Santiago 4 - Zapoteco de Aloápam

Gualibiga leni Tata Do Iyyabaaha

¹ ¿Ga riría ca elha utilha-na lhe nu runi bittu seꞌe tsee len loesle-na lhe? ¿Si läba lheꞌe nu lä anca tsee satíaba rulaba lele re lhiꞌu lheꞌe lastoole-naba riria ca unná?

² Lebiꞌi nna ridá lele nu te gue attu benni subi, ttiaca läga ridále gatta nua guele. Lo niꞌa gue unnuha nna ruꞌule ritilhale, runle duelha reguila lele gaxasná unle qui gatta nua guele. Ttiaca läga rdale iselinle nua, cumu läga rinnabale nua leni Tata Do Iyyabaaha.

³ Atti rinnabale nua nna läga ridíle nua, cumu läga rinnabale nua qui ixuinle na lhatsiru. Rinnababale nua qui unnitti lole na attiba racaba lele.

⁴ ¡Lebiꞌi, ca benni dia rudhá iquile Tata Do Iyyabaaha! ¿Si bittuba yule dequi gansi racabinri gue nu lä anca tsee te yies lo yu-ni nna riguꞌuba niꞌari Tata Do Iyyabaaha? Larcala nuxaba benni raca leni aquinna gue nu lä anca tsee raca yies lo yu-ni nna racana nu bittu do tsee leni Tata Do Iyyabaaha.

⁵ ¿Si rulaba lele dequi cuentaba rá lo ca sitsi gue Tata Do Iyyabaaha atta rinne rá?: “Espíritu gue Tata Do Iyyabaaha uluꞌe lheꞌe lastoori-na, tsitsiba racanie gueri, rdaque ttuba Tata Do Iyyabaaha aquinri guee lhe.”

⁶ Ttiaca Tata Do Iyyabaaha nna tsitsirla redá lee racanie gueri, larcala rá lo ca sitsi guee-na: “Tata Do Iyyabaaha nna redú dise lo ca nu ttaba-na, ca benni siꞌi le-na nna raca lanie cabi.”

⁷ Larcala nna gualudo tisa gue Tata Do Iyyabaaha, lo nu xxegüiha nna gualedú disa, unnuha nna guxunniba nua atta seꞌele.

⁸ Gualibiga leni Tata Do Iyyabaaha, Benniha nna güibigabe len lebiꞌi. Lebiꞌi ca nu runi nu bittu anca tsee gualudhá iquile nu satsa runle na, lebiꞌi ca nu guacala aquinle gue Tata Do Iyyabaaha o guacala aquinle gue nu te yies lo yu-ni lhe ttuba nu anca gue Tata Do Iyyabaaha gualudo lele.

⁹ Gualichacha iquile, gualexiyyani lhe gualcuesi lhe. Elha güedaca lee guele-na eyacana ubesi, elha reꞌo le guele-na nna eyacana nu seꞌe siꞌile.

¹⁰ Bittu unle dequi ancale nu ra xxeni leni lo Tata Do Iyyabaaha, Benniha nna guabequixxenbe le.

¹¹ Ca benni ria le Jesús, bittu inne güe gue loesle, cumu nu rinne güena gue ttu benni o runna unna elha uxtisi gue nua nna gue ca ley-naba benniha rinne güe nua, runna unna elha uxtisi lhe. Gansi lu runlu unlu elha uxtisi gue ca ley-na, lania nna lärga ancalu nu rudo tisa gue nu rá lo ca Ben-na, xuedaba chi beacalu gue Ben-na.

¹² Cumu tturba benni do anque xueda, delába Tata Do Iyyabaaha, lee betee ca ley-na. Benniha liba daa loe unie elha uxtisi gueri, si odile ri lhe si udelhiyye ri lhe. Lu nna ¿nú ancalu nna rdacalu unlu elha uxtisi gue attu benni subi?

Uxxen leri Tata Do Iyyabaaha gue nu unri

¹³ Nnanna nna gualdo nagale, lebiꞌi atta rinnele rále: “Nasá o uxxedila tsiari lheꞌe attu yiesi subi, níaba tseꞌeri ttu ida güettoꞌo qui gatta xxeni belhi gueri.”

¹⁴ Ttiaca lebiꞌi nna nibala yule bixa satele uxxeha, cumu elha naban gueri te yies lo yu-ni nna ancabana attiba upa, sattirba redána, lenruba nna chi renitti lona.

¹⁵ Larcala nna aníla dica innále: “Gansi Tata Do Iyyabaaha aca lanie ri aca banri nna guacaba unri unní lhe unri unná lhe.”

¹⁶ Ttiaca lebiꞌi nna tsitsiba nu runle riseꞌele rinnele leni elha ttaba guele. Iyába loesi elha ttaba-na ancana nu bittu anca tsee.

¹⁷ Larcala nna nu gua yubana bi nua anca tsee dica unna nna nianna bittu runna nua nna ancaba nua nu te tulha gueni.