1 SAMUEL 22 - Zotung Bible 2016

David te A Zuitu hae

¹ David tuh tuin kyate cceih zah Adullam lungkarung langkhe a ccue; tuh-e tuh a uno hae te a paaw puizia hae balyn nynh a thae hae te, a kalan a cceih hae.

² A riathaepaw miakaw, laebah a hoipaw miakaw te a lungryachih leipaw miakaw tuh amaw kalan a sueluakuh hae; aning tuh minmin kya uktu lang a tang. A kya um hae paw tuh za pali loukaw acih hae.

³ David tuh tuin kyate Moab ram Mizpeh khua lang cceih zah, Moab siapharan kha, “Pachia nynh ka hanlan a cyi lanpaw kha ka ny mawlaezung, ka nung te ka paaw tuh na kalan cciate beih umbua hae sah,” a cipya.

⁴ Minmin kha Moab siapharan kya cciatawsya hae zah, David tuh akhynnaw hmin kya a um lungkhu balyn, tuh-e paw kya a umbua hae.

⁵ Te profeh Gad nynh David kha, “E lungkarung kya um nan vae, pou lah, Judah ram lang la cceih,” a cipya. Tukeiccuze David tuh pou zah Hereth ramkaw langkhe a cceih.

Saul nynh Ranpibawi hae Chianaw

⁶ David te a kya um hae paw kha a muih hae cite Saul nynh a thae. Saul tuh Gibeah khua e ahangnaw hmin kya umpaw tamarisk thingku kaw khe a ccoi ccyngkuh zah a haung, a ryalahtu hae balyn tuh amaw kha voilu hae zah a thadyn hae.

⁷ Amaw kha voilute a thadyn hae paw a ryalahtu hae kyakhe Saul nynh, “Nanning Benjamin phin hae, thaetua oh, Jesse ccapaw nynh nanning balyn kha loo te misu khokhu ae pya cih oh tou? Milu thong kheit uktu te za kheit uktu rhawbawi lang pong ae nung cih oh tou?

⁸ Tuhte athua keiccu tou nae balynte aruh lante nae phee oh? Ka ccapaw nynh Jesse ccapaw te nawccawkheihnaw a rae hae paw kha lu kheit nynh san nae hopah khyh oh, ka hanlan a ngaethahpaw na um khyh oh, ka ryalahtupaw nynh atunin a cyi vae hawte, kae kha rawse khylan te buh khylan ka ccapaw nynh ka ryalahtupaw a tuhoupaw kha humhung nynh mah nae hopah khyh oh,” a cipya hae.

⁹ Saul a ryalahtu hae kyaze lupi athuapaw Edom minphuinpaw Doeg nynh, “Ahitub ccapaw Ahimelek kalan, Nob khua lang a cceihpaw Jesse ccapaw kha ka muih;

¹⁰ Ahimelek nynh aning hanlan Bawipaw kha byakhiapah zah, looh te Filistin paw Goliath thaloi kha a pya,” a cipya.

¹¹ Siapharan nynh Ahitub ccapaw Ahimelek te a puizia hae balyn, Nob khua um hae paw ranpibawi hae kha kosah hae zah, mih balynte siapharan kalan a cceih hae.

¹² Saul nynh, “Ahitub ccapaw, ngaetua,” cipah zah, aning nynh, “Ka bawipaw, hein kya mang ka um,” a cipya.

¹³ Saul nynh amaw kha, “Nang te Jesse ccapaw nynh pawccemou aruh lante nae phee oh? Aning nynh atunin a cyi vae hawte, kae kha dou khylan te buh khylan, sanlou te thaloi kha na pya zah aning hanlan Pachia kalan bya na khiapya,” a cipya.

¹⁴ Te Ahimelek nynh siapharan kha, “Na ryalahtu hae balyn kyaze David hawte hummou a lungzi? Aning tuh siapharan paeepaw thua zah, na pyn rhawviatu hae lupi te na inn kya sawtuanaw a ccoupaw nynh thua.

¹⁵ Atunin hynh aning hanlan Pachia kalan masaty bya ka khiapyapaw athua zawtou? Thua khyh! Siapharan nynh na ryalahtupaw tungvaw kya thuasah, ka puizia hae tungvaw kya thuasah pawpaw mah oun seisah nan, pawccecize na ryalahtupaw nynh e konglang balyn hynh patae thuasah, beihtaraw thuasah pawpaw mah ka nyh khyh,” a cipya.

¹⁶ Siapharan nynh, “Ahimelek, nang te na puizia hae balyn tuh na chih ccaccing cih oh,” a cipya.

¹⁷ Siapharan nynh a pe thadyn hae paw rhawviatu hae kyakhe, “Maeleihkuh oh lah, Bawipaw ranpibawi hae kha theih oh, pawccecize minmin nynh David kha pankhae hae zah, a ccuepaw kha mang a nyh hae pite yn hopah khyh hae,” a cipya hae. Thuasalama siapharan a ryalahtu hae nynh Bawipaw ranpibawi hae kha chia lan mih kuih hangnua khyh hae.

¹⁸ Tetuh siapharan nynh Doeg kha, “Doeg, nang nynh maeleihkuh lah, ranpibawi hae hynh theih hae,” a cipya. Edom minphuinpaw Doeg nynh maeleihkuh zah ranpibawi hae kha a chia hae; tuin nin khe laphan laaw te kuakuhpaw ranpibawi angki kikuhpaw sung tarya lu pangaw kha a chia hae.

¹⁹ Ranpibawi hae khua Nob khua um hae paw kha thaloi te a bae hae; nopi te pise, imua te nosi, tangnuapaw, lann te tuu hae kha thaloi te a bae hae.

²⁰ Thuasalama Ahitub ccapaw Ahimelek a ccapaw hae kya-e lu kheit, a min Abiathar cikuhpaw tuh lue zah David kalan a ccue.

²¹ Saul nynh Bawipaw ranpibawi hae a chia vae hae cipaw kha Abithar nynh David kha a hopya.

²² David nynh Abithar kha, “Khah lyaze Edom minphuinpaw Doeg a umbua keiccuze Saul kha a hopah mamin vae cih cipaw khah-e nin kya maw phe ka ny vae. Na paaw puizia hae balyn nynh a chi hae paw tuh kae ka keiccu nynh thua.

²³ Ka kya um lah, rih nan; pawccecize ka hiinnaw a ccungpaw tuh na hiinnaw ae ccungpaw nynh thua; ka kya um lah, na khyn cih,” a cipya.