Salmos 5 - Didza' cubi rucá'ana tsahui'

¹ Ruzë́ naguʼ didzaʼ ruáʼa, Xan. Buyú ca rinnëdaʼ ládxaʼa lu yöl-laʼ ruhuíʼini quiaʼ.

² Dios quiaʼ, Nu rinná beʼe nedaʼ, ruzë́ naguʼ cateʼ rinábidaʼ Liʼ gácalenuʼ nedaʼ, naʼ güíʼilenaʼ Liʼ didzaʼ.

³ Yuguʼ zila yönnuʼ chiʼa. Zíladoʼ idxinaʼ loʼ, en cözaʼ didzaʼ ubiʼu.

⁴ Nacuʼ Liʼ Dios bitiʼ raza ládxuʼu le cabí naca, en bitiʼ ruʼu lataj ibigaʼ ga zuʼ nu ruáʼ döʼ.

⁵ Bitiʼ ruʼu lataj nupa tun ba rahui ilaʼdxín loʼ, en bitiʼ riléʼenuʼ dxiʼa nupa nácagaca xihuiʼ.

⁶ Rusunítiuʼ dërö nupa taʼzíʼ yeʼe luzë́ʼeguequi, en bitiʼ riléʼenuʼ dxiʼa nupa tuti bönachi, en taʼzíʼ yëʼ.

⁷ Gaca tsuʼa nedaʼ lu yuʼu lidxuʼ, tuʼ nadxíʼideʼenuʼ nedaʼ. Lu yöl-laʼ baʼa ladxiʼ quiaʼ tsuʼa ga naca yudoʼ láʼayi quiuʼ, en tseaj ládxaʼa Liʼ.

⁸ Tuʼ nacuáʼ zián nupa taʼlé nedaʼ, buluíʼi nedaʼ le naca dxiʼa rë́ʼënuʼ gunaʼ, Xan. Busëdi nedaʼ para gaca gunaʼ ca rë́ʼënuʼ Liʼ.

⁹ Bitiʼ gaca nu tseajlë́ʼ didzaʼ tuíʼi nupa naʼ taʼlé nedaʼ. Nácagaca xihuiʼ icja ládxiʼdoʼguequi. Naca ruáʼagaca ca tu yeru ba nayalaj, en lu yöl-laʼ rizíʼ yëʼ quéguequi tuíʼi yulaj didzaʼ.

¹⁰ Ben léguequi xiguiaʼ, Dios. Ben ga bitiʼ udxín xtídzaʼguequi. Gurúʼuna léguequi tuʼ túnticaʼsö dul-laʼ, en tuʼ taʼdáʼbagaʼ xtídzuʼu.

¹¹ Uluʼdzeja nupa tuʼzxöni ladxiʼ Liʼ. Lu yöl-laʼ rudzeja quéguequi gúl-lagaca quiuʼ tuʼ rácalenuʼ léguequi. Tuʼzíʼ xibóʼ nupa nadxíʼigaca Liʼ.

¹² Run cazuʼ Liʼ ga raca dxiʼa quégaca nupa tun ca rnna xtídzuʼu, Xan. Lu yöl-laʼ dxiʼi ladxiʼ quiuʼ run chiʼu léguequi.