Santiago 3 - Zapoteco de Aloápam

Lhusari-na ancana attiba ttu gui

¹ Ca benni ria le Jesús, lätteba ixele aquinle acale maestro. Cumu lebiꞌi nna chiba yule, riꞌitu ca nu ruleꞌentu ca benni ca tisa gue Tata Do Iyyabaaha nna tsitsirla anca elha uxtisi unie guetu atti adí benni.

² Iyábari rinittiri ixe libe. Gansi ttu benni bittuba bi rinittina leni nu rinnena, unnuha ancana ttu benni gualí du lhixxana, lana nna guadábana innabia na itúba cuerpu gueni.

³ Riꞌi nna gansi chi riguꞌuri frenu roꞌo ca coayu-na qui udocana tisa gueri nna guaridabari runri tsia ca unná daca atta raca leri.

⁴ Gualgüiaguaba gue ca barco-na. Masquiba tticaxa xxeni ancacana lhe masquiba tticaxa idí anca be richencana loenda lhe ttiaca nu rudhana barcoha nna gua rdábana rinnabiana nua qui tsiana daca atta raca leni, sunruba leni ttu yaga güexxa lána timón.

⁵ Anáguaba lhusari-na, ttu nu chicaꞌaru anca unná rapa cuerpu gueri, ttiaca leni nu rinnena xxeniba anca nu runna. Attiba ttu gui chicaꞌa ridána rugalhana ttu iꞌiyattoo xxeni.

⁶ Lhusari-na ancana attiba ttu gui. Ancabana attiba yies lo yuni-ni tsaba sana nu lä anca tsee, unná nna ancana ttu nu do lheꞌe cuerpu gueri runna ritsigari lo Tata Do Iyyabaaha itú ttuba seꞌeri yies lo yu-ni. Lana nna cuinaba nu xxegüiha runna qui runi unná tsia nittiri leni nu rinneri, cumu attiba gui gue atta lexúaha ancana.

⁷ Ca benni nna gua rdábacana ruttánacana iyáloba nimala, nu sia ttapa niꞌa náni lhe nu sia xxilani lhe nu raꞌaya lheꞌeni lo yu lhe nu yuꞌu lheꞌe indattoo-na lhe. Gua ritánabaquinna ca unná.

⁸ Ttiaca lhusari-ni nna niba ttu benni bittu chi udána uttánana unná. Unná nna ancana ttu nu lä anca tsee bittu ridá benni uttánana, tsaba sana venenu che elhutti.

⁹ Leni lhusari-na rulhari gue Tata do iyyabaaha, leni unnáguaba rigueri iqui ca benni beni Tata Do Iyyabaaha attiba anque lhe.

¹⁰ Ca benni ria le Jesús, bittu unle aná, cumu läga dica iría roꞌori-ni ca tisa rulhari gue Tata Do Iyyabaaha nianna la leni roꞌori-ni guaba rigueri.

¹¹ ¿Si gua dica la ttuba roꞌo dina atta riyaa inda, iría inda tsee leni inda ilhá?

¹² Ca benni ria le Jesús, ¿si gua dica cuia aceituna lo ttu ya igu, lo ttubaa gue besuli nna cuia igu? Anáguaba roꞌo dina atta riria inda, läga aca ttuba nía iría inda tsee lhe inda ilhá lhe.

Tata Do Iyyabaaha rute elha rieni gueri

¹³ Gansi nuxa ttule ancale nu radú leni lhe nu te elha rieni gueni lhe unnuha nna acana nu runi nu anca tsee lhe nu bittu runi ttaba lhe qui uleꞌe lo ancana nu te elha rieni gueni.

¹⁴ Ttiaca gansi reba malisi lheꞌe lastoole lhe rutía diba le loesle lhe läga dica unle ttaba dequi ancale nu yu, cumu runba lele, läga gualínle ancale nu te elha rieni gueni.

¹⁵ Cumu läga aná anca elha rieni rute Tata Do Iyyabaaha, elha rieni anca gue yies lo yu-niba unná, nu rulaba le benniba ancana, ancabana gue nu xxegüiha lhe.

¹⁶ Larcala nna atta re malisi lhe atta seꞌe nu rutía di le loesni lhe nía te elha uttilha, iyáloba nu lä anca tsee lhe.

¹⁷ Cumu ca benni te elha rieni rute Tata Do Iyyabaaha guecani nna ancacana nu runi ttagaꞌa nu tsee, nu do tsee leni iyába benni lhe nu siꞌi le lhe nu rudequini gue nu rá benni lhe nu du tsee leni lhe nu ratúa leni adí benni lhe nu satíaba runi nu anca tsee lhe nu ttuba runna leni iyába benni lhe nu bittu ni lo ni tisaba runna ttu bixa lhe.

¹⁸ Ca benni runi qui tseꞌe tsee len loesi adí benni nna salía tseencana lo Tata Do Iyyabaaha de runcana nu anca tsee.