BYAPHY 1 - Zotung Bible 2016

¹ E ccauh tuh Jesu Khri kya-e byaphy nynh thua, aro mawze solei yn cyihkuh cih paw uccaw hae kha a ryalahtu hae kalan langsahpya khylan Pachia nynh Khri kalan a pyapaw byaphy nynh thua. Khri nynh a vaaw ccungccapaw kha saw zah a seepaw Johan kha tuh-e byaphy tuh a nysah.

² Johan nynh Pachia bya te Jesu Khri kya-e ccaekia te a muihpaw balyn kha ccaekia a khan.

³ Hynh-e profehbya hae hynh a ria paw, a thae hae paw te tuin kya azeikuhpaw kha a zui hae paw tuh hythuaccou hae paw nynh thua hae; pawccecize accyh tuh anae vae.

Khriccaawbuu Buu Sari kalan Beihlangnaw

⁴ Kae, Johan nynh Asia ram kya umpaw khriccaawbuu buu sari kha kae beihlang oh. Atu lya a umpaw, langmawlya a la um vae paw te malang zemah a um cih paw amaw kyate thuasah, a bawitungkhung malang a um hae paw muisaw hae ccangsari kyate thuasah,

⁵ a lungzipaw ccaekia a thuapaw, a chih hae paw kyate masaty yn puipaw te laephi siapharan hae uktu bawi athuapaw Jesu Khri kyate thuasah thawccinaw te daenaw tuh nae tungvaw la um sah. Aening kha oun sungsah zah a chiise te aening seinaw balyn kha oun luesahpaw,

⁶ aening hanlan peenaw kha oun raepah zah a Paaw te a Pachia malang khe ranpibawi hae lang oun raetupaw tungvaw kya phu-enaw te uknaw kaw tuh zungzae te zungzae cia la um sah. Amen.

⁷ Dotua oh, Khri tuh maeking te nynh yn thua, ccungccaw miakaw te amaw a thuingtu hae nynh amaw kha a muih cih hae; laephi vaw e minphuin hae balyn tuh amaw keiccuze a rah a khui cih hae. Ou tuhmawte nynh thua, Amen.

⁸ Bawipaw Pachia nynh, “Kae tuh Alfa te Omega nynh ka thua,” a ci. Aning tuh atu lya a umpaw, langmawlya a la um vae paw te malang zemah a um cih paw, Athung Huaccepaw nynh thua.

Johan Vizin kya-e Khri

⁹ Jesu Khri kya-e vawsawrunaw, peenaw te ngaesangnaw kya nanning ry a mungkuh buapaw, nae upaw kae, Johan tuh Pachia bya keiccu te Jesu Khri ccaekia lang ka tang keiccuze Patmos cikuhpaw tuikoih kya ka um.

¹⁰ Bawipaw Nin kya kae tuh Muisaw kya ka um zah, ka nulang khe mungkae roi hawte myarya accaepaw roi kha ka thae.

¹¹ Tuh-e roi nynh, “Na muihpaw kha ccauh kya zei lah, Asia ram e Efesa khua, Smyrna khua, Perkamum khua, Thiatira khua, Sardis khua, Filadelfia khua te Laodisia khua kya umpaw khriccaawbuu buu sari kalan ky hae,” a ci.

¹² Bya yn hopah zah roi a sawtupaw kha muih khylan he ka maeleihkuh tuh, sui maeekhuatung ccangsari,

¹³ te maeekhuatung ccangsari angaelung khe Ccungccaw Ccapaw alopaw lu kheit kha ka muih; tuh-e paw tuh angkiccua kha kikuh zah a by kyakhe sui taeccia te a cciakuh.

¹⁴ A lu te a sang tuh tuuming te vuiraw hawte araw; a mit tuh maeesoi hawte nynh thua.

¹⁵ A ccu tuh maeesopi kya a phung vae hae paw thyaararihpaw sohin nynh alo, a roi tuh tuiphue patae roi accaepaw nynh alo.

¹⁶ A ranglang kuih kya awsi ccangsari a ccyng; a khalang lungkhu te kyn ning mawte ahepaw thaloi a pou; a maesue tuh thawzung phe beih lante apawpaw khuanin hawte nynh thua.

¹⁷ Amaw kha he ka muih tuh, a cculeihpaw khe achihpaw hawte ka khuliakuh. Thuasalama a ranglang kuih kha ka tungvaw khe khang zah, “Rih nan, kae tuh masaty te nyathyakou nynh ka thua;

¹⁸ a hiinpaw mah ka thua; kae tuh ka la chih, thuasalama dotua, kae tuh zungzae te zungzae cia po a hiinpaw nynh ka thua, Chinaw toh te Michi khua toh kha ka hoi.

¹⁹ Tukeiccuze na muihpaw uccaw hae, atu lya a umpaw uccaw hae te malang yn cyihkuh cih paw uccaw hae kha zei.

²⁰ Ka ranglang kuih kya na muihpaw awsi ccangsari te sui maeekhuatung ccangsari nynh a ho rypaw byakhupaw tuh hynhte nynh thua: Awsi ccangsari tuh khriccaawbuu buu sari kya-e vaaw hae nynh thua; na muihpaw maeekhuatung ccangsari tuh khriccaawbuu buu sari kha nynh thua.