2 TIMOTE 3 - Zotung Bible 2016

Nyathya Nin hae

¹ Nyathya nin kya tuh vawsawnaw ccyh yn thua cih cipaw kha la nyh.

² Pawccecize ccungccaw hae tuh mimaw a sungsakuh hae paw, phua a duaa hae paw, a pookuh hae paw, a lysakuh hae paw, milae thethya ho hae paw, nungpaaw kawngae lei hae paw, lungtuabya a hothya lei hae paw, athyaa lei hae paw,

³ sungsahnaw hoi lei hae paw, ccungccaw ngaethya lei hae paw, milae thanho hae paw, a sungkuh kho lei hae paw, eih rei kaesy hae paw, ahoypaw a hua hae paw,

⁴ lungzi lei hae paw, paw peki lei hae paw, a lysakuh hae paw, Pachia sungsahpaw laeze hoysahnaw a ryhua hae paw,

⁵ Pachia rawrihpaw o-ang lante a umsaku hae zemah tuh-e thungnaw kha a vua hae paw nynh thua hae. Tuhcihawpaw ccungccaw hae kha la sibia hae.

⁶ Pawccecize minmin laku e ccungccaw abang tuh inn lungkhu lang tee hae zah, mih seinaw nynh phang ne hae paw te zoikadeih lan ling kho umpaw nopi hae kha rynaw aphuinphuin te cciakhaesei hae zah see lang a kyngtu hae nynh thua.

⁷ Tuh-e nopi hae tuh palei ccangkuh hae salamah byaccing a nyh kho lei hae paw nynh thua.

⁸ Jannes te Jambres nynh Moses kha a dou hae hawte tuh-e ccungccaw hae nynh byaccing kha a dou hae. Minmin tuh thinlung ahme lei vae paw thua hae zah mih zynnaw mah pawsang thua vae khyh.

⁹ Thuasalama tuh-e lu ning hae mih ngaeenaw tuh alangku vae hawte hynh-e hae mih ngaeenaw mah ccungccaw miakaw kya a langkuh cih. Tukeiccuze minmin tuh tuhlaeze lethung kho vae lan khyh hae.

¹⁰ Thuasalama ka ccangpyanaw, ka ziazae, ka hiinnaw kya ka eenaw, ka zynnaw, ka lungsaenaw, ka sungsahnaw, ka ngaesangnaw kha thuasah,

¹¹ Antiok khua, Ikonium khua te Lystra khua kya ka tungpaw tuaasahkunaw te teingnaw hae kha thuasah, pawcihawpaw tuaasahkunaw hae kha nynh ka teing cipaw kha marya na ny; thuasalama tuh-e hae balyn kyate Bawipaw nynh yn luesah.

¹² Thanccingte, Khri Jesu kya Pachia rawrinaw te a hiin rypaw ccungccaw balyn nynh tuh tuaasahkunaw kha a teing cih hae.

¹³ Thuasalama ccungccaw hoylei hae te a hynhupaw ccungccaw hae tuh ahoy leipaw lang houhouh a tang cih hae; ming hae kha a phee cih hae zah mimaw mah phee athua cih hae.

¹⁴ Thuasalama nang tuh na ccangku vae paw te tynkaring lan na zyn vae paw kyakhe po la tyn, pawccecize hum kyate nynh na ccangku cipaw kha na ny.

¹⁵ Na imua lya mawte Ccathyaa kha phe na ny vae, tuh-e Ccathyaa nynh Khri Jesu zynnaw liate khumnaw mue nawlan hawnaw kha ae pya kho.

¹⁶ Ccathyaa balyn tuh Pachia hysawnuapaw thua zah, ccangpyakunaw hanlan, seinaw langsaku nawlan, raethuinaw hanlan, dingnaw kya thuiheikunaw hanlan athanepaw nynh thua.

¹⁷ Tuhcite Pachia ccungccaw tuh accingpaw athua nawlan te ahoypaw ryalaw miakaw hanlan paccynpaw athua nawlan nynh thua.