Salmos 56 - Didza' cubi rucá'ana tsahui'

¹ Buéchiʼ ladxiʼ nedaʼ, Dios, tuʼ taʼdáʼbagaʼ bönachi nedaʼ. Yuguʼ dza nupa tuʼdíʼi nedaʼ taʼbía no nedaʼ.

² Yuguʼ dza nupa bitiʼ taʼléʼe nedaʼ dxiʼa tuáʼ döʼ quiaʼ. Zián nupa taʼdíl-lalen nedaʼ lu yöl-laʼ run ba zxön cuínguequi.

³ Cateʼ radxi ridzö́bidaʼ, uzxöni ládxaʼa Xanruʼ.

⁴ Ruzxöni ládxaʼa-nëʼ Dios, en riguʼa yöl-laʼ ba xtídzëʼë. Ruzxöni ládxaʼa-nëʼ, en bitiʼ bi gádxidaʼ. ¿Bizxi caz gaca ilún quiaʼ bönachi?

⁵ Yuguʼ dza tun nigui nedaʼ nupa bitiʼ taʼléʼe nedaʼ dxiʼa. Taʼzáʼ ládxiʼticaʼsö nacxi iluáʼ döʼ quiaʼ.

⁶ Tuʼdubëʼ ga nagáchiʼsö, en tuʼyúlanëʼ yúguʼtë le runaʼ, para gataʼ quégaquiëʼ lataj ilútiëʼ nedaʼ.

⁷ Bubiʼë quégaquiëʼ, Dios, ca naca döʼ tuʼë, en lu yöl-laʼ rilé quiuʼ busuniti légaquiëʼ.

⁸ Nöz quézinuʼ Liʼ ca röʼa böniga. Nurixuʼ Liʼ nisa ribödxi quiaʼ. ¿Naruʼ cabí nuzúʼ léguequi lu guichi quiuʼ?

⁹ Cateʼ ulidzaʼ Liʼ, laʼ dza náʼasö uluʼhuécja gúz cúdzuʼlö nupa tuʼdíʼi nedaʼ. Nöz quézidaʼ rácalen cazuʼ nedaʼ, Dios.

¹⁰ Ruzxöni ládxaʼa-nëʼ Dios, en riguʼa yöl-laʼ ba xtídzëʼë. Ruzxöni ládxaʼa-nëʼ Xanruʼ, en riguʼa yöl-laʼ ba xtídzëʼë.

¹¹ Ruzxöni ládxaʼa-nëʼ, en bitiʼ bi gádxidaʼ. ¿Bizxi caz gaca ilún bönachi quiaʼ?

¹² ¡Gunnaʼ quiuʼ, Dios yuguʼ le guzxíʼ lu naʼa! ¡Cuʼa Liʼ yöl-laʼ ba!

¹³ Busölóʼ nedaʼ lu yöl-laʼ guti, en nuzúʼ nedaʼ tsutsu. Ridá cazaʼ loʼ Liʼ, Xantuʼ Dios, lu beníʼ ruʼu quégaca nupa nabángaca.