Tito 2 - Zapoteco de Aloápam

Pablo rixxiꞌenbi Tito bixa uleꞌenbi ca benni

¹ Ttiaca lu nna Tito, beleꞌen ca benni ria le Cristuha ca tisa rixxiꞌa nu anca gualí anca gue Ben-na.

² Beleꞌeni ca benni unbiyuu chi anca benniola-na acacabi nu rinnabia elha rieni gueni, acacabi benni gapa ca benni cabi respeto lhe acacabi benni rinne nu gualí lhe acacabi benni ria tsitsi leni Cristuha lhe acacabi nu acani gue adí benni lhe acacabi nu satía uchía lo nu satecabi lhe.

³ Anáguaba ca nuila chi anca benniola-na, acacabi benni uni nu ruꞌu le Tata Do Iyyabaaha. Bittu acacabi nu runi xiyya gue benni lhe bittu acacabi nu dusi lhe. Lacabi nna acacabi nu ugüia adí benni guecabi qui uncana nu anca tsee,

⁴ acacabi nu uleꞌeni ca nuila cuiti-na acaquinna gue ca unbiyuu guequinna lhe gue ca xiꞌinquinna lhe

⁵ acacabi nu ridá rinnabia elha rieni gueni lhe acacabi nu uni ttagaꞌa nu anca tsee lhe acacabi nu ulaba leni gue lheꞌe lisni lhe acacabi benni tsee lhe acacabi nu udo nagani gue unbiyuu gueni lhe. Aná uncabi qui bittu inne güee ca benni gue ca tisa gue Tata Do Iyyabaaha.

⁶ Anáguaba ca unbiyuu cuiti-na, belisa cana qui acacana nu innabia elha rieni gueni.

⁷ Lu nna Tito, satía beni nu anca tsee, uca nu ugüia adí benni gueni qui aníachu uncana. Lhatsiru uleꞌelu ca tisa gue Tata Do Iyyabaaha qui uleꞌe lo lu nna bittu run lelu lhe bittu cuenta rinnelu lhe.

⁸ Tisa tsee nu dica innelu unnee, qui nuttu nubi tenná bixa innána. Aná unlu qui ettúni ca nu reseꞌe disacana lori cumu bitturu eselquinna bixa lo niꞌa gue inne güeecana gueri.

⁹ Belisa ca benni ttoꞌo lo sina-na qui udocana tisa gue iyá nu inná ca nu banquinna cana. Satía uncana nu dica tsuꞌu le ca nu banquinna cana, bittu olhopi roꞌocani ca unná lhe.

¹⁰ Bittu udaxxu sigácana ttu bixa te gue ca unná. Nu unlacana nna satía uleꞌe locana ancacana nu uxxen lee benni gueni. Qui nu runcanaha uni uleꞌe lo nu tsee runi ca tisa gue Tata Do Iyyabaaha Benni rodile ri leni ca benni.

¹¹ Tata Do Iyyabaaha beleꞌe loe elha tsee guee leni ca benni atti udhelhe Cristuha yies lo yu-ni qui odile iyába ca benni.

¹² Benna ruleꞌenie ri odhaꞌanri unri nu bittu anca tsee, bitturu udunri unri nu raca yies lo yu-ni lhe. Ruleꞌenie ri dhari innabiari elha rieni gueri lhe unri nu anca lhixxa lhe unri nu tsuꞌu lee lhe.

¹³ Aná unri laca seꞌeri ribedari isía sá gaꞌana tsee chi xen leri isíha, delába la sá esía Jesús Benni anque Cristu dedee lheꞌe xieni gaꞌana tsee guee. Benna anque Dios ra xxeni lee gueri, Benni rodile ri lhe.

¹⁴ Lee nna uxielhabe betticane qui utixe gue ca tulha gueri. Anía liba nna lhári lo iyá nu lä anca tsee benri, qui acari benni chi anca nari anca guee lhe nu tsaba udona leni uni nu anca tsee lhe.

¹⁵ Ca tisa-ni beleꞌen ca benni ria le Cristuha, lu nna teba derechu guelu ulisalu cabi qui uncabi nu rálu cabi, quisalu ca nu bittu rudocana tisa lhe. Bittu ugüelhalu cuꞌu niꞌacani lu.