1 SIAPHARAN 5 - Zotung Bible 2016

Beikinn Sak lan Paccynkunaw

¹ Solomon kha a paaw ccelang siapharan lang chitui a thuh vae hae cipaw kha Tair siapharan Hiram nynh he a thae tuh, a ryalahtu hae kha a kalan a saw hae; pawccecize Hiram tuh David a banpaw lang po a tangpaw nynh thua.

² Solomon nynh Hiram kha byataw zah,

³ “Ka paaw David tuh a rhaw hae nynh po voilu lante a tuk hae keiccuze, Bawipaw nynh a rhaw hae tuh a ccuphe kaw a nung mawlaezung hae, Bawipaw a Pachia min hanlan inn kha sak kho khyh cipaw phe na ny.

⁴ Thuasalama atu tuh Bawipaw ka Pachia nynh pawpaw kya balyn haeungnaw yn pya vae zah, rawsenaw thuasah, vethyanaw thuasah um khyh.

⁵ Tukeiccuze Bawipaw nynh ka paaw David kha, ‘Namaw ccelang na bawitungkhung kya ka nung cih paw na ccapaw nynh ka min hanlan inn kha a sak cih,’ cite a hopya thyhte, Bawipaw ka Pachia min hanlan inn sak lan ka paccynkuh.

⁶ Tukeiccuze kamaw elang Lebanon mua e sidar thing kha nge khylan kawpya hae. Ka ryalahtu hae nynh na ryalahtu hae kha a bawm cih hae zah, nang nynh na ryalahtu hae hanlan ryalaw mee na khya thyhte kae pya cih; pawccecize Sidon hae hawte thing nge athyapaw kaening kya humhung mah um khyh cipaw na ny,” a cipya.

⁷ Hiram nynh Solomon bya kha he a thae tuh, myarya a lungtua zah, “E minphuin pi a uktu lang David kha ccapaw ahawpaw a pyatupaw Bawipaw tuh thehoyte um sah,” a ci.

⁸ Hiram nynh Solomon kha byataw zah, “Bya nae tawpaw kha ka thae vae; sidar thing te maeccaw thing kha na ry zeih kae ccingsahpah cih.

⁹ Ka ryalahtu hae nynh Lebanon mua kyate rili kalan a cciakhae bung cih hae; tuh-e thingtung hae kha phum lang ka rae cih zah, na paccynnaw hmin langkhe rili kyate a cciakhae cih hae, te tuin kyakhe ka phousah cih hae zah nang nynh na lawkuh cih; nang nynh ka innbyn hae kha looh pyate ka rynaw kha nae ccingsahpah cih,” a cipya.

¹⁰ Tuhcite Solomon nynh a rypaw miakaw sidar thing te maeccaw thing kha Hiram nynh a pya.

¹¹ Solomon nynh mah Hiram kha a innbyn hae elang aepaw chanvuih kor thong kuin te chitui hoypaw kor ccangkuin kha a pyaru. Solomon nynh Hiram kha tuh-e tuh kum takyh a pya.

¹² Bawipaw nynh bya a kinpyaku thyhte, Solomon kha hawnaw a pya. Hiram te Solomon laku kya daenaw um zah, mih lu ning te nawccawthungkunaw kha a rae hae.

¹³ Solomon Siapharan nynh Israel hae balyn kya-e ccungccaw thong sung thum kha nangsete ryalawnaw kya a nung hae;

¹⁴ Sawpaw sah kheit ze thong haw ccite palei rulaete Lebanon lang a saw hae; Lebanon kya sah kheit, innvaw sah ning leih a um hae; Adoniram tuh nangsete ryalawsahnaw kya a uktu nynh thua.

¹⁵ Solomon nynh phupaw ryalahtu thong sung sari te muaram kya lung-awtu thong sung tarya a hoi;

¹⁶ tuhpiaze, Solomon nynh ryalahtu hae a dopahtu ccungccaw thong thum za thum a hoi.

¹⁷ Siapharan nynh kaw a pya hae thyhte, inn aleihpaw kha cyithuipaw lung te rae khylan, alepaw lung te amee rupaw lung kha a khyh hae.

¹⁸ Tuhcite innsakthya hae paw Solomon ccungccaw hae, Hiram ccungccaw hae te Gebal khuaccaaw hae nynh beikinn sak nawlan lung hae te thing hae kha a paccyn hae.