BYAPHY 13 - Zotung Bible 2016

Sarepaw Sa Ning

¹ Rili lungkhu te yn pouthungpaw sarepaw sa kheit kha ka muih; tuh-e sarepaw tuh lu lusari te ki kihaw a hoi; a ki vawlan bawilukhung ccanghaw um zah, a lu hae vawlan Pachia thethyasahpaw min a um.

² Ka muihpaw sarepaw tuh kaesing te nynh aloku; a ccu tuh vong ccu te lokuh zah a khalang tuh chindeih khalang te nynh aloku. Nakaa-hupi nynh a thungnaw, a bawitungkhung te alepaw kawhoinaw kha sarepaw kalan a pya.

³ Alu lu kheit tuh chikhaeku khopaw vaemaw a muepaw hawkhate nynh thua; chikhaeku khopaw a vaemaw tuh dansah athua, laephi ccungccaw hae balyn tuh mih ngaeangthua zah sarepaw nulang khe a zuikuh hae.

⁴ Sarepaw kha kawhoinaw a pyatupaw nakaa-hupi kha minmin nynh a beik hae; sarepaw kha mah beik hae zah, “Sarepaw alopaw hummou a um? Hummou sarepaw kha rhawtuk kho cih?” a ci hae.

⁵ Sarepaw tuh lysakunaw bya te Pachia thethyasahnaw bya a hothyapaw munglae kha pya thua zah, sawpaw sung pali sah ning lungkhu kawhoinaw kha mah pya athua.

⁶ A khalang kha aw zah Pachia thethyasahnaw bya kha a ho, Pachia a min, a umnaw te vaawlang a um hae paw kha thethyasahnaw bya a ho.

⁷ Mithyaa hae kha rhawtuknaw kaw te taenaw kaw a mue; phin miakaw, minphuin miakaw, bya miakaw te ram miakaw tungvaw kawhoinaw kha amaw kya pya athua.

⁸ Chia athuapaw Tuutaw kya-e hiinnaw ccauh kya laephi athotakaw te mih min zei athua lei hae paw, laephi vawlan a um hae paw balyn nynh sarepaw kha oun beik cih hae.

⁹ Nakaring a hoipaw ccungccaw tuh thae sah:

¹⁰ Ming hae kha seetangnaw kalan a cciakhae hae paw ccungccaw tuh amaw mah seetangnaw kalan a cceih cih; thaloi te ccungccaw a theihpaw tuh amaw mah thaloi te chia athua hahe cih. E kyahin mithyaa hae zynnaw te lungsaenaw tuh a um.

Sarepaw Sa Ningnaw

¹¹ Laephi lungkhu te yn poupaw ccangpaw sarepaw kha ka muih; aning tuh tuutaw hawte ki kining hoi zah nakaa-hupi hawte bya a ho.

¹² Tuh-e sarepaw nynh masaty sarepaw kya-e thungnaw balyn kha amaw a muihnaw kya mawkhe pong a mang; aning nynh laephi te laephi kya um hae paw kha chikhaeku khopaw vaemaw kyate a dan vae paw masaty sarepaw kha a beiksah hae.

¹³ Aning nynh myarya lepaw muihsahnaw kha langsakuh zah, ccungccaw hae muihnaw kyakhe maee kha vaawlang te laephi vawlan a ccawsah.

¹⁴ Aning nynh masaty e sarepaw malang langsakunaw kaw a muepaw muihsahnaw hae liate laephi vawlan a um hae paw kha a ling hae. Thaloi te vaemaw a mue zemah a hiin ungpaw sarepaw azuh kha raeku lan laephi vawlan a um hae paw kha a hopya hae.

¹⁵ Sarepaw azuh nynh bya a ho kho nawlan thuasah, sarepaw azuh a beik leipaw miakaw tuh chia athua nawlan thuasah, sarepaw azuh tuh hiinnaw pya khonaw kaw kha aning tuh pya athua.

¹⁶ Aning nynh ccungccaw balyn kha, adihpaw mah alepaw mah, a hoirumpaw mah a ryachipaw mah, a luepaw mah see mah mih ranglang kuih kya khyhze mih terui kyakhe syntawnaw tazeih a khiasaku hae.

¹⁷ Sarepaw min khyhze a min namba athuapaw syntawnaw tazeih a um khyh lanze, humhung mah re khonaw te zua khonaw kaw hoi khyh.

¹⁸ Hynh-e kya hawnaw a um: thaethyanaw a hoipaw ccungccaw nynh sarepaw namba kha ria sah; pawccecize tuh-e tuh ccungccaw namba thua zah, tuh-e namba tuh 666 nynh thua.