Salmos 113 - Didza' cubi rucá'ana tsahui'

¹ ¡Guliʼcuʼë yöl-laʼ ba Xanruʼ! ¡Guliʼcuʼë yöl-laʼ ba, libíʼiliʼ huen dxin queëʼ Xanruʼ! ¡Guliʼcúʼu yöl-laʼ ba Lëʼ Xanruʼ!

² ¡Cúʼuruʼ yöl-laʼ ba Lëʼ Xanruʼ, cateʼ risí lo naʼa, en yuguʼ iz siʼ zaca!

³ ¡Ga naguelaʼ ga rilén gubidza ga ridxintë ga ribía, cúʼuruʼ yöl-laʼ ba Lëʼ Xanruʼ!

⁴ ¡Nayë́pisëtërëʼ Xanruʼ Dios ca yúguʼtë yödzö izáʼa! ¡Nazxö́ntërö yöl-laʼ zxön queëʼ ca naca lúzxiba!

⁵ ¿Nuzxi caz zoa naca ca náquiëʼ Xanruʼ Dios? Röʼë rinná bëʼë ga naʼ nayë́pisëtërëʼ.

⁶ Ruzötaj cuinëʼ para uyúëʼ le dë lúzxiba, en le dë luyú ni.

⁷ Ruchisëʼ nupa nácagaca yechiʼ, rubéajëʼ léguequi lu bëchtö yu. Ruchisëʼ nupa taʼyadzaj, rubéajëʼ léguequi lu dö bëbu.

⁸ Runëʼ ga taʼböʼlen nupa taʼnná bëʼ. Taʼböʼlen nupa taʼnná beʼe bönachi queëʼ.

⁹ Runëʼ ga zóanu nigula huödx yuʼu lídxinu. Rudzeja ládxiʼnu tuʼ runëʼ ga nacuáʼabiʼ zxíʼininu. ¡Guliʼcuʼë yöl-laʼ ba Xanruʼ!