2 SAMUEL 3 - Zotung Bible 2016

David te Abner

¹ Saul innbyn te David innbyn hae tuh khaw cia rhaw a tukkuh vae hae; David tuh houhouh a thawsae thung zah, Saul innbyn tuh a thaw houhouh zyabung.

² David nynh Hebron khua kya a saah hae paw ccapaw hae tuh: a ccatawccaw tuh Jezreel khuanung Ahinoam kya a saahpaw Amnon nynh thua,

³ lu ningnaw tuh Karmel khuapaw Nabal nynh a chitawpaw nomaenung Abigail kya a saahpaw Khileab nynh thua; lu thumnaw tuh Geshur siapharan Talmai ccanung Maakah a ccapaw Absalom nynh thua;

⁴ lu palinaw tuh Haggith ccapaw Adonijah nynh thua; lu pangawnaw tuh Abital ccapaw Shefatiah nynh thua;

⁵ lu taruhnaw tuh David zu Eglah kya a saahpaw Ithream nynh thua. E hae hynh David nynh Hebron khua kya a saah hae.

⁶ Saul innbyn te David innbyn hae rhaw a tukku lya hae khe, Abner nynh amaw te amaw kha Saul innbyn kalan te a thaw a saesaku.

⁷ Saul nynh Aiah ccanung Rizpah kha a lovae lang a hoiku. Ishbaal nynh Abner kha, “Pawccemou ka paaw lovaenung kha na ikhae?” a cipya.

⁸ Ishbaal bya keiccuze Abner tuh myarya a thinria zah, “Kae tuh Judah hae ui lu tou ka thua? Atunin cia na paaw Saul innbyn te a uno hae te a ruiban hae tungvaw kya lungzinaw ka hoi zah, nang kha David kuih kalan kae pya khyh; tuhzemah atu vae tuh nang nynh hynh-e nopinung te nae ruphuh.

^9-10 Peenaw kha Saul ciihan kyate ccaring lawte David a bawitungkhung tuh Israel ram te Judah ram kya, Dan khua kyate Beersheba khua kyacia tynsah khylan, Bawipaw nynh David kya bya a kinpyakupaw kha ka ccingsahpah cih, Pachia nynh Abner tungvaw kya tuhcite cyih sah lah, tuhlaeze mah cyichih vae sah,” a ci.

¹¹ Ishbaal nynh Abner kha a ri keiccuze ccangpaw bya kaw kheit sanmah khung kho khyh.

¹² Abner nynh David kalan Hebron khua langkhe locceihtu hae kha saw hae zah, “Ram hynh hum kya-e mou athua? Kae te byakinnaw rae lah, Israel hae balyn hynh na kalan pybia lan kae bawm cih,” cite bya a taw.

¹³ David nynh, “Ahoy, nang te byakinnaw ka rae cih. Thuasalama kae ngia rypaw ccangkheit a um: kae kha muih khylan he nae cceih te, Saul ccanung Mikhal kha nae thuakhae khyh zetuh, ka malang nae langkuh lan khyh,” a cipya.

¹⁴ David nynh Saul ccapaw Ishbaal kalan locceihtu hae kha saw hae zah, “Filistin hae vingdung za kheit kha mee lang ka syanuathepaw ka zu Mikhal kha yn pya,” cite bya a taw.

¹⁵ Ishbaal nynh ccungccaw sawte tuh-e nopinung tuh Laish ccapaw a vawpaw Paltiel kyate a kosah hae.

¹⁶ A vawpaw tuh a nulang te Bahurim khua kyacia rawkhuite a zuikuh. Abner nynh Patiel kha, “Inn lang la ki ccavae!” cipah zah a ki vae.

¹⁷ Abner nynh Israel piccan hae kalan khe, “Anuhlang lya mawte David kha nae siapharan lang na ry vae oh.

¹⁸ Atu tuh ccingsah ccavae oh; pawccecize Bawipaw nynh David kha byakinpakuh zah: Ka ryalahtu David kha mangte ka ccungccaw Israel hae kha Filistin hae kuih kyate thuasah, mih rhaw hae balyn kyate thuasah ka khum cih hae,” a ci.

¹⁹ Abner nynh Benjamin phin hae kha mah a hopya hae; te Israel hae te Benjamin ciihan hae balyn nynh cyi lan a ry hae paw balyn kha Hebron khua kya David kha hopya khylan Abner tuh a cceih.

²⁰ Abner nynh ccungccaw hae lu kuin ryte Hebron khua, David kya he a thua hae tuh, David nynh Abner te a kya um hae paw elang looh-aenaw poi a tuapya hae.

