1 SIAPHARAN 2 - Zotung Bible 2016

David nynh Solomon Thuiheisyanaw

¹ David tuh a chinaw ccyh nae vae zah a ccapaw Solomon kha byatawsya zah:

² “Laephi ccungccaw balyn nynh a ccianaw hae laanpi langkhe vyavya ka cceih vae cih. Na thawsae sah lah, na rawthung sah,

³ na cyipaw miakaw te na ccianaw miakaw kya na laan na sui a ua nawlan, Moses phungbya kya azeiku hawte, Bawipaw na Pachia nynh ae hopyapaw kha ngae lah, a laanpi kha zuite, a phunglang hae, a kawbya hae, a phungzae hae, ccaekia a khangkunaw hae kha zuitua.

⁴ Bawipaw nynh kamaw konglang ho zah: ‘Na ccapaw hae nynh mih thinlung balyn te, mih hiinnaw balyn te ka malang khe lungzinaw te ccia khylan, mih laanpi kha a raeringku hae zetuh, Israel bawitungkhung vawlan a haung cih paw na ciihan tuh dae lan khyh,’ a cipaw bya kha a tynsah cih.

⁵ “Tuhpiaze Zeruiah ccapaw Joab nynh ka tungvaw a cyipaw kha mah phe na ny: aning nynh Israel rhawkaw hae a uktu rhawbawi hae lu ning, Ner ccapaw Abner te Jether ccapaw Amasa kha a chia hae, rhawtuk lya chiise aluapaw hanlan kha rhaw adae ccyh lyakhe phulah hae zah, a tae kya-e taeccia kya te a ccu kya-e phanah kyakhe rhawtuk chiise kha a noi.

⁶ Tukeiccuze na hawnaw thyhte cyitua, thuasalama a sang apaw vae paw a lu kha Sheol khua lang daebabi lan cciasah nan.

⁷ Thuasalama Gilead ccungccaw Barzillai ccapaw hae kha tuh lungzinaw te ccuepe hae lah, na ccaboi kya looh ae hae paw kyakhe umbua hae sah; pawccecize na upaw Absalom kyate ka ccue lyaze minmin nynh tuhcihawpaw lungzinaw khate yn cciadue hae.

⁸ Mahanaim khua lang ka ccia nin ze, kae kha thawte thya yn lawpaw Benjamin ccungccaw Bahurim khuapaw Gera ccapaw Shimei kha mah a um; thuasalama kae te tungku khylan Jordan vaw lang he yn cceihbung tuh, ‘Nang kha thaloi te kae theih lan khyh,’ cite Bawipaw min phyate bya ka kinpyaku vae.

⁹ Tukeiccuze seinaw a hoi leipaw lang ria nan, pawccecize nang tuh a hawpaw nynh na thua; a tungvaw pawtemou cyi lan accan cipaw kha na nyh zah, a sang apaw vae paw a lu kha chiise te Sheol lang na cciasah cih,” a cipya.

David Chinaw

¹⁰ David tuh a minpaaw hae ryte ih zah David khua khe a uu hae.

¹¹ David nynh Israel ram kha kum sung pali a uk; Hebron kya kum sari uk zah Jerusalem kya sung thum kum thum a uk.

¹² Solomon tuh a paaw David kya-e bawitungkhung kya haung zah, a peenaw kha tynkaring lan a tynsah.

Solomon nynh A Peenaw A Tynsah

¹³ Te Haggith ccapaw Adonijah nynh Solomon nung Bathsheba kalan yn cceih. Bathsheba nynh, “Daenaw tetou nae thua?” a cipya. Aning nynh, “Daenaw te nynh kae thua,” a cipya.

¹⁴ Te aning nynh, “Na kya hopya lanpaw bya ka hoi,” a cipya. Bathsheba nynh, “Hotua,” a cipya.

¹⁵ Aning nynh, “Peenaw hynh kamaw kya-e thua zah, Israel hae balyn nynh ukku khylan yn ngaehoi hae paw kha na ny; tuhzemah peenaw tuh ka kuih kyate nuekuh zah, ka neitaw kuih kya a thua, pawccecize tuh-e tuh Bawipaw nynh a pyapaw nynh thua.

