Salmos 42 - Didza' cubi rucá'ana tsahui'

¹ Ca rizë́ ládxiʼbaʼ bidxinaʼ guixiʼ nisa yégudoʼ, lëscaʼ caní rizë́ ládxaʼa Liʼ, Dios.

² Ribidxi ládxaʼa Liʼ cazuʼ, Dios. ¿Bátaxi udxinaʼ ga dë quiaʼ, en tsuʼa le yúbölö yudoʼ láʼayi quiuʼ?

³ Rëla, en te dza ribödxaʼ, en bitiʼ bi rahuaʼ. Yuguʼ dza nacuáʼ nupa taʼnábini nedaʼ, taʼnná: “¿Gazxi caz zoa Dios quiuʼ?”

⁴ Risëbi ládxaʼa cateʼ röjnedaʼ ca guca zíʼalö, cateʼ guzáʼlenaʼ bönachi guizxi yu, en yöjnö́ruaʼ láhuilöguequi raʼ yuʼu queëʼ Dios. Lu yöl-laʼ rudzeja queë́tuʼ bíl-latuʼ, en guyéaj ládxiʼtuʼ-nëʼ Xanruʼ, en bentuʼ laní.

⁵ ¿Bizx que risë́bidaʼ ládxaʼa, en bizx que röʼa böniga? Uzxöni ládxaʼa-nëʼ Xanruʼ Dios, tuʼ huadxín dza cuʼa-nëʼ yöl-laʼ ba le yúbölö. Náquiëʼ Nu rusölá nedaʼ, en náquiëʼ Dios quiaʼ.

⁶ Risë́bidaʼ ládxaʼa, Dios quiaʼ. Que lë ni naʼ tsöjnedaʼ Liʼ tsanni ni zoaʼ, ridáʼ rizxúnnajaʼ raʼ yegu Jordán, en tsanni ni ridáʼ lu guíʼa Hermón, en lu guíʼa Mizar.

⁷ Ca tu guziúʼ rinnë́ lu nísadoʼ, en ca bö ruíʼi tu budoáʼ nísadoʼ queëʼ Dios, caní rinnë́ ladxiʼ böʼ naca cazaʼ lu yöl-laʼ risëbi ladxiʼ.

⁸ Rinábidaʼ-nëʼ Xanruʼ huéchiʼ ládxëʼë nedaʼ yuguʼ dza. Yuguʼ dzöʼ rul-laʼ yöl-laʼ ba queëʼ Lëʼ, en rulidzaʼ Dios, ruíʼilenaʼ-nëʼ didzaʼ, Nu naʼ runna quiaʼ yöl-laʼ naʼbán.

⁹ Guíaʼ-nëʼ Dios, Nu ruzóa nedaʼ tsutsu, inníaʼ: ¿Bizx que nál-la ládxuʼu nedaʼ? ¿Bizx que run bayúdx quíʼi sácaʼticaʼsaʼ lu náʼagaca nupa bitiʼ taʼléʼe nedaʼ dxiʼa?

¹⁰ Rutsaba yúguʼtë dxita yuʼa tuʼ tuʼdidzaʼ yudxi nedaʼ. Yuguʼ dza taʼnábini nedaʼ, taʼnná: “¿Gazxi caz zoa Dios quiuʼ?”

¹¹ ¿Bizx que risë́bidaʼ ládxaʼa, en bizx que röʼa böniga? Uzxöni ládxaʼa-nëʼ Xanruʼ Dios, tuʼ huadxín dza cuʼa-nëʼ yöl-laʼ ba le yúbölö, tuʼ náquiëʼ Nu rusölá nedaʼ, en náquiëʼ Dios quiaʼ.