2 SAMUEL 22 - Zotung Bible 2016

David A Lungtuanaw Hlaw

¹ Bawipaw nynh David kha a rhaw hae balyn kuih kyate thuasah, Saul kuih kyate thuasah a luesah nin khe, aning nynh e hlaw hynh Bawipaw kalan a sah.

² David nynh: Bawipaw tuh ka lungpi, ka rhawlungrua te yn luesahtu,

³ Ka Pachia, ka khynnaw lungpi, ka khynnawpaw ka khawriaphua te yn khumpaw saki, ka rhawhohung te ka khynnaw, ka khumtu nynh thua; yn rawsetu hae kyate nae khum.

⁴ Thehoysah lan angaekuhpaw Bawipaw kha ka ko zah, ka rhaw hae kyate khum ka thua.

⁵ Pawccecize chinaw tuileih nynh yn koihlu, ronaw tuithaw nynh yn luathin.

⁶ Chinaw arui nynh phang yn khethinku; chinaw kaang nynh phang yn kaesah.

⁷ Ka vawsaw lyakhe Bawipaw kha ka ko; ka Pachia kha ka ko. A beikinn kyate ka roi kha yn thaepah zah, ka sianaw tuh a nakaring kya phe a thua.

⁸ Pachia a thinria keiccuze laephi tuh hy zah a thyngkuh; vaawlui leihpaw hae mah thyngkuh hae zah a hy hae.

⁹ A naduh kyate maekhuh pouthung zah, a khalang kyate aruapaw maeesoi te zaezae epaw maeehue apou.

¹⁰ Vaawlui kha nesah bung zah yn rungbung; marae zipingpaw mohnaw tuh a ccu kaw kya a um.

¹¹ Cherubim kha ccikuh zah a zou; khivae sake vawlan khe amaw kha a muih hae.

¹² Mohnaw athuapaw maeking thaawkalaepaw te tui apumkuhpaw kha a pepan po voilu lan bongnawpaw lang a rae.

¹³ A malang e phaephae akpaw kyate maeehue tuh zaezae a e.

¹⁴ Bawipaw mah vaawlui khe kholung lang thyh zah, Ahang Huaccepaw nynh a roi a saw.

¹⁵ Te a the kha kaw zah, rhaw hae kha a phiasaku hae; ria he a kawsah tuh, phiariphiarae a ccue vae hae.

¹⁶ Bawipaw nynh pe hae zah, a naduh kyate hy he a saw tuh, rilipi kaw phe lang zah, laephi aleihpaw mah phe alang.

¹⁷ Bawipaw nynh ahangnaw kyate yn dyngnuakuh zah yn hoeilang; myarya khupaw tui lungkhu kyate po yn sue.

¹⁸ Athungpaw ka rhaw hae kyate thuasah, kae yn hua hae paw kyate thuasah yn luesah; pawccecize minmin tuh ka hanlan myaryamaw a thung hae.

¹⁹ Minmin nynh ka vawsaw ccyh lyakhe yn thuanua hae, thuasalama Bawipaw tuh yn bawmtu nynh thua.

²⁰ Akopaw hmin kalan yn cciakhae; Ka tungvaw a lungrythua keiccuze yn luesah.

²¹ Bawipaw nynh ka dingnaw thyhte lasung yn pya; ka kuih a thyaa thyhte yn pyaru.

²² Pawccecize Bawipaw laanpi kha ka zui zah, seinaw raete ka Pachia kyate ka phiakuh khyh.

²³ Pawccecize a phungzae hae balyn kha ka zui zah, a phungbya hae kha ka vua khyh.

²⁴ A malang ccaenaw um leipaw ka thua zah, hoyleinaw kha ka sibia.

²⁵ Tukeiccuze Bawipaw nynh ka dingnaw thyhte thuasah, a muihnaw kya ka thyaa thyhte thuasah yn pyaru vae.

²⁶ A lungzipaw tungvaw kya lungzinaw kha na langsaku, ccaenaw a um leipaw kya ccae lan um leinaw kha na langsaku.

