BYAPHY 14 - Zotung Bible 2016

Tuutaw te A Ccungccaw hae 144,000

¹ Kae do zah, Tuutaw tuh Zion Mua vawlan a thadyn, mih terui kya amaw min te a Paaw min azeikuhpaw 144,000 tuh amaw ryte a umkheih hae.

² Tuiphue atoikuhpaw patae roi hawte thuasah, myarya accaepaw kholungthyhpaw roi hawte thuasah vaawlang e roi kha ka thae; tintang a khua hae paw nynh mih tintang a khua hae paw roi hawte accaepaw roi kha mah ka thae.

³ Bawitungkhung malang thuasah, ahiinpaw sarangpaw sa pali te piccan hae malang thuasah hlaw thawpaw kha minmin nynh a sah hae. Tuh-e hlaw tuh laephi kyate shawkhaw athua hae paw 144,000 laelan hum nynh sanmah ccangkuh kho khyh hae.

⁴ Minmin tuh ccangvady thua hae zah, nopi hae ryte a nungsikuh lei hae paw nynh thua; minmin tuh Tuutaw a ccianaw miakaw lang a zui hae paw nynh thua; ccungccaw hae laku kyate shawkhaw thua hae zah, Pachia te Tuutaw hanlan masaty athae nynh thua hae.

⁵ Mih munglae kya hynbya um khyh, pawccecize minmin tuh ccaenaw hoi khyh hae.

Vaaw hae Lu Thum

⁶ Tukoute vaawlang angaelung kya azoupaw ccangpaw vaawpaw kha ka muih; aning tuh laephi vawlan um hae paw ram miakaw, phin miakaw, bya miakaw te minphuin miakaw kalan hopya lanpaw zungzae atynpaw thehoypaw a hoitu nynh thua.

⁷ Aning nynh roi accae lante ho zah, “Pachia raw kha rih oh lah, thehoysah oh; pawccecize a byapianaw ccyh tuh yn thua vae; vaawlang, laephi, rili te tuidy a raetupaw kha beik oh,” a ci.

⁸ Ccangpaw vaawpaw, lu ningnawpaw nynh zuikuh zah, “Alesaepaw Babilon khuapi tuh a khuliakuh vae, a khuliakuh vae, pawccecize anungsikuhpaw a ohhuakunaw athuapaw misutui kha minphuin hae balyn pong a niasah hae,” a ci.

⁹ Ccangpaw vaawpaw, lu thumnawpaw nynh minmin kha zui hae zah, “Ccungccaw lukhakheit nynh sarepaw te tuh-e sarepaw azuh kha beik zah, tuh-e sarepaw kya-e syntawnaw tuh a terui kya khyhze a kuih kya a hoi lanze,

¹⁰ tuh-e paw tuh Pachia thinrianaw banang lungkhu lang pawpaw mah pyde leite a ccae hae paw Pachia thinrianaw athuapaw misutui kha a neih cih; tuh-e paw tuh athyaapaw vaaw hae malang te Tuutaw malang khe maee te kemaee khate thawte vawsawnaw a pya cih hae.

¹¹ Minmin nynh a teing hae paw vawsawnaw maeekhuh tuh zungzae te zungzae cia a kaethung; sarepaw te sarepaw azuh a beik hae paw te sarepaw min syntawnaw tazeih a mue hae paw tuh khuazi khuadae haeung khyh hae,” cite roi accae lante a ho.

¹² Hynh-e kyahin Pachia kawbya zui hae zah Jesu kya zynnaw a hoi hae paw mithyaa hae tuh ngaesangnaw a hoi hae.

¹³ Vaawlang te roi nynh, “Hynh-e hynh zei: Atu ccyh kyate Bawipaw kya a chih hae paw tuh hythuanaw a ccou hae paw nynh thua,” cite yn hopyapaw kha ka thae. Muisaw nynh, “Athua ccaccing, minmin tuh mih ryalaw kyate a haeung vae cih hae, pawccecize mih ryalawnaw nynh minmin kha a zui hae!” a ci.

Laephi Loohruenaw

¹⁴ Tukoute ka do zah, maeking rawpaw a um; ccungccaw alopaw nynh a lu vawlan bawilukhung kha khungkuh zah a kuih kya rungkou ahepaw kha ccyngkute tuh-e maeking vawlan khe a haung.

¹⁵ Ccangpaw vaawpaw nynh beikinn lungkhu te yn pou zah maeking vawlan a haungpaw kyakhe, “Na rungkou kha mang lah loohrue ccavae, pawccecize loohrue ccyh azaw vae, laephi kya-e loohrue lanpaw tuh avoi vae,” cite thawte sia zah a hopya.

¹⁶ Maeking vawlan a haungpaw nynh a rungkou kha laephi vawlan hang zah laephi kya-e looh kha a rue vae.

¹⁷ Ccangpaw vaawpaw tuh vaawlang a umpaw beikinn lungkhu te yn pou, aning mah rungkou ahepaw a hoibua.

¹⁸ Maee tungvaw kaw a hoitu, ccangpaw vaawpaw tuh silawhang kyate yn pou; aning nynh rungkou ahepaw a ccyngkuhpaw kalan khe thawte sia zah, “Na rungkou ahepaw kha mohsua lah, laephi kya-e misu thae ange hae kha suelua, pawccecize misu thae tuh avoi vae,” cite a hopya.

¹⁹ Vaawpaw nynh a rungkou kha laephi vawlan khe mohsua zah, laephi kya-e misu ange kha a suelua; tuh-e tuh Pachia thinrianaw athuapaw myarya lepaw misu mianawpaw akhu lungkhu langkhe moh a phang.

²⁰ Khuapi atolang umpaw misu mianawpaw akhu kyakhe miade thua zah, tuin kyate chii tuh marang khabaw se phe thua lante pou zah, me za ning loukaw cia a thua.