1 TIMOTE 4 - Zotung Bible 2016

Ahme Leipaw ccangpahtu hae

¹ Nyalang ccyh kya ccungccaw abang nynh lingthyapaw muisaw hae te raerangsaro hae ccangpyanaw kha oun ngae cih hae zah zynnaw kha oun vua cih hae cite Muisaw nynh ccaerarih lan a ho.

² Tuh-e ccangpyanaw tuh mimaw nykunaw thinlung kha zaezae linpaw sivaw te pingsah athua hae paw mihyn hae kya-e thyaruhnaw kyate nynh a mue hae.

³ Minmin nynh zuvaw tangnaw kha a khee hae, byaccing kha nyte a zyn hae paw nynh lungtuabya hote ae lan cite Pachia nynh a raepaw looh hae kha sung lan kaw a pya hae.

⁴ Pawccecize Pachia nynh a raepaw miakaw tuh marya ahoy; lungtuabya hote lawku lanze pawpaw mah sung lanpaw um khyh.

⁵ Pawccecize pawpaw balyn tuh Pachia bya liate thuasah, sawsangnaw liate thuasah thyaasah athua.

Khri kya-e Ryalahtu Hoypaw

⁶ E ccangpyanaw hae hynh nang nynh uteno hae kha na hopya hae ze, nang tuh Khri Jesu ryalahtu hoypaw na thua cih zah, na zui vae paw zynnaw te ahoypaw ccangpyanaw kya-e bya hae khate kua na thua cih.

⁷ Thuasalama Pachia te asekuh leipaw phungpaw huataw hae kha vua lah, Pachia te asekuhpaw hiinnaw kya hiin lan la ccangkuh.

⁸ Pawccecize pynsaw te asekuhpaw ccangkupaw tuh ccapyh nynh athane, thuasalama Pachia te asekuhpaw hiinnaw tuh pawpaw balyn kya athane, pawccecize tuh-e tuh atu e hiinshe te yn thua cih paw hiinshe hanlan athane cih cite byakinkunaw a um.

⁹ Tuh-e tuh ahmepaw bya thua zah khaleih lawku lan accanpaw bya nynh thua.

¹⁰ Tuh-e thanenaw hanlan aening tuh thawbang zuakute rya ah lah oh; pawccecize aening tuh ccungccaw balyn hanlan, abyapi lante zyntu hae hanlan Khumtu athuapaw, a hiinpaw Pachia kyakhe ngaehoinaw ah hoi oh.

¹¹ E uccaw hae kong hynh tynkaring lan hopah hae lah la ccangpah hae.

¹² Na kum ano keiccuze hum nynh san ae la dothatheih nan sah; thuasalama nang tuh bya kya, ozia kya, sungsakunaw kya, zynnaw kya te thyaapapingnaw kya zyntu hae nynh dosuinkupaw la thua.

¹³ Kamaw kae thua makhia ccungccaw hae kya Ccathyaa riapyanaw, phunghonaw te ccangpyanaw kha pekite la rae.

¹⁴ Khriccaawbuu pastor hae nynh na tungvaw mih kuih a khan lya hae ze, profehbya liate phypya na thua zah na muepaw muisaw lasung kha pawlangria leite la um nan.

¹⁵ Ccungccaw balyn nynh na kaethungnaw kha a muih ccaw hae, e uccaw hae hynh palei la tua lah, thawte la zuakuh.

¹⁶ Namaw te namaw thuasah, na ccangpyanaw kya thuasah raeringkuh lah, tuh-e ccangpyanaw kya po la tyn; pawccecize tuhcite na cyinaw liate namaw kha thuasah, na hopaw a thaetu hae kha thuasah parouhte na khum cih hae.