²⁷ Athyaapaw ccungccaw kya thyaanaw kha na langsaku; ccungccaw hoyleipaw kya rawsenaw kha na langsah.

²⁸ Zakaw a sangsakuhpaw ccungccaw kha na khum, thuasalama lysakunaw mitdae a dae hae paw kha na biabung hae.

²⁹ Pou Bawipaw , nang tuh ka maeekhua nynh na thua ccaccing; Bawipaw nynh ka mohnaw kha a awsah.

³⁰ Namaw liate ka rhaw hae kha ka ro kho hae, ka Pachia liate khualungrua kha po ka zou kho.

³¹ E Pachia tuh a laanpi phe accing; Bawipaw byakinpyakunaw nynh ahmepaw kha ccaekia akhan; Aning tuh amaw kya a rekuh hae paw balyn hanlan khawriaphua nynh thua.

³² Bawipaw laelan hummou Pachia athua? aening Pachia laelan hummou lungpi athua?

³³ Pachia nynh thawzung kha ka tae kya yn khiidepah zah, ka laanpi kha ako lante yn hungpya.

³⁴ Ka ccu kha sazuh ccu hawte a liazawsah zah, ahangnaw khe khyndadyh lan yn nung.

³⁵ Ka kuihbaw nynh sohin li kha a sue kho nawlan, ka kuih kha rhawtuk nawlan yn ccangpya.

³⁶ Na khumnaw khawriaphua kha nae pya vae zah, nae bawmnaw nynh yn lesaesah vae.

³⁷ Ka ccianaw laanpi kha nae kosahpah zah, ka ccu tuh thei khyh.

³⁸ Ka rhaw hae kha ka deehui hae zah ka ro hae; ka maemih makhia hae ka kitaw khyh hae.

³⁹ Minmin kha ka maemih hae; a thokuh kho lei lan hae, ka bua hae zah, ka ccu kaw kya a khuliakuh hae.

⁴⁰ Pawccecize rhawtuknaw hanlan thawzung kha ka tae kya nae khiidepya; ka rhaw hae kha ka zakaw khe na bakhungsah hae.

⁴¹ Ka rhaw hae kha ka kyate na maeleihsakuh hae zah, kae yn hua hae paw kha ka ro hae.

⁴² A do hae zemah minmin a khum lan hae paw humhung mah um khyh; Bawipaw kalan a sia hae zemah khungru khyh hae.

⁴³ Vuiping hawte phe khui lan ka miade hae; laanpi kya-e tuiccua hawte, ka syde hae.

⁴⁴ Ccungccaw hae ryte rhawkunaw kyate nae luesah; minphuin hae lu lang nae nung; ka ny boi leipaw ccungccaw hae nynh rya oun lawpya hae.

⁴⁵ Ramccang hae tuh bohkute ka kalan oun cceih hae; ka bya he a thae takaw hae te, ka kaw a ngae hae.

⁴⁶ Ramccang hae tuh mih thawthah zah, mih rhawlungrua lungkhu te thyngkute oun pou hae.

⁴⁷ Bawipaw tuh a hiin! Ka lungpi tuh thehoyte um sah, Yn khumtu lungpi athuapaw ka Pachia tuh hangthungte um sah.

⁴⁸ Pachia tuh phulawrunaw yn pyatu thua zah, ccungccaw hae kha ka zakaw a sangsahtu hae nynh thua;

⁴⁹ ka rhaw hae kyate poh yn thuaatu nynh thua; yn rawsetu hae luki lang nae hangthung; a puathopaw ccungccaw hae kyate nae luesah.

⁵⁰ Tukeiccuze, pou Bawipaw , minphuin hae laku kya kae thehoysah cih zah, na min thehoysahnaw hlaw kha ka sah cih.

⁵¹ Pachia nynh amaw a khangpaw siapharan kha taenaw lepaw a pya; chitui a thuhpaw David te a ciihan hae kya atynpaw sungsahnaw kha zungzae a langsahpya hae.