AMOS 1 - Zotung Bible 2016

¹ E bya tuh Judah siapharan Uzziah ccyh lya te Israel siapharan Jehoash ccapaw Jeroboam ccyh lya, innry asueku maw kum ning lyakhe, Tekoa khua kyaze tuurin athua buapaw Amos nynh Israel ram konglang vizin a muihpaw bya nynh thua.

Israel Innpaw hae Byapianaw

² Amos nynh a hopaw tuh: Bawipaw tuh Zion mua vawlan te sia zah, Jerusalem kyate a roi a saw; Tuurin hae kya-e tuu a paeekunaw kinno tuh naan zah, Karmel mua dung tuh arou vae.

³ Bawipaw nynh hynhte a ho: Damaskas nynh atu te atu seinaw a rae keiccuze detah leite ka um lan khyh; minmin nynh Gilead kha sivaw haw bingkuhpaw ccatan tinnawpaw thingtung khate a tinde hae.

⁴ Tukeiccuze Hazael siapharan inn vawlan khe maee ka sawnua cih zah, tuh-e maee nynh Benhadad kya-e rhawlungrua hae kha a u cih.

⁵ Damaskas koikua accong hae kha ka khya cih zah, Aven Accya kya um hae paw te Beth-eden khua e uktu bawi kha ka vua cih hae. Siria ccungccaw hae kha kyngte Kir ram lang cciakhae athua cih hae, cite Bawipaw nynh a ho.

⁶ Bawipaw nynh hynhte a ho: Gaza khua nynh atu te atu seinaw a rae keiccuze detah leite ka um lan khyh; minmin nynh minphuin pynpi kha kyngte Edom ram kalan ap khylan a cciakhae hae.

⁷ Tukeiccuze Gaza khualungrua vawlan khe maee ka sawnua cih zah, tuh-e maee nynh a rhawlungrua kha a u cih.

⁸ Ashdod kya um hae paw te Ashkelon uknaw ccoi a kyngtu bawi kha ka vua cih hae. Ekron khua kha ka kuih ka maeleihnua cih zah, a laehypaw Filistin hae tuh a roh cih hae, cite Bawipaw PACHIA nynh a ho.

⁹ Bawipaw nynh hynhte a ho: Tair nynh atu te atu seinaw a rae keiccuze detah leite ka um lan khyh; minmin nynh minphuin pynpi kha Edom ram kalan a ap hae, a puizia ryte a rae hae paw byakinnaw kha liathui khyh.

¹⁰ Tukeiccuze Tair kya-e khualungrua vawlan khe maee ka sawnua cih zah, tuh-e maee nynh a rhawlungrua hae kha a u cih.

¹¹ Bawipaw nynh hynhte a ho: Edom nynh atu te atu seinaw a rae keiccuze detah leite ka um lan khyh; aning nynh a unopaw kha thaloi te deehui zah, ngaethyaumsah khyh; zungzae a thinria zah, a thin-unaw kha tyty a ccykeku.

¹² Tukeiccuze Teman khua vawlan khe maee ka sawnua cih zah, tuh-e maee nynh Bozrah kya-e rhawlungrua hae kha a u cih.

¹³ Bawipaw nynh hynhte a ho: Ammon hae nynh atu te atu seinaw a rae hae keiccuze detah leite ka um lan khyh hae; mih ram kha kosah khylan Gilead ram e ccaawpoipaw nopi hae vue kha a pawsah hae.

¹⁴ Tukeiccuze Rabbah khualungrua kha maee te ka u cih zah, tuh-e maee nynh a khualungrua hae kha a u cih, rhawtuk nin kya siaruanaw a um cih zah, khiccungkhia nin kya khise athobia cih;

¹⁵ tetuh mih siapharan te a kuihkaw e bawi hae kha kyngte a cciakhae cih hae, cite Bawipaw nynh a ho.