2 SIAPHARAN 24 - Zotung Bible 2016

Rhaw hae nynh Judah Taenaw

¹ Jehoiakim she lyakhe Babilon siapharan Nebukhadnezzar tuh yn cceihthung zah, Jehoiakim tuh kum thum lungkhu a ryalahtu lang a tang; tukoute rawse zah a dou.

² Bawipaw nynh a ryalahtu profeh hae kyate a la hopaw bya thyhte, Judah ram kha ro khylan Babilon hae, Siria hae, Moab hae te Ammon hae kha Judah kalan a sawnua hae.

^3-4 Manasseh nynh a la seipaw a seinaw balyn keiccu te seinaw a hoi lei hae paw chiise a la luasahpaw seinaw keiccuze a ccungccaw hae kha a muihnaw kyate dee khylan Bawipaw kawpyanaw te hynh-e uccaw hynh Judah tungvaw yn thua; pawccecize Jerusalem khua kha seinaw a hoi leipaw chiise khate biasah zah Bawipaw nynh a seinaw kha ngaethya ry khyh.

⁵ Tuhlaepaw Jehoiakim nynh rya a lawpaw te a cyipaw balyn tuh Judah Siapharan hae Sherianaw Ccauh kya a zei hae.

⁶ Tuhcite Jehoiakim tuh a minpaaw hae ryte ih hae zah, a ccapaw Jehoiakim nynh amaw ccelang siapharan lang a tang.

⁷ Izip siapharan tuh a ram kyate pou vae khyh, pawccecize Izip Vaw kyate Zufrates Vawpi kyacia Izip siapharan kya-e ram balyn kha Babilon siapharan nynh a law vae.

Jehoiakhin Kyngnaw

⁸ Jehoiakhin tuh kum haw lae tarya acih te, ram kha uk takaw zah, Jerusalem kyate sawpaw sah thum a uk. A nung min tuh Nehushta cikuh zah Jerusalem khuapaw Elnathan ccanung nynh thua.

⁹ A paaw nynh a la rae hawte Bawipaw muihnaw kya hoyleinaw kha a rae.

¹⁰ Tuh ccyh lyakhe Babilon siapharan Nebukhadnezzar a ryalahtu hae nynh Jerusalem kha oun ccianua thung hae zah a koihlu hae.

¹¹ A ryalahtu hae nynh khua a koihlu lya hae khe, Babilon siapharan Nebukhadnezzar tuh Jerusalem khua lang a thua;

¹² Judah siapharan Jehoiakhin nynh amaw, a nung, a ryalahtu hae, a kuihkaw e bawi hae te a siapharan inn e bawi hae ryte Babilon siapharan kalan a apku. Babilon siapharan nynh ram a uknaw kum taryanaw kum khe Jehoiakhin kha thong a saw.

Jerusalem Lawnaw

¹³ Bawipaw inn kya-e sisua balyn te siapharan inn kya-e sisua balyn kha Nebukhadnezzar nynh Babilon lang a phu; Israel siapharan Solomon nynh a raepaw, Bawipaw inn kya umpaw sui angphe hae balyn kha zoihtatyh lan a koi, e balyn hynh Bawipaw nynh a la hoty vae hawte nynh thua.

¹⁴ Jerusalem khuaccaaw hae balyn, bawi hae balyn, a rawthung hae paw balyn, kyngpaw ccungccaw abalyn thong haw, kuihhae hoy hae paw balyn te sosuhthya hae paw balyn kha marya a cciakhae hae; ram lungkhu e a ryachi huaccepaw ccungccaw hae laelan, lu kheit sanmah laehy khyh hae.

¹⁵ Jehoiakhin kha Babilon lang a cciakhae; siapharan a nung, siapharan zu hae, a kuihkaw e bawi hae te ram lungkhu e ccungkiahua hae paw kha kyngte Jerusalem kyate Babilon lang a cciakhae hae.

¹⁶ Arawthungpaw ccungccaw thong sari, kuihhae hoy hae paw te sosuhthya hae paw thong kheit, a thawsae zah rhaw a tuk kho cih hae paw kha mih balynte Babilon siapharan nynh kyng hae zah Babilon lang a cciakhae hae.

¹⁷ Babilon siapharan nynh Jehoiakhin a paaw neitawpaw Mattaniah kha Jehoiakhin ccelang siapharan lang khang zah, a min kha Zedekiah cite a paleih.

Zedekiah nynh Judah A Uk

¹⁸ Zedekiah tuh kum kuin lae kheit acih te, ram kha uk takaw zah, Jerusalem kya kum haw lae kheit a uk. A nung min tuh Hamutal cikuh zah Libnah khuapaw Jeremiah ccanung nynh thua.

¹⁹ Jehoiakim nynh a la rae hawte, Zedekiah nynh Bawipaw muihnaw kya hoyleinaw kha a rae.

²⁰ Jerusalem te Judah nynh Bawipaw kha myaryamaw a thinriasah hae zah, aning nynh minmin kha a muihnaw kyate ccaring a dee hae. Zedekiah nynh Babilon siapharan kha a dou.