Salmos 146 - Didza' cubi rucá'ana tsahui'

¹ ¡Guliʼcuʼë yöl-laʼ ba Xanruʼ! ¡Liʼ, böʼ naca cazaʼ, guluʼë yöl-laʼ ba Xanruʼ!

² ¡Cuʼa-nëʼ Xanaʼ yöl-laʼ ba tsanni ni zoaʼ nabanaʼ! ¡Gul-laʼ yöl-laʼ ba queëʼ Dios quiaʼ tsanni ni zoa böʼ naca cazaʼ!

³ Bitiʼ uzxöni ládxiʼliʼ bönniʼ taʼnná bëʼë, en calëga bönniʼ tati cazëʼ, bönniʼ bitiʼ caʼ gaca uluʼsölë́ʼ rëʼu.

⁴ Rurúaj böʼ yuʼë nu bönniʼ, ateʼ ruhuöáquiëʼ yu. Laʼ dza náʼasö riniti le rizáʼ ládxëʼë gunëʼ.

⁵ Bicaʼ ba bönniʼ rácalenëʼ Dios queëʼ Jacob lëʼ, bönniʼ naʼ runëʼ löza Xanruʼ Dios.

⁶ Nunëʼ Xanruʼ Dios lúzxiba, en luyú ni, encaʼ nísadoʼ, en yúguʼtë le nacuáʼ yuguʼ lataj naʼ. Rúnticaʼsëʼ Lëʼ ca rnna didzaʼ bëʼë,

⁷ en ruchiʼa rusörö́ëʼ nupa zoa nu rusacaʼ ziʼ léguequi. Rugagu cazëʼ nupa taʼdún. Rusanëʼ Xanruʼ Dios nupa nadzúngaca.

⁸ Rusaljëʼ Xanruʼ Dios guiö́j lógaca nupa nácagaca lo chul-la. Ruchisëʼ Xanruʼ Dios nupa nadzö́ʼögaca. Nadxíʼinëʼ Xanruʼ Dios nupa nácagaca tsahuiʼ.

⁹ Rapa chiʼë Xanruʼ Dios yuguʼ bönniʼ ziʼtuʼ. Rácalenëʼ-biʼ yuguʼ biʼi uzëbi, encaʼ yuguʼ nigula uzëbi, pero ruzaguëʼ xinö́zguequi nupa tuáʼ döʼ.

¹⁰ Inná bë́ʼticaʼsëʼ Xanruʼ Dios. Náquiëʼ Dios queë́liʼ, bönachi Sión. ¡Guliʼcuʼë yöl-laʼ ba Xanruʼ!