Salmos 8 - Didza' cubi rucá'ana tsahui'

¹ ¡Xanaʼ Dios, bicaʼ ba Loʼ idútë yödzölió! ¡Xitsáʼtërö ca lúzxiba nayë́pisuʼ Liʼ!

² Túl-labiʼ bíʼidoʼ, encaʼ biʼi huë́ʼënidoʼ yöl-laʼ zxön quiuʼ sal-laʼ nacuáʼ nupa taʼdáʼbagaʼ Liʼ. Uzóa dxíuʼ nupa naʼ bitiʼ taʼléʼe Liʼ dxiʼa, encaʼ nupa taʼdáʼbagaʼ Liʼ.

³ Cateʼ ruyúaʼ lúzxiba quiuʼ, le nunuʼ len xibö́n naʼzuʼ, encaʼ beuʼ, en yuguʼ bölaj beníʼ nuzúʼ xilátjaguequi,

⁴ níʼirö rnníaʼ: ¿Bizxi caz bönniʼ, tuʼ röjné cazuʼ lëʼ? ¿Bizxi caz nu naca bönáchisö, tuʼ ruíʼi ládxuʼu Liʼ nu naʼ?

⁵ Nunuʼ ga naquiëʼ bönniʼ iaʼlatiʼ cuidiʼ ca naca cazuʼ Liʼ. Nuzúʼ queëʼ yöl-laʼ ba quiuʼ, en yöl-laʼ run bal ca tu le néquini oro dxía icjëʼ.

⁶ Nunuʼ ga rinná béʼenëʼ yuguʼ le nun cazuʼ Liʼ. Yúguʼtë nuzúʼ xiniʼë lëʼ.

⁷ Nuzúʼ xiniʼë yúguʼtëbaʼ böʼcuʼ zxilaʼ, en yúguʼtëbaʼ bëdxi,

⁸ en lës caní nunuʼ caʼ quégacabaʼ biguínnidoʼ, en quégacabaʼ böla dzö́ʼöbaʼ nísadoʼ, encaʼ quégacabaʼ yúguʼtëbaʼ böaʼ taʼdö́dibaʼ lu nísadoʼ.

⁹ ¡Xanaʼ Dios, bicaʼ ba loʼ idútë yödzölió!