1 SAMUEL 7 - Zotung Bible 2016

¹ Te Kiriath-jearim khuaccaaw hae nynh oun cceih hae zah Bawipaw thingkua kha lah hae zah, mua vaw umpaw Abinadab inn langkhe a cciakhae hae. Minmin nynh Bawipaw thingkua a do-oihtu lang Abinadab ccapaw Eleazar kha a thyaasah hae.

² Kiriath-jearim khua kyakhe tuh-e thingkua a thua nin kyate ccyh hynhsepi cia, kum kuin loukaw a um; te Israel hae balyn nynh Bawipaw kalan bawmnaw mue khylan a sia hae.

Samuel nynh Byapia hae

³ Tetuh Samuel nynh Israel hae balyn kyakhe, “Nae thinlung balyn te Bawipaw kalan na ki oh zetuh, ramccang pachia hae te Astartes khozinung hae kha nae kyate vua oh. Nae thinlung kha Bawipaw kalan hawisah oh lah, amaw kyalya kha beik oh, te Filistin hae kuih kyate ae luesah cih oh,” a cipya hae.

⁴ Tukeiccuze Israel nynh Baal pachia hae te Astartes khozinung hae kha vua hae zah Bawipaw kyalya kha a beik hae.

⁵ Te Samuel nynh, “Israel hae balyn kha Mizpah khua kya pum oh, kae nynh Bawipaw kalan saw kae sangpah cih oh,” a cipya hae.

⁶ Tukeiccuze minmin nynh Mizpah khua kya a sueluakuh hae, te tui kha the hae zah Bawipaw malang khe a bu hae. Tuin nin kya looh-aesung hae zah, “Bawipaw tungvaw kae sei vae,” a ci hae. Te Samuel nynh Israel hae kha Mizpah khua kya bya a pia hae.

⁷ Israel hae tuh Mizpah khua kya a sueluakuh vae hae cipaw kha Filistin hae nynh he a thae hae tuh, Filistin bawi hae nynh Israel hae kha a ccianua hae. Tuh-e konglang tuh Israel ccungccaw hae nynh he a thae hae tuh Filistin hae raw kha a rih hae.

⁸ Israel ccungccaw hae nynh Samuel kha, “Filistin hae kuih kyate oun khum nawlan sawsang lah, aening hanlan Bawipaw ah Pachia kalan dae leite siatua,” a cipya hae.

⁹ Tukeiccuze Samuel nynh matei zu ungpaw tuutaw kha lah zah, Bawipaw kalan a pynpi te maee-ute silawnaw kha a rae; Samuel nynh Bawipaw kalan khe Israel hanlan sawsang zah, Bawipaw nynh a leih.

¹⁰ Samuel nynh maee-ute silawnaw a rae lyakhe Filistin hae nynh Israel hae kha tuk khylan oun naenuaku hae; thuasalama tuin nin khe Bawipaw nynh Filistin hae kha roi myarya ccae lante kholungthyhsah nua hae zah, mih lung pong a muasah hae; te minmin tuh Israel hae malang khe a ccue vae hae.

¹¹ Te Israel ccungccaw hae tuh Mizipah khua kyate pou hae zah Filistin hae kha Beth-kar kyacia deehuite a chia hae.

¹² Tetuh Samuel nynh lung kha lah zah Mizpah te Jeshanah laku kya bing zah, “Bawipaw nynh kaening hynh atu cia oun bawm,” ci zah Ebenezer cite min a phu.

¹³ Tukeiccuze Filistin hae tuh rhaw shung hae zah Israel hae ram lang tee vae khyh hae; Samuel she lya balyn tuh Bawipaw kuih nynh Filistin hae kha a rawse hae.

¹⁴ Filistin hae nynh Israel hae kya-e a law hae paw khua hae kha Ekron kyate Gath kyacia Israel hae kalan pyathui athua; Israel hae nynh mih ram kha Filistin hae kuih kyate bua a mue hae. Israel hae te Amor hae laku kya mah daenaw a um.

¹⁵ Samuel tuh a hiin lungkhu balyn Israel hae kya byapiatu lang a tang.

¹⁶ Kum takyhte Bethel, Gilgal te Mizpah khua lang po lekuh lan khuaccong zah, tuin khua hae balyn kyakhe Israel hae kha bya a pia hae.

¹⁷ Tukoute a inn a umnaw Ramah khua lang a ki; tuin khua khe Israel hae kha byading te a uk hae, te tuin kyakhe Bawipaw elang silawhang kha a rae.