¹⁶ Te atu na kya ngiaku kae rypaw ccangkheit um zah, tuh-e tuh beih yn ei nan,” a cipya. Bathsheba nynh, “Hotua,” a cipya.

¹⁷ Aning nynh, “Solomon Siapharan kha beih yn ngiapya tua—nang tuh ae ei lan khyh—Shunam khuanung Abishag kha ka zu lang beih yn pya sah,” a cipya.

¹⁸ Bathsheba nynh, “Ahoy; namaw ccelang siapharan kha ka hopah cih,” a cipya.

¹⁹ Tukeiccuze Adonijah ccelang bya hopya khylan Bathsheba tuh Solomon Siapharan kalan a cceih. Siapharan nynh amaw kha tungku khylan thokuh zah a malang khe a bakhung; te a bawitungkhung kya haung zah siapharan a nung elang haungnaw lawsah hae zah a ranglang khe a haung.

²⁰ Te a nung nynh, “Ngia lanpaw adihpaw ccangkheit ka hoi; yn myapah nan,” a cipya. Te siapharan nynh, “Anung, yn ngiakuh; kae ei lan khyh,” a cipya.

²¹ A nung nynh, “Shunam khuanung Abishag kha na upaw Adonijah kalan a zu lang beih pya,” a cipya.

²² Solomon Siapharan nynh a nung kha, “Adonijah hanlan Shunam khuanung Abishag kha pawccemou nae ngia? Peenaw hynh mah aning elang ngiapya bia! Pawccecize aning tuh ka upaw nynh thua; aning elang kyalya ngia leite ranpibawi Abiathar te Zeruiah ccapaw Joab elang mah ngiabia!” a cipya.

²³ Solomon Siapharan nynh Bawipaw min phyate byakinkuh zah, “Adonijah nynh hynh-e a ngiapaw hanlan a hiinnaw kha a pya khyh zetuh, Pachia nynh ka tungvaw kya tuh-e ciate thuasah, tuhlaeze alung lante mah thuasah cyih vae sah.

²⁴ Tukeiccuze kae kha yn tynsah zah ka paaw David kya-e bawitungkhung kya yn nung zah bya a kinku hawte ka ciihan yn raepahtupaw Bawipaw tuh a hiin thyhte, atunin Adonijah tuh chia athua cih,” a ci.

²⁵ Tukeiccuze Solomon Siapharan nynh Jehoiada ccapaw Benaiah kha a saw; aning nynh Adonijah kha theih zah a chih.

²⁶ Siapharan nynh ranpibawi Abiathar kha, “Anathoth khua lang, na inn na loo lang la cceih; nang tuh chi lan atekuhpaw nynh na thua. Thuasalama Bawipaw PACHIA thingkua kha ka paaw malang na la puih keiccu thuasah, ka paaw nynh vawsawnaw a teingpaw miakaw kha na la teingkhae keiccu thuasah atu tuh kae theih lan khyh,” a cipya.

²⁷ Tukeiccuze Solomon nynh Abiathar tuh Bawipaw a ranpibawi ryalaw kyate a phua, tuhcite Bawipaw nynh Eli ciihan te asekuh lante Shiloh khua kya bya a la hopaw kha a ccingsah.

²⁸ Joab nynh Absalom kha a la bawm khyh zemah Adonijah kha tuh a la bawm keiccuze, tuh-e the kha he a thae tuh, Joab nynh Bawipaw bu kalan ccue zah, silawhang a ki hae kha phang a kyng hae.

²⁹ Solomon Siapharan kyakhe, “Joab tuh Bawipaw bu kalan ccue zah, atu silawhang pe phang um,” cite he a hopah hae tuh, Solomon nynh Jehoiada ccapaw Benaiah kha saw zah, “La cceih lah, Joab kha la theih,” a cipya.

³⁰ Tukeiccuze Benaiah tuh Bawipaw bu kalan cceih zah, Joab kyakhe, “Siapharan nynh, ‘Yn pou sah,’ ae ci,” a cipya. Joab nynh, “Ka pou lan khyh, e kya maw ka chih cih,” a ci. Te Benaiah nynh siapharan kalan khe bya kha cciakhae zah, “Joab nynh hynhte ho zah hynhte bya yn khung,” a cipya.

