalahtu hae chiise hanlan a tungvaw a liaru vae,” a ci hae.

³ Minmin nynh, “Hallelujah! A maeekhuh tuh zungzae te zungzae cia a kaethung,” bua a sia hae.

⁴ Piccan hae lu kuin lae pali te ahiinpaw sarangpaw hae sa pali nynh bakhung hae zah bawitungkhung vawlan a haungpaw Pachia kha beik hae zah, “Amen, Hallelujah!” a ci hae.

⁵ Bawitungkhung kyate roi yn ccae zah, “Pachia ryalahtu hae balyn te amaw raw a rih hae paw adih te ale balyn, ah Pachia kha thehoysah oh,” a ci.

⁶ Tukoute ccungccaw zapi patae roi, tuiphue hae patae roi, myarya athungpaw riakawpaw roi te alokuhpaw roi kha ka thae zah, tuh-e roi nynh, “Hallelujah! Pawccecize Athungpaw Bawipaw ah Pachia nynh a uk.

⁷ Ah lungtua sah lah, ah lungpaw sah; amaw kha phu-enaw pya oh sih; pawccecize Tuutaw zudy poi tuh yn thua vae, a liaccanung tuh a paccynkuh vae,” a ci.

⁸ Tuh-e nung tuh nebaleihpaw, athyaapaw te arawpaw boeining te ccaankunaw kaw a mue; pawccecize nebaleihpaw boeining tuh mithyaa hae kya-e adingpaw cyisahnaw nynh thua.

⁹ Vaawpaw nynh, “Tuutaw zudy poi zerya mangnaw kalan kobua athua hae paw tuh hythua a ccou hae paw nynh thua cite zei,” cite kae kha yn hopya. Aning nynh, “Hynh-e bya tuh Pachia bya ccaccing nynh thua,” yn cipya.

¹⁰ Kae tuh amaw kha beik lan cite a cculeihpaw khe ka bakhung; aning nynh, “Hynhte cyih nan! Kae tuh nang te ryalahkheihtu nynh ka thua, Jesu kya-e ccaekia a hoi hae paw na uno hae ryte ryalahkheihtu nynh ka thua, Pachia palia kha beik! Pawccecize Jesu kya-e ccaekia tuh profehbya honaw kya-e muisaw nynh thua,” cite yn hopya.

Marang Rawpaw Ccikuhpaw

¹¹ Vaawlang tuh hungkuh zah marang rawpaw sa kheit kha ka muih. Tuh-e marang tungvaw a ccikuhpaw tuh Alungzipaw, Ahmepaw cite ko athua; aning tuh dingnaw te byapia zah rhaw a tuk.

¹² A mit tuh maeesoi te lokuh zah, a lu vawlan bawilukhung hae a khungkuh; a tungvaw kyakhe amaw laelan hum nynh san a ny leipaw min azeikuhpaw a hoi.

¹³ Chii kya adungkuhpaw angkiccua kha kikuh zah, a min tuh Pachia Bya a cikuh.

¹⁴ Vaawlang e rhawkaw hae nynh arawpaw marang hae kha ccikute, raw zah athyaapaw nebaleihpaw boeining kha lawku biate amaw kha a zui hae.

¹⁵ Minphuin hae kha detah nawlan ahepaw thaloi tuh a khalang lungkhu te a pou. Aning nynh minmin kha sivaw hoitang te a uk cih hae; Athung huaccepaw Pachia thinrianaw te asekuhpaw bungpawnaw misu mianaw khu kha aning nynh a syde cih.

¹⁶ A angkiccua vawlan te a phae vawlan khe, “Siapharan hae Siapharan, bawi hae Bawipaw,” cite azeikuhpaw min kha a hoi.

Sarepaw te A Rhawkaw hae Shungnaw

¹⁷ Vaawpaw lu kheit nynh khuanin kya a thadynpaw kha ka muih, aning nynh vaawlang angaelung kya a zou hae paw pavaw hae balyn kha roi myarya accae lante ko hae zah, “Rang oh lah, alesaepaw Pachia kya-e loohdangkunaw kalan oun sueluakuh oh;

¹⁸ siapharan hae ngesaw, rhawbawi hae ngesaw, a thawsaepaw ccungccaw hae ngesaw, marang hae te marang a ccikuh hae paw ngesaw, a luepaw te see, adihpaw te alepaw ccungccaw hae balyn ngesaw kha na ae ccaw oh oun sueluakuh oh,” cite a sia.

¹⁹ Sarepaw te laephi siapharan hae te mih rhawkaw hae nynh marang tungvaw a ccikuhpaw te a rhawkaw hae kha rhawtuk khylan oun sueluaku hae paw kha ka muih.

²⁰ Sarepaw kha phe a kyng hae; sarepaw kya-e syntawnaw a hoi hae paw te sarepaw azuh a beik hae paw kha ling hae zah sarepaw malang muihsahnaw a langsakuhpaw lingthya profeh kha mah amaw ryte a kyngbua hae. Hynh-e lu ning hae hynh parouhte a hiin hae pite, kemaee te a ruanaw maee tuili lungkhu lang a vua hae.

²¹ Tuhlaepaw kha marang tungvaw a ccikuhpaw a khalang lungkhu te yn poupaw thaloi khate chia athua hae; te pavaw hae balyn nynh mih ngesaw kha phe byn lan a ae hae.