Tito 3 - Zapoteco de Aloápam

Unní anca nu raca duelha un ca benni ria le Jesús

¹ Borexxa le ca benni ria le Cristuha udá iquicabi gue ca nu rinnabia-na, gue ca uxtisi-na lhe udocabi tisa gue ca unná lhe tseꞌe tseecabi uncabi iyá nu anca tsee lhe.

² Bittu inne güeecabi gue ca benni, niguaba itilha tisacabi len ca benni lhe. Nu unlacabi nna un tseecabi, lhatsiru uncabi len iyá benni lhe.

³ Cumu riꞌi nna anáguaba benri ttuha: Ucari benni beni nu bittu ixuu, nu bittu bedo tisa lhe. Ucari benni iquiri ganna lhe ucari attiba nu ttoꞌo lo sina gue iyáloba nu satsa raca yies lo yu-ni lhe nu satíaba beni nu bittu anca tsee lhe nu upa malisi gue adí benni lhe nu bittu uca uyú loesni lhe nu betía dile loesni lhe.

⁴ Ttiaca bisía sá beleꞌe lo Tata Do Iyyabaaha Benni bodile ri, elha tsee guee len riꞌi, ucanie gueri lhe.

⁵ Läga de benri nu anca tsee nuarca bodilá Benniha ri, de guatuba le Benniha ri nuarca bodile ri. Lee nna utúe nu lä anca tsee benriha, beonie ri benni cubi. Leni Espíritu guee benie qui ucari attiba nu uli attu libe, delába betee elha nabani cubi gueri.

⁶ De güia leri Jesucristu, Benni bodile ri, nuarca itú iqui itú le Tata Do Iyyabaaha betee Espíritu guee len riꞌi,

⁷ qui dequide chi uca lanie ri utúe ca tulha gueriha nna chi dica uxxen leri guaca banbari ttu dia lii loe. Unnua anca interés utee gueri.

⁸ Tisa anca gualí ben-ni rinnea. Larcala raca lasia sattibelha orexxalu le ca benni ca tisa-ni qui anáchu ca benni chi ria le Tata Do Iyyabaaha nna satía udo lecabi uncabi nu anca tsee. Cumu ca tisa rixxiꞌaya-ni ancaque ttu nu tsee dica ixuu len ca benni.

⁹ Ttiaca bittu udo nagalu gue ca tisa bittu dica ixuu rinne ca benni, niguaba gue ca nu rixxiꞌa gue nupaxa uca benniola guecani lhe bittuguaba udo nagalu gue ca nu ritilha tisa gue nu dia lo ca ley bocaꞌana Moisés lhe cumu tsa lägabi ixuu unná bittuguaba cue xenri qui unri aná lhe.

¹⁰ Gansi nuxa unna ilaꞌa lheꞌe loes ca benni ria le Cristuha, belisa na ttu libe, ulisalha attu libe lhe qui bittu unna anía. Gansi bittuba iyieninna lania liba nna cuequieslu nua,

¹¹ lu nna chiba yulu, unnuha nna chiba biries nua lo neda gue Tata Do Iyyabaaha. La labana rila elha disa gueni cumu de runna nu bittu anca tsee.

Bedá ca tisa-ni unne Pablo len Tito

¹² Gansi chi udhelha biꞌini lá Artemas-ni o Tíquico-ni atta relha, ben duelha italu lheꞌe yiesi Nicópolis. Nía etiꞌari cumu nía chi belaba lasia dhoa ganna chi bisía aca dilha.

¹³ Zenas biꞌini yu gue nu rá ca ley-na lhe Apolos-na lhe bencabi yuda qui bittubi eyasaquinbi gue neda guecabi.

¹⁴ Anáguaba ca benni gueri chi ria le Jesús labíaba uleꞌenlu cabi uncabi nu anca tsee len ca benni qui anáchu uncabi yuda ca benni raca duelha acacabi yuda, aná nna acacabi benni runi nu dica ixuu.

¹⁵ Iyába ca benni seꞌe-ni len neti ridhelhacabi ttu padiuxi guelu. Beteguaba ttu padiuxi quia len ca benni racaquinbi gueri lhe ria lecabi Cristuha lhe. Cuina Tata Do Iyyabaaha aca lanie iyábale. [Amén.]