1 SIAPHARAN 19 - Zotung Bible 2016

Jezebel kyate Elijah A Ccue

¹ Elijah nynh a cyipaw balyn te thaloi te profeh hae balyn a chiapaw kha Ahab nynh Jezebel kya marya a hopya.

² Te Jezebel nynh Elijah kalan khe locceihtu lu kheit saw zah, “Na hiinnaw kha awkhualan atu ccyh kya tuh-e profeh hae hiinnaw hawte ka cyi khyh lanze, pachia hae nynh ka tungvaw kya tuh-e ciate thuasah, tuhlaeze alung lante mah thuasah cyih vae hae sah,” a cipya.

³ Tetuh Elijah tuh a ri keiccuze thokuh zah a hiinnaw lue khylan Judah ram e Beersheba khua lang a ccue; tuin kyakhe a ryalahtupaw kha a cciatawsya.

⁴ Amaw tuh nin kheit laanccia ramkaw lang cceih zah innphi ku kaw a thua te a haung. Te a chi nawlan ngia zah, “Pou Bawipaw , azaw vae; atu tuh ka hiinnaw hynh yn lah ccavae, pawccecize kae tuh ka minpaaw hae laeze ahoy huapaw ka thua khyh,” a ci.

⁵ Te innphi ku kaw marya a ih. Vaekheitmawte vaawpaw nynh hae zah, “Thokuh lah ae,” a cipya.

⁶ Elijah nynh do zah a luki khe lung asopaw vawlan aruakuhpaw sanlou phe kheit te tui ling kheit kha a muih. Ae zah a neih koute bua a ih.

⁷ Bawipaw vaawpaw tuh vae ningnaw yn thua zah aning kha hae zah, “Na cceih cihnaw laanpi tuh myarya asaw keiccuze thokuh lah ae hin,” a cipya.

⁸ Thokuh zah a ae a neih; tuh-e looh thawzung tuhte nin sung pali te zi sung pali, Pachia mua Horeb langkhe a cceih.

⁹ Tuin hmin kya umpaw lungkarung kya thua zah a rya. Te Bawipaw bya tuh a kalan yn thua zah, “Elijah, e kya pawmou na cyi?” cite a khia.

¹⁰ Elijah nynh, “Bawipaw , vaaw Pachia kha ccavyng ka pankhae; pawccecize Israel hae nynh na byakin kha vua hae zah na silawhang hae kha a ro hae, thaloi te na profeh hae kha theih hae zah, ka makhae nynh ka laehy vae, ka hiinnaw kha yn ccung hae,” a cipya.

Horeb Mua kya Elijah te Pachia

¹¹ Aning nynh, “Pou lah, Bawipaw malang mua vawlan khe la thadyn, pawccecize Bawipaw tuh po yn cceih cih,” a cipya. Tetuh athawsaepaw khise tuh yn tho zah mua hae tuh paw hae zah Bawipaw malang khe lungpi hae tuh a koi hae, thuasalama Bawipaw tuh khisan kya um khyh; khisan azaw koute innry asuekuh, thuasalama Bawipaw tuh innrysuekunaw kya mah um khyh;

¹² innrysuekuh koute maee a um; thuasalama Bawipaw tuh maee kya mah um khyh; maee koute nevyalyapaw roi yn ccae.

¹³ Tuh-e roi tuh Elijah nynh he a thae te, a mae kha a angkiccua te a bongku, te pou zah lungkarung kalan teenaw arae khe a thadyn. Te amaw kalan khe, “Elijah, e kya pawmou na cyi?” cite roi yn ccae.

¹⁴ Elijah nynh, “Bawipaw , vaaw Pachia kha ccavyng ka pankhae; pawccecize Israel hae nynh na byakin kha vua hae zah na silawhang hae kha a ro hae; thaloi te na profeh hae kha theih hae zah, ka makhae nynh ka laehy vae, ka hiinnaw kha yn ccung hae,” a cipya.

¹⁵ Te Bawipaw nynh, “La ki lah, Damaskas ramkaw langkhe la cceih; he na thua te, Hazael kha Siria siapharan lang chitui na thuh cih.

¹⁶ Nimshi ccapaw Jehu kha mah Israel siapharan lang chitui na thuh cih; te Abelmeholah khuapaw Shafat ccapaw Elisha kha namaw ccelang profeh lang chitui na thuh cih.

¹⁷ Hazael a thaloi kyate a luepaw miakaw kha Jehu nynh a theih cih; Jehu a thaloi kyate a luepaw miakaw kha Elisha nynh a theih cih.

¹⁸ Tuhzemah Baal malang ccukharutung lei hae paw balyn, Baal a myng leipaw miakaw, Israel hae thong sari kha ka haang bang cih hae,” a cipya.

Elisha tuh Elijah Zuitu lang Tang

¹⁹ Tukeiccuze Elijah tuh tuin kyate cceih zah, Shafat ccapaw Elisha, leithue cciamangpaw kha a muih; a malang khe tangnua toi haw lae ning um hae zah amaw tuh toi haw lae ningnaw kyakhe a um. Elijah nynh a pe langkhe po cceih zah a angkiccua kha Elisha tungvaw a khang.

²⁰ Te Elisha nynh a tangnua hae kha cciatawte Elijah kalan ccue zah, “Ka nung te ka paaw kha ka la myngsya hin hae, tukoute nang kha kae zui cih,” a cipya. Te Elijah nynh, “La ki ccaleih; pawccecize na tungvaw kya paw ka cyih zawtou?” a cipya.

²¹ Elisha nynh ki zah tangnuapaw toi kheit kha cciakhae zah a chia; leithuenawpaw thing khate tangnuapaw saw kha a thung, te ccungccaw hae kha dang hae zah a ae hae. Te thokuh zah Elijah kha zui zah a ryalahtu lang a tang.