³¹ Siapharan nynh, “Amaw nynh a ho hawte la cyih, la theih lah, la uh; tuhcite akonglang um leite Joab nynh a luasahpaw chiise hanlan seinaw kha ka tungvaw te ka paaw ciihan kyate thyaasah tua.

³² Aning nynh amaw laeze dinghua hae zah a hoyhua hae paw lu ning, Ner ccapaw Abner, Israel rhawkaw hae a uktu rhawbawipaw te Jether ccapaw Amasa, Judah rhawkaw hae a uktu rhawbawipaw kha ka paaw David a ny lei lante, thaloi te chiise a luasahpaw cyisahnaw kha amaw lu vawlan khe Bawipaw nynh a ccawsah cih.

³³ Tuhcite tuh-e hae chiise tuh Joab lu vawlan te a ciihan hae lu vawlan khe zungzae accah thui cih; thuasalama David tungvaw te a ciihan hae tungvaw thuasah, a inn te a bawitungkhung kya thuasah Bawipaw kyate yn thuapaw daenaw tuh zungzae a um cih,” a ci.

³⁴ Te Jehoiada ccapaw Benaiah nynh cceihthung zah Joab kha a theih koute ramkaw e amaw a inn kyakhe a uu hae.

³⁵ Siapharan nynh Jehoiada ccapaw Benaiah kha Joab ccelang rhawkaw hae a uktu lang nung zah, ranpibawi Zadok kha Abiathar ccelang ranpibawi lang a nung.

³⁶ Te siapharan nynh Shimei kha kosah hae zah, “Jerusalem kya inn sakkuh lah, umbua; tuin khua kyate teitei lang mah pou nan.

³⁷ Pawccecize na pou zah Kidron vawkhu he na zua nin khe, na chih ccaccing cih cipaw kha nyku tua; na chiise tuh namaw lu vawlan accah cih,” a cipya.

³⁸ Shimei nynh siapharan kha, “Na hopaw tuh ahoy; siapharan ka bawipaw nynh na ho hawte, na ryalahtupaw nynh ka cyih cih,” a cipya. Tukeiccuze Shimei tuh Jerusalem kya khaw cia a um.

³⁹ Thuasalama kum thum he aro te, Shimei see hae lu ning tuh Gath siapharan Maakah ccapaw Akhish kalan a ccue hae. Shimei kha, “Gath khua kya na see hae a um hae,” cite he a hopah hae tuh,

⁴⁰ Shimei nynh thokuh zah lann kha khungnin a dekuh koute a see hae kha ccung khylan Gath khua lang Akhish kalan a cceih; Shimei nynh cceih zah Gath khua kyate a see hae kha a kikhae hae.

⁴¹ Shimei tuh Jerusalem kyate Gath lang cceih zah yn ki vae cite Solomon kha he a hopah hae tuh,

⁴² siapharan nynh Shimei kha kosah hae zah amaw kha, “Khua kyate na pou zah ccanglang na ccia nin kya na chih cih cipaw ccaerarih lan nykuh, cite Bawipaw min phyate bya kae kinsakuh zah, ccaerarih lan kae hopah khyh tou? Nang nynh kae kha, ‘Na hopaw tuh ahoy, ka nawccah,’ nae cipya.

⁴³ Te Bawipaw kalan bya na kinkupaw te kae nynh kae hopyapaw kawbya kha pawccemou na zui khyh?” a cipya.

⁴⁴ Siapharan nynh Shimei kha, “Ka paaw David tungvaw na cyipaw hoyleinaw balyn kha na thinlung kya phe na ny; tukeiccuze na hoyleinaw kha namaw lu vawlan Bawipaw nynh a ccawsah cih.

⁴⁵ Thuasalama Solomon Siapharan tuh hythuapya athua cih zah, David kya-e bawitungkhung tuh Bawipaw malang zungzae atyn cih,” a cipya.

⁴⁶ Te siapharan nynh Jehoiada ccapaw Benaiah kha kaw a pya; te Benaiah nynh cceih zah Shimei kha theih zah a chih. Tuhcite peenaw tuh Solomon kuih kya atyn.