Salmos 101 - Didza' cubi rucá'ana tsahui'

¹ ¡Gul-laʼ ca runuʼ ca rnna xtídzuʼu, en ca nacuʼ tsahuiʼ! ¡Gul-laʼ yöl-laʼ ba quiuʼ Liʼ, Xan!

² Güíʼi ládxaʼa gunaʼ le naca idú dxiʼa. ¿Bátaxi huécjuʼ quiaʼ nedaʼ? Lu yuʼu lidxaʼ gunaʼ le naca idú ladxiʼ.

³ Bitiʼ guʼa lataj sóalen nedaʼ nitú le naca xihuiʼ. Bitiʼ riléʼedaʼ dxiʼa le tun nupa tuʼcáʼana Liʼ. Bitiʼ caʼ gunaʼ léguequi tsözxö́n.

⁴ Bitiʼ caʼ gacaʼ chopa ladxiʼ. Bitiʼ caʼ gunaʼ le naca döʼ.

⁵ Usunítiaʼ dërö nu bönniʼ rinnë́ʼ que luzë́ʼë balándoʼos. Bitiʼ caʼ guáʼ ilenaʼ nu run ba zxön cuini.

⁶ Uyúaʼ dxiʼa tsáhuiʼdoʼ nupa tun ca rnna xtídzaʼguequi luyú ni, para ilaʼcuáʼlen nedaʼ. Nu bitiʼ bi xiguiaʼ nabagaʼ huáca gun xichinaʼ.

⁷ Bitiʼ caʼ tsöjsóa lidxaʼ nu rizíʼ yëʼ. Bitiʼ guʼa lataj ugáʼana lahuaʼ nu ruíʼi didzaʼ le cabí naca.

⁸ Yuguʼ zila usunítiaʼ yúguʼtë nupa tuáʼ döʼ luyú ni, para ucuitaʼ lu yödzö queëʼ Xanruʼ yúguʼtë nupa tuti bönachi.