Salmos 52 - Didza' cubi rucá'ana tsahui'

¹ ¿Bizx que run ba zxön cuinuʼ niʼa que döʼ ruʼu, bönniʼ nál-la? Zóaticaʼsö yöl-laʼ dxiʼi ladxiʼ queëʼ Dios.

² Len lúdxuʼu rúnlenuʼ luzóʼo didzaʼ para usunítiuʼ bönachi. Naca lúdxuʼu, bönniʼ rizíʼ yëʼ, ca tu guíë tuchiʼ.

³ Nadxíʼirönuʼ le naca döʼ ca nadxíʼinuʼ le naca dxiʼa, en nadxíʼirönuʼ le cabí nácatë ca nadxíʼinuʼ le naca idútë li.

⁴ Nadxíʼinuʼ yúguʼtë didzaʼ tun ditaj bönachi, liʼ naʼ, bönniʼ rizíʼ yëʼë.

⁵ Tsaz uzötaj cazëʼ Dios liʼ. Sönëʼ liʼ, en ubéajëʼ liʼ lu yuʼu lidxuʼ, en ucuítëʼ liʼ ga nacuáʼ nupa nabángaca.

⁶ Yuguʼ bönniʼ tsahuiʼ ilaʼléʼenëʼ lë ni, en iládxinëʼ Dios. Uluʼzxidxëʼ queëʼ bönniʼ naʼ rizíʼ yëʼë, ilaʼnë́ʼ:

⁷ “¡Buliʼyútsöcaʼ! Bönniʼ ni bitiʼ gúʼunnëʼ uzxöni ládxëʼë Dios, pero buzxöni ládxëʼë yöl-laʼ tsahuiʼ queëʼ, en le zián le guzë́ ládxëʼë le cabí bi nazacaʼ.”

⁸ Nacaʼ nedaʼ ca tu yaga olivo yaʼa le röʼ raʼ yuʼu lidxëʼ Dios. Uzxöni ládxaʼa yöl-laʼ dxiʼi ladxiʼ queëʼ Dios yuguʼ iz siʼ zaca.

⁹ Guíëticaʼsaʼ Liʼ: “Xclenuʼ” tuʼ ben cazuʼ Liʼ ga naca caní, ateʼ gunaʼ löza Loʼ le naca dxiʼa lógaca nupa néquiguequi quez quiuʼ.