BYAPHY 15 - Zotung Bible 2016

Vaaw hae te Nyathyakou Shethya

¹ Alesaepaw te ngaeang lan umpaw ccangpaw muihsahnaw kha vaawlang khe ka muih, tuh-e tuh nyathyakou e shethya ccangsari a hoi hae paw vaaw hae lu sari nynh thua; pawccecize tuh-e shethya hae tuh Pachia thinrianaw a thangnaw nynh thua.

² Maee te apykuhpaw thawlang rili alopaw kha ka muih; sarepaw, sarepaw azuh, sarepaw kya-e syntawnaw te a min namba tungvaw taenaw a hoi hae paw nynh Pachia tintang hae kha ccyngkuh hae zah thawlang rili kin khe a thadyn hae paw kha ka muih.

³ Minmin nynh Pachia ryalahtu Moses hlaw te Tuutaw hlaw kha sah hae zah, “Athung huaccepaw Bawipaw Pachia, na ryalaw hae tuh lesae zah ngaeang lan a um! Minphuin hae Siapharan, na laanpi hae tuh ding zah ahme!

⁴ Pou Bawipaw, hummou na rawri leite, na min kha phu-esah leite a um cih? Pawccecize nang rou nynh athyaapaw na thua. Bya na piapaw balyn tuh a langku vae keiccuze minphuin hae balyn nynh oun thua cih hae zah ae beik cih hae,” a ci hae.

⁵ Tukoute he ka do tuh, vaawlang kya ccaekiakhankunaw bu a umnaw beikinn tuh ahungkuh.

⁶ Shethya ccangsari a hoi hae paw vaaw hae lu sari tuh beikinn lungkhu te oun pou hae; minmin tuh dalahdalah ak zah thyaararihpaw boeining arawpaw kha lawkuh hae zah mih by kya sui taeccia a cciakuh hae.

⁷ Ahiinpaw sarangpaw hae sa pali kyaze sa kheit nynh zungzae te zungzae cia ahiinpaw Pachia a thinrianaw te phe beihpaw sui pakekhupaw ccangsari kha vaaw hae lu sari kalan khe a pya hae.

⁸ Beikinn tuh Pachia a phu-enaw te a thungnaw maeekhuh te phe abeih; te vaaw hae lu sari kya-e shethya ccangsari athang makhia tuh hum sanmah beikinn lungkhu lang tee kho khyh.