Salmos 99 - Didza' cubi rucá'ana tsahui'

¹ ¡Rinná bëʼë Xanruʼ Dios! Taʼzxizi yúguʼtë bönachi. Röʼë rinná bëʼë ladaj nupa nápagacatërö yöl-laʼ huáca, lë́gaca Querubín, ateʼ rizxizi luyú.

² Nayë́pisëtërëʼ Xanruʼ lu yödzö Sión, ateʼ rinná béʼenëʼ bönachi yúguʼtë yödzö izáʼa.

³ Ral-laʼ ilaʼgúʼu Lëʼ yöl-laʼ ba yúguʼtë bönachi, tuʼ caní saʼyéaj, en le run ga runruʼ Lëʼ bal. ¡Láʼayi náquiëʼ Lëʼ!

⁴ Nadxíʼi quézinuʼ le naca tsahuiʼ, Liʼ, Bönniʼ unná bëʼ nayë́pisë. Tsaz naguixjuʼ le naca dxiʼa tsáhuiʼdoʼ, en nuzúʼ quégaquiëʼ zxíʼini xiʼsóëʼ Jacob le naca tsahuiʼ, en le naca idútë li.

⁵ ¡Guliʼgún zxönëʼ Xanruʼ Dios! Buliʼzechu zxíbiliʼ lahuëʼ Lëʼ ga röʼë rinná bëʼë. ¡Láʼayi náquiëʼ Lëʼ!

⁶ Guláquiëʼ Moisés, en Aarón bixúz queëʼ, ateʼ benëʼ Samuel tsözxö́n nupa gulaʼyéaj ládxiʼgaca Lëʼ. Buluʼlidzëʼ Xanruʼ, ateʼ bubíʼi cazëʼ didzaʼ.

⁷ Tu lu böaj bë́ʼlenëʼ légaquiëʼ didzaʼ. Gulunëʼ ca taʼnná bëʼ xibá queëʼ, en yuguʼ le gunná béʼenëʼ légaquiëʼ.

⁸ Bubiʼu didzaʼ lógaca bönachi quiuʼ, Xantuʼ Dios. Buluíʼinuʼ légaquiëʼ nacuʼ Dios, en runiti loʼ bönachi, pero rubiʼu quégaquiëʼ ca saʼyéaj döʼ tuʼë.

⁹ ¡Guliʼgún zxönëʼ Xanruʼ Dios! ¡Buliʼzechu zxíbiliʼ lahuiʼ lo guíʼa láʼayi ga zoa cazëʼ, tuʼ náquiëʼ láʼayi Xanruʼ Dios!