2 SAMUEL 9 - Zotung Bible 2016

David nynh Mefibosheth Thaw A Cci

¹ David nynh, “Jonathan keiccuze a tungvaw kya thawccinaw ka langsaku nawlan, Saul innbyn kya a hiinhypaw lu kheit san a um ung tou?” cite a khia.

² Saul innbyn kya-e ryalahtu lu kheit, a min Ziba cikuhpaw um zah David kalan a ko hae. Siapharan nynh, “Nang hynh Ziba na thua tou?” cite a khia. Ziba nynh, “Na ryalahtu kae tuh Ziba nynh ka thua!” a cipya.

³ Siapharan nynh, “Pachia thawccinaw tuh a tungvaw kya ka langsaku nawlan, Saul innbyn kya a hiinhypaw lu kheit san a um ung tou?” a cipya. Ziba nynh siapharan kha, “Janathan ccapaw lu kheit a um ung; aning tuh a ccu akhou,” a cipya.

⁴ Siapharan nynh, “Aning tuh teimou a um?” cite khia zah, Ziba nynh siapharan kha, “Aning tuh Lodebar khua, Ammiel ccapaw Makhir inn kya nynh a um,” a cipya.

⁵ David Siapharan nynh ccungccaw saw zah Lodebar khua, Ammiel ccapaw Makhir inn kya-e amaw kha a kosah hae.

⁶ Saul ccapaw Jonathan a ccapaw Mefibosheth tuh David kalan yn thua zah bakhungte sawtuanaw a pya. David nynh, “Mefibosheth!” cite ko zah, aning nynh, “Na ryalahtu mang ka um,” cite a khung.

⁷ David nynh amaw kha, “Rih nan, pawccecize na paaw Jonathan keiccuze na tungvaw thawccinaw kae langsapakuh cih; na minpaaw Saul laephi balyn kha kae kii cih zah, ka ccaboi kya zungzae na ae cih,” a cipya.

⁸ Aning nynh sawtuanaw pya zah, “Kae tahawpaw ui chihpaw hynh nang nynh do lan ciate, na ryalahtu hynh pawmou ka thua?” a cipya.

⁹ Tetuh siapharan nynh Saul a ryalahtupaw Ziba kha ko zah, “Saul uccaw balyn te a innbyn hae kya-e balyn kha na bawipaw a mintawpaw kalan ka pya vae.

¹⁰ Nang te na ccapaw hae te na ryalahtu hae nynh aning hanlan loo na phopah cih oh zah, na bawipaw a mintawpaw nynh a ae lanpaw looh kha na thuakhaepah cih oh; thuasalama na bawipaw a mintawpaw Mefibosheth tuh ka ccaboi kya zungzae a ae cih,” a cipya. Ziba tuh ccapaw lu haw lae pangaw te ryalahtu lu kuin a hoi.

¹¹ Ziba nynh siapharan kha, “Siapharan ka bawipaw nynh a ryalahtu kya kaw yn pya thyhte, na ryalahtu kae nynh ka cyih cih,” a cipya. Mefibosheth tuh siapharan ccapaw lu kheit hawte David ccaboi kya looh a ae.

¹² Mefibosheth nynh Mika cikuhpaw ccapaw taraw lu kheit a hoi. Ziba inn kya um hae paw balyn tuh Mefibosheth ryalahtu lang a tang hae.

¹³ Mefibosheth tuh Jerusalem kya a um; pawccecize siapharan ccaboi kya looh zungzae a ae. Aning tuh a ccu voi ning mawte akhou.