AMOS 5 - Zotung Bible 2016

Israel Seinaw keiccu Rawkhuinaw

¹ Pou Israel hae, hynh-e kae hopya oh paw rawkhuinaw bya hynh ngaetua oh:

² Liaccanung Israel tuh a khuliakuh vae, thokuh vae lan khyh; a ram kya a huekuh vae, aning kha a tho lanpaw lu kheit san um khyh.

³ Bawipaw PACHIA nynh hynhte a ho: Rhawtuk lan ccungccaw thong kheit a sawpaw khuapi tuh milu za kheit kyalya alae vae cih, ccungccaw za kheit a sawpaw khuapi tuh lu haw kyalya alae vae cih.

⁴ Bawipaw nynh Israel hae kha hynhte a hopya hae: Kae kha yn ccung oh lah, na hiin cih oh;

⁵ thuasalama Bethel khua kha ccung nan oh, Gilgal khua lungkhu lang tee nan oh, Beersheba khua lang cceih nan oh, pawccecize Gilgal khua tuh a kyng cih hae zah a cciakhae ccaccing cih hae, Bethel khua tuh accakaepaw lang a tang cih.

⁶ Bawipaw kha ccung oh lah, na hiin cih oh, tuhkhyhze tuh Josef ciihan hae kha maee hawte a u cih hae, tuh-e maee nynh Bethel kha a u cih zah, a thetu um lan khyh.

⁷ Byading kha eccangkary lang na tangsah oh zah, dingnaw kha laekhu lang na vua oh!

⁸ Awsitaruh te Orion awsiphu kha a raetupaw, marae zipingpaw mohnaw kha awkhua awnaw lang a paleihtupaw, khuadae kha khuazi lang a mohsahtupaw, rili tui kha ko zah laephi vawlan moh a laetupaw a min tuh Bawipaw a cikuh;

⁹ aning nynh mih thawsae hae paw te rhawlungrua hae kha a ro hae.

¹⁰ Minmin nynh koikua kya dingleinaw a langsakuhpaw te byaccing a hopaw kha a hua hae.

¹¹ Nanning nynh ryachi hae kha na syde oh zah, looh kha na luade oh keiccuze asuikuhpaw lung te inn na sakku oh zemah tuh-e inn hae kya na um lan khyh oh; ry lan umpaw misu khokhu hae kha na raeku oh zemah, tuin kya-e misutui kha na neih lan khyh oh.

¹² Nae cyiseimenaw alungpaw te nae seinaw alungpaw kha phe ka ny— miding hae kha vawsaw na pya oh zah, pyaruh kha na lawku oh, minyaa hae kha byapianaw koikua kyate atolang na dee oh.

¹³ Tukeiccuze mihawpaw nynh tuh tuhcihawpaw ccyh kya daebabi lan a um; pawccecize tuh-e ccyh tuh ccyh thyapaw nynh thua.

¹⁴ Na hiin ccaw oh, hoyleinaw kha ccung leite hoynaw kha ccung oh; tuhte na cyi oh zetuh, na ho vae oh hawte, Bawipaw , vaaw Pachia tuh nae kya a um cih.

¹⁵ Hoyleinaw kha hua oh lah, hoynaw kha ry oh, byapianaw koikua kya dingnaw kha tynsah oh; Bawipaw , vaaw Pachia nynh Josef ciihan a laehy hae paw kha thaw poh a ccih kho hae.

¹⁶ Tukeiccuze Bawipaw, vaaw Pachia, Bawipaw nynh hynhte a ho: Laanpi takyh kya rawnaw a um cih zah, “Ezou! Ezou!” a ci cih hae. Loopho hae te a rahthya hae paw kha raw lan a ko cih hae;

¹⁷ misu khokhu hae balyn kya rawnaw a um cih, pawccecize kae tuh nae laku kya po ka cceih cih, cite Bawipaw nynh a ci.

Bawipaw Nin

¹⁸ Bawipaw nin a ngaehoi hae paw nanning hanlan ngaethya lan kou um! Pawccemou Bawipaw nin tuh na ngaehoi oh? Tuh-e nin tuh moh zah awnaw um khyh;

¹⁹ ccungccaw nynh chindeih kyate ccue zah, vong te a tungku hae hawte athua cih zah, inn lungkhu lang tee zah pang kya a hahku lyakhe hupaw nynh a khy hawte athua cih.

²⁰ Bawipaw nin tuh awnaw thua leite mohnaw nin nynh thua, awnaw um leite marae zipaw mohnaw nin nynh thua.

²¹ Nae beiknaw poi hae kha ka hua zah pawlang ka ria khyh, athyaapaw nae pumkunaw kha mah ka lungrythua khyh.

²² Maee-ute silawnaw te ccathae silawnaw kha nae pya oh zemah, kae ccoupah lan khyh oh; ccawkunaw silawnaw lante nae pya oh paw athopaw nae sahiin hae kha mah lymaw ka do lan khyh.

²³ Na siarua oh paw nae hlaw roi kha zya dae oh; nae tintang roi kha ka thae ry khyh.

²⁴ Byading kha tui hawte luasah oh lah, dingnaw kha akan leipaw vaw hawte luasah oh.

²⁵ Pou Israel hae, silawnawpaw te pyapaw uccaw hae kha ramkaw kya kum sung pali lungkhu ka kalan nae thuakhae oh tou?

²⁶ Nae siapharan Sakkuth, nae awsi-pachia Kaiwan te na raeku oh paw zohtuh hae kha na lawkuh cih oh;

²⁷ tukeiccuze nanning kha kyngte Damaskas khunglang kae cciakhaesah cih oh, cite a min vaaw Pachia a cikuhpaw Bawipaw nynh a ci.