Salmos 111 - Didza' cubi rucá'ana tsahui'

¹ ¡Guliʼcuʼë yöl-laʼ ba Xanruʼ! Idú ládxaʼa reaʼ-nëʼ Xanruʼ: “Xclenuʼ.” Runaʼ caní tsazxö́n len bönniʼ tsahuiʼ zián ga naʼ nudúbigaca bönachi queëʼ.

² Zxön nácagaca le nunëʼ Xanruʼ. Yúguʼtë nupa taʼyaza ládxiʼgaca lë naʼ benëʼ tuʼsëda ca nácagaca.

³ Idútë dxiʼa nácagaca, en nayë́pisëtërögaca le nunëʼ Lëʼ, ateʼ idiáʼticaʼsö le naca tsahuiʼ queëʼ.

⁴ Chinunëʼ ga tsöjneruʼ yuguʼ le benëʼ, le tun ga rubániruʼ. Náquiëʼ Xanruʼ dxiʼi ladxiʼ, en ruíʼi ládxëʼë rëʼu.

⁵ Rugahuëʼ nupa tadxi Lëʼ. Röjnéticaʼsëʼ didzaʼ dzaga núnlenëʼ bönachi queëʼ.

⁶ Buzéajniʼinëʼ bönachi queëʼ ca naca yöl-laʼ huáca quégaca le nunëʼ, le benëʼ ga gulaʼdéliʼnëʼ xiyúgaca bönachi izáʼa.

⁷ Tsahuiʼ, en idútë li nácagaca le núngaca lu nëʼë. Nácagaca tsutsu yúguʼtë xibá gunná bëʼë.

⁸ Rucuáʼticaʼsëʼ tsutsu xibá queëʼ, en rusudxinëʼ léguequi lu le naca idútë li, en le naca tsahuiʼ.

⁹ Gusö́l-lëʼë Nu buáʼuö bönachi queëʼ. Tsaz nuzóëʼ didzaʼ dzaga nunëʼ. Láʼayi, en baʼa ladxiʼ naca Lëʼ.

¹⁰ Lu yöl-laʼ radxi queë́ruʼ Lëʼ risí loruʼ ridéliʼruʼ yöl-laʼ réajniʼi. Yúguʼtë nupa tun ca taʼnná bëʼ xibá queëʼ nápagaca yöl-laʼ réajniʼi. Ilaʼcuáʼticaʼsö nupa ilaʼgúʼu Lëʼ yöl-laʼ ba.