Salmos 95 - Didza' cubi rucá'ana tsahui'

¹ Guliʼdá, gúl-laruʼ queëʼ Xanruʼ lu yöl-laʼ rudzeja queë́ruʼ. Lu yöl-laʼ rudzeja queë́ruʼ cö́dxiʼaruʼ que Nu naʼ naca ca tu guiö́jtoʼo ga nuláruʼ.

² Uyéajruʼ lahuëʼ, en guië́ruʼ-nëʼ: “Xclenuʼ.” Lu yöl-laʼ rudzeja queë́ruʼ cö́dxiʼaruʼ lahuëʼ, gúl-laruʼ yuguʼ salmo.

³ Xanruʼ Dios náquiëʼ Dios nayë́pisëtërëʼ. Nápatërëʼ yöl-laʼ unná bëʼ ca yúguʼtë dios izáʼa.

⁴ Lu naʼ cazëʼ yuʼu le dë ga rëʼ zxan luyú, ateʼ néquiguequi caʼ queëʼ guíʼa sibi.

⁵ Nequi queëʼ nísadoʼ, tuʼ nun cazëʼ le, en len náʼasëʼ benëʼ luyú bidxi.

⁶ Guliʼdá, gunruʼ-nëʼ zxön, en uzóa zxíbiruʼ lahuëʼ. Uzóa zxíbiruʼ lahuëʼ Xanruʼ Nu ben rëʼu.

⁷ Naca cazëʼ Lëʼ Dios queë́ruʼ, ateʼ nácaruʼ bönachi rugagu cazëʼ, en ca böʼcuʼ zxilaʼ richë́ʼ cazëʼ-baʼ lu nëʼë. Rnna cazëʼ Dios: “Naʼa, channö rë́ʼëniliʼ yö́niliʼ chiʼa,

⁸ bitiʼ gunliʼ zidzaj icja ládxiʼdoʼoliʼ ca gulunëʼ xuz xtóʼoliʼ lataj naʼ lë Meriba, en calëga ca gulunëʼ laʼ guixiʼ ga dë lataj lë Masa,

⁹ cateʼ niʼ gulaʼzíʼ bëʼë xuz xtóʼoliʼ nedaʼ. Gulaʼzíʼ bëʼë nedaʼ sal-laʼ bilaʼléʼenëʼ yuguʼ le benaʼ.”

¹⁰ Idú choáʼ iz gúquidaʼ ziʼ bönachi gulaʼcuáʼ dza niʼ, ateʼ gunníaʼ: “Taʼchixi taʼníguinëʼ lu icja ládxiʼdoʼgaquiëʼ, en bitiʼ nö́zguequinëʼ le rë́ʼëndaʼ ilunëʼ.”

¹¹ Que lë ni naʼ lu yöl-laʼ rilé quiaʼ benaʼ tsutsu xtídzaʼa, gunníaʼ: “Bitiʼ caʼ ilaʼyáziëʼ ga uluʼzíʼ ládxëʼë tsözxö́n len nedaʼ.”