Salmos 82 - Didza' cubi rucá'ana tsahui'

¹ Zuínëʼ Dios ladaj nupa tuʼdubi queëʼ niʼ yehuaʼ yubá. Ruchiʼa rusörö́ëʼ nupa taʼnná bëʼ.

² Rnnëʼ: “¿Gácaʼxte caz uchiʼa usörö́liʼ quégaca bönachi lu yöl-laʼ bitiʼ naca tsahuiʼ queë́liʼ? Caní naca tuʼ rubéajliʼ tsahuiʼ nupa tuáʼ döʼ.

³ Buliʼbéaj tsahuiʼ nupa taʼcuidiʼ, en yuguʼ biʼi uzëbi. Guliʼgún le naca tsahuiʼ quégaca nupa taʼguíʼi taʼzacaʼ, en quégaca nupa taʼyadzaj taʼyudxi.

⁴ Buliʼsölá nupa taʼcuidiʼ, en nupa nácagaca yechiʼ. Buliʼsölá léguequi lu náʼagaca nupa tuáʼ döʼ.

⁵ Bitiʼ nö́ziguequi, en bitiʼ taʼyéajniʼi. Taʼdá ga chul-la. Rizxizi xilibi yödzölió.”

⁶ Rnna cazaʼ nedaʼ: “Nácaliʼ ca yuguʼ dios. Nácaliʼ yúguʼtëliʼ zxíʼinëʼ Dios nayë́pisëtërëʼ,

⁷ pero gátiliʼ ca tati bönachi, en ibíxiliʼ lu gudil-la ca taʼbixi zxíʼinëʼ bönniʼ lo.”

⁸ Guyasa, Dios, en buchiʼa busörö́ quégaca bönachi yödzölió ni, tuʼ nácagaca queë cazuʼ yúguʼtë yödzö bönachi.