Salmos 1 - Didza' cubi rucá'ana tsahui'

¹ Bicaʼ ba bönniʼ bitiʼ runëʼ ca naca le taʼgúʼu yöl-laʼ lëʼ nupa tuʼcáʼana Dios, en bitiʼ ridálenëʼ tsözxö́n nupa tun dul-laʼ, en bitiʼ runëʼ tsözxö́n le tun nupa taʼzíʼ quidzaʼ Dios.

² Le raza ládxëʼë nácagaca xibá naguixjëʼ Xanruʼ, en ca nácagaca xibá naʼ rëla, en te dza rulaba ládxëʼë.

³ Bönniʼ ni náquiëʼ ca tu yaga dxeʼ ga naca raʼ nisa, le ribía sizxöni cateʼ ridxín dza que, en bitiʼ caʼ rizóa gubáʼayisö. Yúguʼtë le runëʼ taʼrúaj dxiʼa.

⁴ Bitiʼ raca caní quégaca nupa tuáʼ döʼ. Nácagaca ca bëbu zxe café ruáʼ le böʼ.

⁵ Que lë ni naʼ bitiʼ uluʼrúajëʼ tsahuiʼ bönniʼ tuʼë döʼ cateʼ Dios uchiʼa usörö́ëʼ quégaquiëʼ, en bitiʼ ilaʼcuʼë bönniʼ dul-laʼ ga tuʼdubëʼ bönniʼ tsahuiʼ.

⁶ Rapa chiʼë Xanruʼ Dios nöza ga taʼdë́ʼ bönniʼ tsahuiʼ naʼ, pero uniti tsaz nu ridá gapa taʼdá nupa tuáʼ döʼ.