Romanos 3 - Zapoteco de Aloápam1 Gansi anía anca, ¿bi ribe xen ttu benni ancana nu Israel? ¿Bi ttu nu tsee dhi ttu benni de ren senni nu runcana leni ca unbiyuu Israel? 2 Ixe nu tsee dhi ca benni Israel-na. Nu primertteba nna ancana: Len ca benni Israel bodhaꞌana Tata Do Iyyabaaha ca tisa biría roꞌo cuina guee. 3 Nianna gansi ttulhe ca nu Israel-na bitturu udocana tisa gue nu rá ca tisa gue Tata Do Iyyabaaha bodhaꞌane las nácani, ¿si de unnuha nna bitturu un Ben-na nu chi re unie? 4 ¡Tsa läga un Ben-na aná! Delába unnuha nna Tata Do Iyyabaaha anque benni satíaba runie nu chi re, masquiba iyá benni ancacana nu run leni, attiba rába lo ca sitsi guee-na atta rá: Lu ancalu benni rinne nu anca gualí, dhabalu lo ca nu uni elha uxtisi guelu lhe. 5 Ttiaca gansi nu lä anca tsee runri-na rixuuna qui ruleꞌe lo anca Tata Do Iyyabaaha Benni runi nu raxxína anca tsee, nianna ¿bila innári? ¿Si innári dequi läga run tsee Ben-na atti rute elha disa gueri? (Neti nna rinneba attiba rinne ca benni seꞌe yies lo yu-ni.) 6 Tsa läga un Tata Do Iyyabaaha aná, cumu gansi Ben-na bittuba runie nu dica unie, lania nna ¿tti modu unie elha uxtisi gue ca benni seꞌe yies lo yu-ni? 7 Ttiaca gansi nu run lasiaha ancana nu rixuu qui ruleꞌe lo anca Tata Do Iyyabaaha Benni rinne nu anca gualí, anque Benni ra xxeni lee lhe ¿biacala sna rudelha iyyaba benni neti dequi anca nu runi nu lä anca tsee ganna? 8 Gansi anía anca, ¿biacala lä gá loesri: “Unlari nu lä anca tsee qui salía tseenri”? Attiba rá ttulhe ca benni xalhaba runcana xiyya guetu dequi requitu rinnetu aná. Ca unná nna ralhabacana dhicana elha disa ute Tata Do Iyyabaaha. Iyába ca benni seꞌe yies lo yu ancacana nu te tulha gueni 9 Nianna ¿si riꞌitu ca benni Israel ancatu benni runi nu anca tseeru atti adí ca benni? ¡Dica! Cumu chi beacaba ria, ca benni Israel-na lhe ca benni bittu anca benni Israel-na lhe iyábari ancari nu runi nu lä anca tsee lo Tata Do Iyyabaaha. 10 Lo ca sitsi gue Ben-na rá: Läganu benni te ancana nu tsa bittu runi nu lä anca tsee lo Tata Do Iyyabaaha. Niba ttuna nuttu te. 11 Läganu benni te radú leni gue nu anca gue Tata Do Iyyabaaha, nuttuguaba nu benni te runi eguilana Ben-na lhe. 12 Iyábacana chi bequiettacana lo neda gue Ben-na, ttuba chi binitti iyábacana. ¡Tsa läganu te uni nu anca tsee, niba ttuna nuttu te! 13 Libácani ancana attiba baa du yali roꞌoni, leni lhusacani ridí yiecana, attiba anca inda dhua belha anca ca tisa riría roꞌocani. 14 Satíaba riguecana lhe rinne dícana lhe. 15 Ruxunnibacana diacana rutticana benni lhe. 16 Gaxaba diacana rutseꞌe locana lhe runcana qui ratexxatta benni lhe. 17 Ca unná nna tsa läga yucana gaxasná tseꞌe tseecana len benni. 18 Tsaba bittu elha rasi gue Tata Do Iyyabaaha yuꞌu lheꞌe lastoocani. 