Santiago 2 - Zapoteco de Aloápam

Bittu ugüele lidhaca ttu benni atti attu benni

¹ Ca benni ria le Jesús racatia gueni, lebiꞌi ca benni chi ria lele Jesucristu Benni bananie ri-na, benni ra xxeni le na lhe bittu aquinle suntteba gue ttulhe ca benni, a ttulhecana nna bittu aca uyúle.

² Cumu tirca saxxína gaꞌa ttu unbiyuu lheꞌe yotu atta seꞌele rulha le gue Tata Do Iyyabaaha nucu xo tsee gueni, yuꞌu xbináni ttu beꞌe ancana leni oro lhe nianna gaꞌaguaba attu unbiyuu bittu te gueni nucu xo tsuya gueni,

³ lebiꞌi nna tseeba unle leni benni nu nucu xo tsee gueniha, atti tsiattebale gále nua: “Deca ni utá ure atta anca tsee-ni.” Benni bittu te gueniha nna gáttebale na: “Lu nna natte udú”, o si “natte ure lo yu-na lhe.”

⁴ ¿Si läba ganna lania nna runbale dequi ttu benni dacaru na atti attu benni? ¿Runbale attiba run ca xueda bittu runcana elha uxtisi lhatsiru? Cumu ttu nua ruyú tseele na attu nua nna bittu ruyú tseele na.

⁵ Ca benni ria le Jesús racatia gueni, gualdo nagale nu upeale-ni: Tata Do Iyyabaaha chiba becuee benniha ca benni bittu te gueni seꞌe yies lo yu-ni qui acacabi benni ria tsitsi le cabi Ben-na, acacabi benni innabia Ben-na lhe. Unná nua anca interés chi begüee tisa ugüe ca benni racani guee.

⁶ Ttiaca lebiꞌi nna riguꞌula niꞌale ca benni bittu te guequinna. ¿Si läba ca nu te guequinna xunna rigúacana lo nále nu te guele, ralhuꞌucana le lo ca uxtisi-na lhe?

⁷ ¿Si läba ca unná gua bunna rinne güecana gue Benni du tsee lee-na, anque Jesús, Benni bananie ri, Benni uxiele qui acale guee?

⁸ Tseeba nua runle gansi rudole tisa gue nu rá lo ca ley bodhaꞌan Tata Do Iyyabaaha, cumu lo ca sitsi gue Ben-na rá: “Aquinle gue adí ca benni attiba racabin guele.”

⁹ Ttiaca gansi lebiꞌi rugüerlale lidhaca ttu benni atti attu benni nna nu te tulha guebani ancale lo Tata Do Iyyabaaha, cumu la ca ley-naba rudelhiyyaque le de bittu rudole tisa gue nu ráque.

¹⁰ Cumu gansi ttu benni rána dequi rudona tisa gue iyába nu rá ca ley-na, ttiaca bittu benna nu rá ttu ca ley-na, lania nna chiba beaca nua attiba ttu ca nu lä rudo tisa gue iyárecha ca ley-na.

¹¹ Cumu la Tata Do Iyyabaa benni re: “Bittu dica isálu nu bittu anca latselalu”, la benniha guaba nua re: “Bittu uttile benni.” Larcala nna gansi ttu benni bittuba risána nu bittu anca latselani, ttiaca runbana elhutti, unnuha nna chiba anca nua nu bittu rudo tisa gue iyárecha ca ley gue Tata Do Iyyabaaha.

¹² Larcala nna lhatsiru gualudú lele lhe lhatsiru gualnne lhe gualuni atti runi benni uni Tata Do Iyyabaaha elha uxtisi gueni leni ca ley rixuunie rodile ri.

¹³ Cumu ca benni bittu guatúa lecani attu benni subi nna tsa läga satúa le Tata Do Iyyabaaha ca nua gansi chi uca elha uxtisi guecani. Ttiaca ca benni satúa lecani attu benni subi nna tseeba salíana cana atti aca elha uxtisi guecani.

Nu anca tsee runri ruleꞌe lo ria leri Tata Do Iyyabaaha

¹⁴ Ca benni ria le Jesús, tsa lägabi te iría len ttu benni gansi rána ria leni Jesús, nianna bittu runna nu anca tsee. ¿Si gua rudhaca lele dequi careꞌaba rá nua chi ria leni Jesús gualábana bittu tsia nittina?

¹⁵ Gansi ttu nuila o si ttu unbiyuu ria lebi Jesús, bittu xobi te qui ucubi, reasagüinbi nu gobi qui galhabi sá lhe

¹⁶ nianna nux ttule nna gále biꞌiniha: “Lhatsiru beyya, beocu xolu qui raquinlu dilha lhe uto paparu lhe”, ttiaca läga rugüele biꞌiniha nu reasinbi lhe nu gobi lhe nu ucubi lhe tsa lägabi ixuu nu runleha.

¹⁷ Aníaguaba anca len ttu benni rána ria leni Jesús. Tsa lägabi ixuu nu rinne nua, gansi biba runna nu anca tsee.

¹⁸ Ttu benni nna guacaba innána: “Lu ria lelu Jesús, neti nna runia nu anca tsee.” Ttiaca neti nna ria: “¿Gasná yua dequi gualíga ria lelu gansi bittuba rilátia unlu nu anca tsee?” Neti nna de runia nu tsee nuarca ruleꞌe lo gualíba ria lasia Jesús.

¹⁹ Lu nna tseeba runlu de ria lelu ttuba ttu Tata Do Iyyabaa do. Anáguaba ca nu xxegüi-na riaguaba le ca unná ttuba ttu Tata Do Iyyabaa do. Denuala nna rixidinicana de rasbaquinna.

²⁰ ¡Ca ttipa chulhinlu! ¿Si bittuba yulu dequi lägabi ixuu nu rári ria leri Tata Do Iyyabaaha gansi bittuba runri nu anca tsee?

²¹ ¿Si läba de bedo Abraham benni uca benniola gueriha tisa utebi xiꞌinbi Isaac attiba úna lo becoha gue Tata Do Iyyabaaha nuarca rá benna uca biꞌiniha benni runi nu aca tsee?

²² Gualgüiarga, Abraham beleꞌe lobi len nu benbiha ancabi nu gualíni ria lebi Tata Do Iyyabaaha. Nu beni biꞌiniha nna benna beꞌeyubi ucabi nu ria lebi Ben-na idaꞌa su.

²³ Anía uca nna guaxxína uca attiba rába lo ca sitsi gue Tata Do Iyyabaaha atta rá: “De güia le Abraham gue Tata Do Iyyabaaha, nuarca ulequie biꞌiniha balaꞌana ancabi benni runi nu anca tsee.” Anioca nna utta lábi benni do tsee len Tata Do Iyyabaaha.

²⁴ Gualgüiarga, Tata Do Iyyabaaha nna ribequie ca benni balaꞌana ancacabi benni tsee de runcabi nu anca tsee, läga sunru de ria lecabi Ben-na.

²⁵ Aníaguaba guate Rahab, nuila nu betto cuerpu gueniha. Tata Do Iyyabaaha ulequie na balaꞌana ancana benni tsee de benna nu anca tsee atti betena atta eyaꞌana ca biꞌini dia güelhatsiha, lana nna bedhelhana ca biꞌiniha lo attu neda subi qui bittu biyaxxucabi.

²⁶ Cumu attiba ttu cuerpu bitturu espíritu gueni te, nu yattiba chi anca nua, aníagua bunna ancari gansi rári dequi ria leri Tata Do Iyyabaaha nianna bittu runri nu anca tsee.