2 SIAPHARAN 1 - Zotung Bible 2016

Elijah te Ahaziah

¹ Ahab a chih koute Moab nynh Israel kha a dou.

² Ahaziah tuh Samaria khua kya a inn palung khaan thanlan-aw kyate ccah zah maw a mue; tukeiccuze locceihtu hae kha saw hae zah, “Ekron khua e pachia Baal-zebub kalan la cceih oh lah, e vaemaw kyate ka danthui cih tou, ka danthui lan khyh tou cipaw kha la khia oh,” a cipya hae.

³ Thuasalama Bawipaw vaawpaw nynh Tishbe khuapaw Elijah kha, “Thokuh lah, Samaria siapharan a locceihtu hae te tungku khylan la cceih lah, minmin kha, ‘Israel ram kya Pachia a um khyh keiccu tou, Ekron khua pachia Baal-zebub kalan byakhia khylan nae ccia oh?’ cite la hopah hae.

⁴ Tukeiccuze Bawipaw nynh hynhte a ho, ‘Na kaenaw ikhung kyate na rung vae lan khyh, na chih ccaccing cih,’ a ci cite la ho,” a cipya. Tukeiccuze Elijah tuh a cceih.

⁵ Locceihtu hae tuh siapharan kalan ki hae zah, aning nynh minmin kha, “Pawccemou nae ki oh?” a cipya hae.

⁶ Minmin nynh, “Kaening te tungku khylan ccungccapaw lu kheit yn cceih zah, aning nynh kaening kha, ‘Nanning ae saw oh paw siapharan kalan la ki oh lah, la hopah oh: Bawipaw nynh hynhte a ho: Israel ram kya Pachia a um khyh keiccu tou, Ekron khua pachia Baal-zebub kha byakhia khylan nang nynh nae saw hae? Tukeiccuze na kaenaw ikhung kyate na rung vae lan khyh, na chih ccaccing cih,’ a ci cite la hopah oh, oun cipya,” cite a hopya hae.

⁷ Siapharan nynh minmin kha, “Nanning te tungku khylan yn cceih zah, tuhcite ae hopah oh paw tuh pawcihawpaw ccungccaw mou athua?” cite a khia hae.

⁸ Minmin nynh, “A mingrungpaw ccungccaw, a tae kya saphua taeccia a cciakuhpaw nynh thua,” cite a khung hae. Siapharan nynh, “Tishbe khuapaw Elijah latu athua,” a ci.

⁹ Tetuh siapharan nynh ccungccaw sung pangaw uktu rhawbawipaw kha a ccungccaw hae sung pangaw ryte Elijah kalan a saw. Rhawbawipaw tuh mua dung kya a haungpaw Elijah kalan kaethung zah, “Pou Pachia ccungccapaw, siapharan nynh, ‘Yn rungbung sah,’ ae ci,” cite a hopya.

¹⁰ Elijah nynh ccungccaw sung pangaw uktu rhawbawipaw kha, “Kae tuh Pachia ccungccapaw ka thua lanze, vaawlang te maee yn ccahbung sah lah, nang te na ccungccaw hae sung pangaw kha ae u oh sah,” a cipya. Te vaawlang te maee yn ccahbung zah, amaw te a ccungccaw hae sung pangaw kha a u hae.

¹¹ Siapharan nynh ccungccaw sung pangaw uktu ccangpaw rhawbawipaw kha a ccungccaw hae sung pangaw ryte bua a saw. Tuh-e rhawbawipaw nynh kaethung zah Elijah kha, “Pou Pachia ccungccapaw, e hynh siapharan nynh kaw a thopaw nynh thua: Arangte yn rungbung!” a cipya.

¹² Elijah nynh, “Kae tuh Pachia ccungccapaw ka thua lanze, vaawlang te maee yn ccahbung sah lah, nang te na ccungccaw hae sung pangaw kha ae u oh sah,” a cipya hae. Tetuh Pachia maee tuh vaawlang te yn ccahbung zah amaw te a ccungccaw hae sung pangaw kha a u hae.

¹³ Siapharan nynh ccungccaw sung pangaw uktu lu thumnaw rhawbawipaw kha a ccungccaw hae sung pangaw ryte bua a saw. Tukeiccuze ccungccaw sung pangaw uktu lu thumnaw rhawbawipaw tuh cceihthung zah Elijah malang khe a ccukharutung zah, “Pou Pachia ccungccapaw, ka hiinnaw te na ryalahtu hynh-e sung pangaw hae hiinnaw hynh namaw malang aphutepaw beih thua hae sah.

¹⁴ Dotua, vaawlang te maee yn ccahbung zah ccungccaw sung pangaw uktu rhawbawi hae lu ning te mih ccungccaw hae sung pangaw cci kha a u hae; thuasalama atu tuh ka hiinnaw hynh na muihnaw kya aphutepaw beih thua sah,” cite a ngiaku.

¹⁵ Bawipaw vaawpaw nynh Elijah kha, “Amaw ryte cceihbung oh; aning kha rih nan,” a cipya. Tukeiccuze Elijah tuh thokuh zah amaw ryte siapharan kalan cceihbung hae zah,

¹⁶ aning nynh siapharan kha, “Bawipaw nynh hynhte a ho: Nang nynh Ekron khua pachia Baal-zebub kha byakhia khylan locceihtu hae kha na saw hae keiccuze—tuh-e tuh Israel ram kya byakhia lanpaw Pachia a um khyh keiccu tou?—tukeiccuze na kaenaw ikhung kyate na rung vae lan khyh, na chih ccaccing cih, a ci,” cite a hopya.

Ahaziah Chinaw

¹⁷ Tuhcite Elijah nynh a hopaw Bawipaw bya thyhte Ahaziah tuh a chih. Aning tuh ccapaw a hoi khyh keiccuze Judah siapharan Jehoshafat ccapaw Jehoram nynh siapharan lang a tangnaw kum ningnaw kum khe a neitawpaw Jehoram tuh amaw ccelang siapharan lang a tang.

¹⁸ Tuhlaepaw Ahaziah nynh rya a lawpaw te a cyipaw kha Israel Siapharan hae Sherianaw Ccauh kya a zei hae.