AMOS 4 - Zotung Bible 2016

¹ Ryachi hae kha tuaasah hae zah, a nyaa hae paw kha a nangde hae paw, mih vawpaw hae kha, “Nia lanpaw oun pya!” a cih hae paw, Samaria Mua vawlan e Bashan vaetuapi hae, e bya hynh ngaetua oh.

² Bawipaw PACHIA nynh a thyaanaw liate bya a kinku vae: Nanning kha bawnawpaw te thuasah, nae ccaaw nae no hae kha heize ngasabaw te thuasah ae cciakhae oh ccyh tuh yn thua ccaccing cih.

³ Nanning tuh lu kheit ccite khualungrua-ua kyate lawbabin lan malang na pou cih oh; te Harmon langkhe ae vua cih oh, cite Bawipaw nynh a ci.

⁴ Bethel lang oun cceih oh lah, sei oh; Gilgal lang oun cceih oh lah, seinaw patae raetua oh; awkhua takyh si na lawnaw oh paw kha oun ccyng oh, nae kya-e pumhaw pumkheit kha nin thum ze vae kheit oun ccyng oh;

⁵ ransi phingkuhpaw lungtuanaw sanlou kha oun ccyng oh, lungthote silawnaw kha rae oh, cite zapi hae kha thaesah oh; pawccecize, pou Israel ccungccaw hae, tuhcite khaw na cyi ry oh! cite Bawipaw PACHIA nynh a ho.

Israel nynh Thuiheinaw A Ei

⁶ Nae khuapi hae balyn kyakhe ccakan ka ccisah zah, nae umnaw takyh kyakhe looh ka thangsah, tuhzemah ka kalan nae kithui khyh oh, cite Bawipaw nynh a ci.

⁷ Loohrue nawlan sawpaw sah thum he ary te, khuaa kha mah kae rawsahpah vae khyh oh; khuapi khua kheit kya khuaa ka rawsah zah, ccangpaw khua kheit kya khuaa ka rawsah khyh; loo ccyng kheit kya tuh khuaarah zah, khuaa a raw leinaw loo kya tuh karae rou;

⁸ tukeiccuze khua khua ning khua thum hae tuh tui nia khylan khua khua kheit kalan a ccia hae zemah byn khyh hae; tuhzemah ka kalan nae kithui khyh oh, cite Bawipaw nynh a ho.

⁹ Khivae keiccu aku chinaw, aphi pou zah aku chinaw khate nanning kha de kae tah oh; nae khokhu hae te nae misu khokhu hae kha ka ro hae; tungkhipaw hae nynh nae thaeku ku hae te nae oliv ku hae kha a ae hae; tuhzemah ka kalan nae kithui khyh oh, cite Bawipaw nynh a ci.

¹⁰ Izip ram kya ka thuasahpaw shethya kha nae kya ka thuasah; nae ccangvae hae kha thaloi te ka chia hae; nae marang hae kha ccaring kae cciakhaepya oh; nae ryahmin kya-e athuhpaw amyn kha nae naduh te kae suesah oh, tuhzemah ka kalan nae kithui khyh oh, cite Bawipaw nynh a ci.

¹¹ Pachia nynh Sodom te Gomorrah a ro lya hawte, nanning abang kha kae ro oh, nanning tuh maee lungkhu te lawpaw maeething taraw te nynh na loku oh; tuhzemah ka kalan nae kithui khyh oh, cite Bawipaw nynh a ci.

¹² Tukeiccuze, pou Israel, tuhcite na tungvaw ka cyih cih; tuhte na tungvaw ka cyih cih keiccuze, na Pachia kha tungku lan paccynku tua, pou Israel!

¹³ Pawccecize mua hae te khivae kha a raetupaw, a tuanaw kha ccungccaw hae kya a langsakuhpaw, awkhua e awnaw kha mohnaw lang rae zah, laephi ahang hae paw kha a sydepaw a min tuh Bawipaw , vaaw Pachia a cikuh.