Salmos 149 - Didza' cubi rucá'ana tsahui'

¹ ¡Guliʼcuʼë yöl-laʼ ba Xanruʼ! ¡Guliʼgul-la queëʼ Xanruʼ Dios tu le cubi, en guliʼgul-la yöl-laʼ ba queëʼ ga nudúbigaca nupa néquiguequi quez queëʼ!

² Ral-laʼ uluʼzíʼ xibë́ʼ Xanruʼ Dios bönachi Israel, tuʼ náquiëʼ Nu ben léguequi. Ral-laʼ uluʼdzéjalen Dios nupa nacuáʼ Sión, tuʼ náquiëʼ Nu rinná beʼe léguequi.

³ Ral-laʼ ilaʼgúʼu yöl-laʼ ba La laʼayi queëʼ, en lu yöl-laʼ rudzeja uluʼyáʼa lahuëʼ. Ral-laʼ ilúl-la yöl-laʼ ba queëʼ, ilaʼcapaʼ lëʼe guídi, en ilaʼquínni lë́ʼegaca bihuë́l-ladoʼ,

⁴ tuʼ raza ládxëʼë Xanruʼ Dios bönachi queëʼ. Uchisëʼ nupa taʼguíʼi taʼzacaʼ, en usölë́ʼ léguequi.

⁵ Nupa néquiguequi quez queëʼ ral-laʼ uluʼdzeja ládxiʼgaca lu beníʼ queëʼ. Lu yöl-laʼ rudzeja quéguequi ral-laʼ ilúl-la queëʼ cateʼ niʼ dë́gaca lu le rátiʼgaca.

⁶ Yöl-laʼ ba queëʼ Xanruʼ Dios ral-laʼ sóaticaʼsö ruíʼiguequi, en tu guíë tuchiʼ natuchiʼ iropa laʼa lu náʼagaca,

⁷ para uluʼzíʼ lëbi bönachi yuguʼ yödzö izáʼa, en ilún xiguiaʼ bönachi izáʼa naʼ,

⁸ para ilúguëʼë breguiʼ guíë náʼagaquiëʼ bönniʼ taʼná béʼenëʼ bönachi yödzö izáʼa naʼ, en uluʼcuʼë breguiʼ guíë yen náʼagaquiëʼ bönniʼ lo quégaquiëʼ,

⁹ para ilunëʼ quéguequi ca nachuguëʼ Dios gaca quéguequi. Naca lë ni le run bal nupa néquiguequi quez queëʼ Dios. ¡Guliʼcuʼë yöl-laʼ ba Xanruʼ!