19 Ttiaca riꞌi nna yuri, iyába nu rá lo ca ley gue Tata Do Iyyabaaha rinnee gue ca nu rinnabia ley-na cana, rinnee rulise cana qui eyaca si roꞌo iyácana. Aná nna oquinni iqui iyáxea benni ancacana nu te tulha gueni lo Tata Do Iyyabaaha. 20 Cumu läganu benni te ancana nu bitturu tulha gueni te lo Tata Do Iyyabaaha de runna nu rá lo ca ley-na. Cumu ca ley-na sunruba rixuuque qui yuri riꞌi ancari nu runi nu lä anca tsee. Tata Do Iyyabaaha runie ri benni bitturu tulha gueni te de ria lerie 21 Ttiaca nnanna chi ruleꞌen Tata Do Iyyabaaha ri gaxasná runie qui reacari benni tsee loe, lärga ca ley-na rixuunie qui rigúe ca tulha gueri-na. Unní riría lína leni nu rá lo ca ley-na lhe nu rá lo ca sitsi bocaꞌan ca profetaha lhe. 22 Nnanna nna Tata Do Iyyabaaha reonie ri benni bitturu tulha gueni te de ria leri Jesús Benni anque Cristu. Lee nna len iyába ca benni ria lecani Jesús runie aná. Ttuba anca iyába benni loe, 23 cumu iyába benni ancacana nu chi beni nu lä anca tsee. Larcala nna bittubi elha ralhari edí baari xieni gaꞌana tsee gue Tata Do Iyyabaaha. 24 Ttiaca de anca Ben-na benni tsee, anátteba redá lee runie reaca ca benni benni bitturu tulha gueni te, de utti Jesús Benni anque Cristu qui utixe nu dica quixari. 25 Tata Do Iyyabaaha udhelhe Jesucristuha qui uttie lo ya crusiha, belali reni guee qui bebe nu risaꞌani Tata Do Iyyabaaha. Reniha nna rixuue qui ridí Tata Do Iyyabaaha elha xen lasi gue ca benni ria lecani Jesús. Aná beni Benniha qui beleꞌe lo anque Benni runi nu anca tsee, de anque Benni re tsee leni larcala bexxulha lee gue ca tulha ben ca benni ttuha. 26 Benie aná de raca lee uleꞌe loe len riꞌi tiempu seꞌeri nnanna gaxasná runie reonie riꞌi benni bitturu tulha gueni te. Cumu attiba lee anque benni bittu te tulha guee, anáguaba runie ca benni ria lecani Jesús benni bitturu tulha gueni te. 27 Nianna riꞌi ca benni Israel, ¿gala guagaꞌari nu runri ttabaha? ¿Si chiba bitúa nua? ¿Biaca bitúa nua? ¿Si de rudori tisa gue ca ley bocaꞌana Moisés? ¡Dica! De riaba leri Jesús, nuarca bitúa nua. 28 Larcala nna boquinna iquitu rátu: Tata Do Iyyabaaha runie ca benni benni bitturu tulha gueni te de ria lecani Jesús, läga de runcana nu rá lo ca ley bocaꞌana Moisés. 29 ¿Si suntteba ca benni Israel-na anca Dios guecani Tata Do Iyyabaaha? ¿Si läba ancaguaba Ben-na Dios gue ca benni bittu anca benni Israel-na? Gualí galá, anáguaba anque Dios guecani lhe 30 cumu tturba Tata Do Iyyabaaha do. Lee runie ca benni Israel nu reni senni, nu runcana leni ca unbiyuu Israel, benni bitturu tulha gueni te de tsia lecani Jesús. Anáguaba ca benni bittu anca benni Israel nu bittu reni senni, nu runcana leni ca unbiyuu Israel lhe runguabe cana benni bitturu tulha gueni te de tsia lecani Jesús. 31 Nianna ¿si rigúabari lidhaca ca ley-na de ria leri Jesús? ¡Dica! Nu runlari nna rutelari adí lidhaca ca ley-na de ria leri Jesús. |
© 2021, Wycliffe Bible Translators, Inc. All rights reserved.
Wycliffe Bible Translators, Inc.