²¹ Abner nynh David kha, “Israel hae balyn nynh nang te byakinnaw a rae nawlan hae thuasah, na lung nynh a ry hawte na uk nawlan hae thuasah ka la cceih sah lah, mih balynte siapharan ka bawipaw kalan kae suelua cih hae,” a cipya. Tukeiccuze David nynh Abner kha cciasah zah lungdaete a cceih vae.

Joab nynh Abner A Chia

²² Sosoh koute Joab te David a ryalahtu hae tuh rhaw a thiingnaw hae kyate oun thua hae zah luadepaw uccaw patae kha oun phubia hae. Thuasalama Abner tuh Hebron khua kya David ryte umkheih khyh hae, pawccecize David nynh cciasah zah aning tuh lungdaete phe a cceih vae.

²³ Joab te a kya umpaw rhawkaw hae balyn he oun thua hae te, Joab kyakhe, “Ner ccapaw Abner tuh siapharan kalan yn thua zah, aning nynh cciasah zah lungdaete phe cceih vae,” cite a hopya hae.

²⁴ Tetuh Joab nynh siapharan kalan cceih zah, “Pawmou phe na la cyi vae? Abner tuh na kalan yn thua zah a lue ccaw cite pawccemou na cciasah?

²⁵ Ner ccapaw Abner tuh nang kha ling khylan te na tee na pounaw te na cyipaw balyn kha ny khylan nynh yn thua cipaw phe na ny,” a cipya.

²⁶ David kyate a pou koute, Joab nynh Abner nulang te locceihtu hae kha saw hae zah, Sirah tuisung kyate phe a kikhae hae; tuh-e konglang tuh David nynh nyh khyh.

²⁷ Abner tuh Hebron lang he a ki te, Joab nynh byarupaw hoku khylan koikua pe lang cciakhae zah, tuin kyakhe a vue kha a thuing. Tuhcite Joab a neitaw Asahel chiise a luapaw hanlan Abner tuh a chih.

²⁸ Nyalangte, David nynh tuh-e tuh he a thae te, “Ner ccapaw Abner chiise hanlan kae te ka peenaw tuh Bawipaw malang kae cyiseinaw papin um khyh.

²⁹ Tuh-e cyiseinaw tuh Joab lu vawlan te a puizia hae balyn lu vawlan khe ccah vae sah; te Joab a puizia hae kya anae poupaw, vaethyakaepaw, a kekypaw, thaloi te chihpaw, a kanmawpaw thouh boi nan sah!” a ci.

³⁰ Tuhcite Joab te a neitaw Abishai nynh Abner kha a chia hae, pawccecize Gibeon khua rhawtuknaw kyakhe Abner nynh mih neitaw Asahel kha a la chia.

³¹ David nynh Joab te a kya um hae paw balyn kha, “Nae boeining kha seii oh lah, buriboei kha zingkuh oh, te Abner hanlan rah oh,” a cipya hae. David siapharan nynh michi rhua-thingkua kha a zui.

³² Abner kha Hebron kya a uu hae. Siapharan nynh Abner shawku kya thawte a roisaw zah a rah, ccungccaw balyn mah a rah hae.

³³ Siapharan nynh Abner hanlan rawnaw hlawsah zah, “Abner tuh mingaee a chi hawte tou a chih cih?

³⁴ Na kuih kha khi thua khyh zah, na ccu kha khinawpaw arui te khii thua khyh; ccungccaw hoyleipaw malang a khuliakuhpaw hawte na khuliakuh vae,” a ci. Te ccungccaw balyn tuh aning elang bua a rah hae.

³⁵ Khua azi mawkhe David nynh looh a ae nawlan ccungccaw balyn nynh a soihbia hae; thuasalama David nynh byakinkuh zah, “Khuanin accaw maw kya sanlou thuasah, ccangpaw hankhakheit thuasah ka taangtua lanze, Pachia nynh ka tungvaw kya tuh-e ciate thuasah, tuhlaeze alung lante mah thuasah cyih vae sah!” a ci.

³⁶ Ccungccaw hae balyn nynh tuh-e tuh muih hae zah mih lungtua; siapharan nynh a cyipaw miakaw kha ccungccaw balyn nynh mih lungrythua.

³⁷ Tukeiccuze Ner ccapaw Abner chianaw kya siapharan panbua khyh cipaw kha tuin nin khe ccungccaw balyn te Israel hae balyn nynh a thaethya hae.

³⁸ Te siapharan nynh a ryalahtu hae kyakhe, “Israel hae kyaze bawi lu kheit athuapaw alesaepaw ccungccaw lu kheit tuh atunin a chih vae cipaw na nyh khyh oh tou?

³⁹ Siapharan lang chitui thuh ka thua zemah atunin kya ka thawzya. E Zeruiah ccapaw hae hynh ka hanlan myaryamaw a puatho hae. Bawipaw nynh hoyleinaw a raetupaw kha a hoyleinaw thyhte a liaru!” a cipya hae.