Santiago 1 - Zapoteco de Aloápam

¹ Neti, Santiago, biꞌini rixuu lo sina gue Tata Do Iyyabaaha, lo sina gue Jesucristu Benni bananie ri-na lhe. Ridhelha ttu padiuxi guele, lebiꞌi, ca benni anca tsiꞌinu cue datía benniola gueri biꞌini utta lábi Israel, seꞌe lheꞌe gattiba ca yiesi dittu.

Bittu udhanri tsia leri Jesús atti ruyúri elha disa

² Ca benni ria le Jesús attiba neti, tsitsi gualebequi itta lele gansi chi ruyúle elha disa lo niꞌa gue ca nu ratele.

³ Lebiꞌi nna chiba yule, gansi chi ruyúle elha disa lo niꞌa gue bixa ratele, lania ruleꞌe lo gansi gualíga ria lele Tata Do Iyyabaaha, unnuha nna runi diale riseꞌe tsitsile lo neda gue Ben-na qui dhale uchíale lo nu ratele.

⁴ Larcala nna gualuni duelha gualuchía lo nu ratele, cumu unná unna dhale eꞌeyule acale benni runi nu anca tsee, nu du lhatsiru leni lhe. Análiba nna bittu bi eyasinle, qui dhale unle iyába nu raca le Tata Do Iyyabaaha.

⁵ Gansi nux ttule reasinle elha rieni nna gualinnaba leni Tata Do Iyyabaaha. Benniha nna gutebe elha rieni guele, cumu lee nna rerú iqui rerú lee rute gue iyábari, tsa läga ritisin Ben-na ni ttule.

⁶ Gueba nna gualtsia lele guadibale nu rinnabaleha, tsa bittu udú chupana lele. Cumu nu rudú chupana leniha nna ancabana attiba anca inda nu ridulí lo indattoo-na, dia dedaaba leni be-na.

⁷ Benni runi anía nna tsa bittu ulaba leni dhína nu rinnabana len Benni bananie ri-na,

⁸ cumu nu rudú chupana leniha nna bitti bittiba anca nu run nua, aníaba chi labi nua runna.

⁹ Benni ria le Jesús bittu te guebi nna eyoꞌola lebi de ancabi nu bittu te gueni, cumu Tata Do Iyyabaaha nna renie biꞌiniha balaꞌana.

¹⁰ Nu te gueniha nna eyoꞌo leni de elhida gaa Tata Do Iyyabaaha leni, cumu ca benni te guequinna ancabacana attiba ca iyya rali gue ca ixxi-na. Ttu sattirba risácana, lenla nna rattitteba iquicani.

¹¹ Gansi chi riria tatubisa-na ralhatteba yies lo yu-ni leni xieni guee, ca ixxi gaꞌa-na nna ribisttebacana, atti riodhitteba ca iyya rali guecaniha. Lania nna ritúatteba nu runi ruleꞌe tsee ca nua. Aníaguaba sate ca benni te guequinna isíaba sá gatticana, iyába nu te guecaniha nna lhuxabana.

¹² Carbáru benni dhabi utto uchíabi bittu ixú yiebi unbi nu bittu anca tsee ridá lebi unbi, cumu dequide chi betto bechíabi lo nua nna guaca banbabi ttu dia lii, benniha nua anca corona chi begüee Tata Do Iyyabaaha tisa utee leni ca benni racaquinbi guee.

¹³ Gansi nuxale isía dhaa lele unle nu lä anca tsee, bittu aquinle dequi Tata Do Iyyabaaha runie rulaba lele unle nua. Cumu Tata Do Iyyabaaha nna tsa läga risía aquin benniha unie nu lä anca tsee, bittuguaba runie qui isía acani ttu benni unna nua lhe.

¹⁴ Delaba unnuha nna cua ttu ttubari risía ridá leri raquinri unri nu lä anca tsee, cumu la nu rulaba lerihaba nua ridí yienri nna rusigana ri unri nu lä anca tseeha.

¹⁵ Nianna nu lä anca tsee rulaba leriha nna runna runri nu bittu anca tsee. Gansi chi benri nu lä anca tseeha nna ttu tsaba gattiri lo Tata Do Iyyabaaha, delába tsaba dia nittiri.

¹⁶ Ca benni ria le Jesús racatia gueni, bittu dhielhale ixú yie la lebiꞌiba.

¹⁷ Iyába nu tsee lhe iyába nu anca idaꞌa lhe iyyabaahali daa nua. Tata Do Iyyabaahaba ridhelhe nua. Labe benie iyába ca nu riguꞌu xieni sia lo bea-na. Ca unná nna rotsíaba xieni guecani, Tata Do Iyyabaaha nna satíaba anque nu anque, tsa läga rotsía benniha elha run guee attiba ttu xula resíana.

¹⁸ Labe uca lee betee elha nabani gueri atti güia leri ca tisa rixxiꞌa nu anca gualí-na, qui anáchu nna delo iyá nu benie seꞌe yies lo yu-ni nna riꞌiba ancari nu primerba ulequiesie qui acari guee.

Raca duelha unri nu rá ca tisa gue Tata Do Iyyabaaha

¹⁹ Ca benni ria le Jesús racatia gueni, iyábale primeroxa gualudo tsee nagale gue bixa rá benni. Bittu cuenta ecabixxile, bittuguaba cuenta isaꞌaxxinle lhe.

²⁰ Cumu benni risaꞌaxxiniha nna läga run nua nu radi le Tata Do Iyyabaaha.

²¹ Larcala nna gualudhequile iyárecha nu lä anca tsee lhe nu satsa dia rani xxatta yies lo yu-ni lhe. Bittu unle ttaba, gualudequile gue ca tisa gue Tata Do Iyyabaaha chi uluꞌe lheꞌe lastoole-na, cumu ca Ben-na ancaque benni dhaque odiláque le qui bittu tsia nittile.

²² Gueba nna gualuni nu rá ca tisa-na, bittu sunru udo nagale Ben-na, cumu gansi sunruba rudo nagale Ben-na, lania nna la lebiꞌiba nua rixí yiele.

²³ Cumu benni sunruba rudo nagani ca tisa-na, nianna bittu runna nu rá Ben-na, unnuha nna ancabana attiba ttu benni rugüia loni lo ttu iyya guana.

²⁴ Lana nna sunruba gansi chi rugüiana lo nua rilenna gaxasná rnnána, cumu cuantusiba requina deyyanaha nna rexulhattebinna gasná rnnána.

²⁵ Ttiaca benni rulaba tsitsi leni gue nu dia lo ca ley gue Tata Do Iyyabaaha, nianna rudobi tisa runbi nu rá lo ca Ben-na, tseeba salíana nua cumu ca tisana ancaque idaꞌa lhe dhaque odiláque benni lhe.

²⁶ Gansi nuxa benni rána dequi ancana nu ria leni Tata Do Iyyabaaha, ttiaca bittu ledinna innena, unnuha nna la laba nua rixú yiena, tsa lägabi ixuu nu rá nua dequi ancana nu ria leni Tata Do Iyyabaaha.

²⁷ Nu gualíga anca tsee radi le Tata gueri do iyyabaaha uni ttu benni ria leni Ben-na nna ancana: unri yuda ca unto bidabi-na lhe ca nuila bidabi-na lhe atti ruyúcana elha disa lo niꞌa gue bixa ratecana, bitturu unri nu lä anca tsee raca yies lo yu-ni lhe.