2 TIMOTE 2 - Zotung Bible 2016

Khri Jesu Rhawkaw Hoypaw

¹ Tukeiccuze ka ccapaw, nang tuh Khri Jesu kya a umpaw thawccinaw kyakhe na thaw la sae sah.

² Ccaekia hae patae malang kamaw kyate na thae vae paw uccaw hae kha ming hae a ccangpah kho cih hae paw, a lungzipaw ccungccaw hae kalan la ap hae.

³ Tukeiccuze Khri Jesu kya-e rhawkaw hoypaw hawkhate, vawsawnaw kha la ngaesang.

⁴ Rhawkaw nynh tuh rhawkaw lang a potupaw a bawipaw kha a lungrytung khylan ccungccaw huataw bya kya suakuh bua khyh.

⁵ Khungtaekunaw kya a taekuh buapaw nynh aphung thyhte a taeku khyh ze, lasung kha mue khyh.

⁶ Thawte a reihkuhpaw loophopaw tuh masaty looh a muepaw athua cih.

⁷ Ka hopaw kha hoyte la tua, Bawipaw nynh pawpaw balyn kya thaethyanaw ae pya cih.

⁸ Ka hopaw thehoypaw thyhte David ciihan athuapaw Jesu Khri tuh chinaw kyate a thoothui cipaw kha la liathui.

⁹ Tuh-e thehoypaw hanlan kae tuh misei hawte sivawrui te khii ciate vawsaw ka teing; thuasalama Pachia bya tuh khii kho thua khyh.

¹⁰ Tukeiccuze popaw ccungccaw hae nynh mah Khri Jesu kya a umpaw khumnaw kha zungzae phu-enaw ryte a muebua nawlan hae, minmin hanlan pawpaw balyn kha ka ngaesang.

¹¹ Hynh-e tuh ahmepaw bya nynh thua: Pawccecize amaw ryte ah chikheih oh ze, amaw ryte ah hiinkheih cih oh.

¹² Aening ah teing kho oh ze, amaw ryte ah ukkheih cih oh; amaw kha ah vua oh ze, aning nynh mah oun vua cih.

¹³ Aening tuh zyn lan ah um khyh oh zemah, aning tuh a lungzipaw nynh thua, pawccecize amaw te amaw kha vuakuh kho khyh.

Pachia Nawccawpaw Ryalahtu

¹⁴ Hynh-e uccaw hae kong hynh la tuasah thui hae. Athane leipaw te a thaetu hae a rosahpaw bya kong kha minmin nynh a peku khyh nawlan hae Pachia malang raeringnaw pya hae.

¹⁵ Byaccing bya kha hmerarih lan phiathyate, maethya lanpaw a hoi leipaw ryalahtu na thua zah, Pachia nynh a nawccawpaw lang tangte, Pachia kalan pyaku lan thawte zuakuh.

¹⁶ Anungsikuhpaw, accakaepaw bya ccohkunaw kha la sungkuh, pawccecize tuh-e bya nynh ccungccaw hae kha Pachia kyate houhouh a sawsaku hae.

¹⁷ Mih bya tuh vaemaw hawte apazaekuh cih. Tuh-e hae kya Himenias te Filetas a umbua hae.

¹⁸ Minmin nynh thoothuinaw tuh phe thang vae paw nynh thua a ci hae keiccuze byaccing kyate a cceihsei vae hae, te ccungccaw abang zynnaw kha a buleihpya hae.

¹⁹ Thuasalama Pachia kya-e atynpaw tungpi tuh a thadyn; tuh-e tungpi kyatuin, “Bawipaw nynh a ccungccaw hae kha a ny,” cipaw te, “Bawipaw min a phukuhpaw miakaw nynh tuh hoyleinaw kha cciataw sah,” cipaw kha tazeihkhia athua.

²⁰ Myarya lepaw inn kyakhe sui angphe hae te phua angphe hae kyalya um khyh, thing angphe hae te lae angphe hae mah a umbua. Abang tuh abyapipaw kya mang lanpaw thua zah abang tuh huatawpaw kya mang lanpaw nynh thua.

²¹ Tukeiccuze lukhakheit nynh anungsikuhpaw uccaw kyate amaw te amaw kha a ccikanku lanze, aning tuh abyapipaw kya mang lanpaw angphe, thyaa zah inn hoitu nynh mang lan asypaw angphe, ahoypaw ryalaw miakaw hanlan paccynpaw athua cih.

²² Ccangvae lya-e chiisaw rynaw kha sibia lah, athyaapaw thinlung te Bawipaw a ko hae paw ryte dingnaw, zynnaw, sungsakunaw te daenaw hoi lanpaw kha la zuaku.

²³ Ngaeenaw te pawsang ny tutae leite bya-eikunaw kha la sibia. Tuh-e nynh pekunaw kha a thuakhae cipaw na ny.

²⁴ Bawipaw rya a lahtu tuh ming hae ryte pekuh hahe lan khyh hae, ccungccaw miakaw kya thawccinaw a hoi cih, a ccangpah thya cih zah a lungsae cih,

²⁵ amaw a rawsetu hae kha lungnenaw te a thuihei cih hae; minmin nynh byaccing a ny nawlan hae Pachia nynh ngaesikunaw kha a pya ze a pya cih hae,

²⁶ te minmin nynh tuathya-nythyanaw oun hoi cih hae zah Satan nynh a rynaw raesah khylan a kyngnaw hae paw kaang kyate a lue cih hae.