AMOS 6 - Zotung Bible 2016

Israel Ronaw

¹ Zion kya lungdaete a um hae paw te Samaria Mua vawlan khyndadyh lan a um hae paw, minphuin hae kyaze asung-e huapaw lante alangkuhpaw, Israel hae nynh a doliaku hae paw hanlan ngaethya lan kou um!

² Kalneh khua lang la cceih oh lah, la dotua oh; tuin kyate myarya lepaw Hamath khua lang la cceih oh; te Filistin ram e Gath khua langkhe la cceihbung oh. Nanning tuh e ram hae laeze na hoyhua oh tou? Nae ram tuh mih ram laeze akohua tou?

³ Nin thahpaw nin kha ccaring na nue oh zah, puathote ukkunaw nin kha na naesah oh.

⁴ Saepaw nua te raekuhpaw ikhung vawlan ih hae zah, mih iphae vawlan a huekuh hae paw, tuuphu kya-e tuutaw hae te vaetua khia kya-e vaetuataw hae kha a ae hae paw hanlan thuasah,

⁵ tintang khuakute hlaw huataw kha sah hae zah, David hawte khuakupaw uccaw kha a raekuh hae paw hanlan thuasah,

⁶ misutui kha banang lepaw te neih hae zah, chitui ahoyhoypaw kha a thuhku hae zemah Josef nynh ronaw a teingpaw kha mih ngaethah lei hae paw hanlan thuasah ngaethya lan kou um!

⁷ Tukeiccuze minmin kha masaty a kyng cih hae zah a cciakhae cih hae, kalouhkalouh huekuh hae paw kya-e lungpawnaw tuh athang cih.

⁸ Bawipaw PACHIA ccaccei nynh bya a kinku vae (Bawipaw , vaaw Pachia nynh a ho): Jakob nynh a lysakunaw te a rhawlungrua hae kha ka hua; khuapi te a lungkhu um hae paw balyn kha rhaw hae kalan ka ap cih hae.

⁹ Inn innkheit lungkhu ccungccaw lu haw a laehy hae ze, a chih cih hae.

¹⁰ Michi te puizia athua hae paw lu kheit nynh michi rhua kha maee te u khylan inn lungkhu te a poukhae cih, te inn lungkhu umpaw lu kheit kha, “Na umkheih oh paw lukhakheit a um ung tou?” cite a khia lanze, “Um vae khyh,” cite a khung cih. Tetuh tuh-e a puiziapaw tuh nynh, “Daebabi lan zya um! Bawipaw min kha ho lanpaw thua khyh,” a cipah cih.

¹¹ Dotua, Bawipaw nynh kawpya keiccuze, inn lepaw kha phiariphiarae pong um lan phou athua cih zah, inn dihpaw kha zoihtatae lan phou athua cih.

¹² Marang hae tuh lung pipi vawlan a ccue hae zawtou? Ccungccaw nynh rili kha tangnuapaw te lei lang a thue zawtou? Thuasalama nanning nynh dingnaw kha sy lang na paleih oh zah, dingnaw thae kha eccangkary lang na paleih oh—

¹³ nanning nynh Lodebar khua kya nae lungpaw zah, “Karnaim kha ahmaw thawzung te ah lah khyh oh tou?” na ciku oh.

¹⁴ Thanccingte, pou Israel hae, nanning kha rawse khylan minphuin phuin kheit ka langsakuh cih zah minmin nynh nanning kha Lebo-hamath kyate Arabah Accya kyacia ae tuaa ae sah cih oh, cite Bawipaw , vaaw Pachia nynh a ci.