2 SAMUEL 8 - Zotung Bible 2016

David nynh A Taepaw Rhawtuknaw hae

¹ Tukoute David nynh Filistin hae kha tuk hae zah a tae hae; David nynh Filistin hae kuih kya umpaw Metheg-ammah khua kha a law.

² Moab hae kha tae hae zah, laekhu kya luesahte arui te a tou hae, arui ruining kha chia lan tou hae zah ruikheit kha haang lan a tou hae. Te Moab hae tuh David rya a lahtu lang tang hae zah ngunto a pya hae.

³ Zobah siapharan, Rehob ccapaw Hadadezer nynh Zufrates vaw pepan e ram hae kha lawthui khylan a ccia lyakhe David nynh amaw kha a chia.

⁴ David nynh aning kyate marang rhawkaw thong kheit za sari te ccu rhawkaw thong kuin kha a kyng hae. David nynh marangle a suepaw marang hae balyn kha a chia hae, thuasalama marangle za kheit hanlan phe azaw lante a haang bang hae.

⁵ Damaskas khua e Siria hae nynh Zobah siapharan Hadadezer kha bawm khylan he oun cceih hae tuh, David nynh Siria hae kha thong kuin lae ning a chia hae.

⁶ David nynh Damaskas khua e Siria hae kyakhe rhawviatu hae kha a nung hae; Siria hae tuh David rya a lahtu lang tang hae zah ngunto a pya hae. Bawipaw nynh David kha a ccianaw takyh kya taenaw a pya.

⁷ Hadadezer a ryalahtu hae nynh a ccyng hae paw sui khawriaphua hae kha David nynh lah zah Jerusalem lang a phu.

⁸ Hadadezer kya-e khua hae Betah te Berothai kyate sohin patae kha David nynh a law.

⁹ Hadadezer a rhawkaw hae balyn kha David nynh a tae vae cipaw Hamath siapharan Toi nynh he a thae te,

¹⁰ David nynh Hadadezer kha tuk zah a tae keiccuze byabeih khylan te lungtuakhae khylan David Siapharan kalan khe a ccapaw Joram kha a saw; Hadadezer nynh Toi kha atu te atu rhaw a tuk. Joram nynh ngun, sui, sohin te raekuhpaw uccaw hae kha a ccyngpya;

¹¹ tuh-e uccaw hae kha mah David Siapharan nynh Bawipaw kalan a pya; aning nynh a taepaw minphuin hae balyn kyate a lawpaw ngun te sui ryte pynkheihlan a pya;

¹² tuh-e sui te ngun hae tuh Edom ram, Moab ram, Ammon ram, Ammon hae, Filistin hae, Amalek ram kyate a lawpaw te Zobah siapharan Rehob ccapaw Hadadezer kyate a luadepaw nynh athua hae.

¹³ David tuh a min myarya thaan. He yn ki te, Edom hae thong haw lae tarya kha Loi Accya kya a chia hae.

¹⁴ Edom ram kya rhawviatu hae kha a nung hae; Edom ram balyn phe lekuh lan rhawviatu hae kha nung hae zah Edom hae balyn tuh David ryalahtu lang a tang hae. Bawipaw nynh David kha a ccianaw takyh kya taenaw a pya.

David Kuihkaw e Bawi hae

¹⁵ Tuhcite David nynh Israel ram pynpi kha a uk; David nynh a ccungccaw hae balyn kha byading te ngingnaw te a uk hae.

¹⁶ Zeruiah ccapaw Joab tuh rhawkaw hae a uktu rhawbawi thua zah Ahilud ccapaw Jehoshafat tuh ccazing kyngtu nynh thua;

¹⁷ Ahitub ccapaw Zadok te Abiathar ccapaw Ahimelek tuh ranpibawi hae thua hae zah, Seraiah tuh ryaccinkhan nynh thua;

¹⁸ Jehoiada ccapaw Benaiah nynh Khereth hae te Peleth hae kha a uk hae; David ccapaw hae tuh ranpibawi hae nynh thua hae.