San Mateo 22 - Zapoteco de Aloápam

Ejemplu gue laní atta betsá ná ca benni

¹ Bodolisa dacaba Jesús ca nu lo gue ca bixxudiha lencana ca fariseo leni ejemplu, nianna re cana:

² —Atti rinnabia Tata Do Iyyabaaha ca benni raxxína leni nu beni ttu nu rinnabia gue ttu yiesi, unnuha nna benna ttu laní de betsá ná xiꞌin biyuuniha.

³ Lana nna udhelhattebana ca benni riben sina gueniha qui tsia ca nua salisacana ca benni biyaxi laníha. Ttiaca ca benni biyaxiha nna läga uca lecani tsiacana.

⁴ Nianna udhelha dacabana adí ca nu ribeni sina gueniha rán ca nua: “Gualgási ca benni raxia tseꞌe laní-na: neti nna chiba te tsetia elha go, cumu chi bettia ca uꞌuna quia lhe ca nimala rixenruha lhe. Gualtá laní iyába chi seꞌe tsee.”

⁵ Ttiaca ca unnuha nna tsa läga betabiquinna. Birialacana diacana, ttu nua biríana diana güennalhi ca lo yu gueniha, attu nua nna diana lheꞌe yoꞌo atta rutoꞌonaha,

⁶ adí ca nua nna bedaxxulacana ca nu riben sina gue nu rinnabiaha, begüeecana, betticana ca unnuha lhe.

⁷ Nu rinnabiaha nna bisaꞌattebinna nianna udhelhattebana ca soldado gueniha qui utticana ca nu ben elhuttiha, udocana gui yiesi gue ca nua lhe.

⁸ Laniala nna rána adí ca nu riben sina gueniha: “Chiba te tsee elha go gue laní-ni, ttiaca ca benni biyaxiha nna tsa lärgabi elha ralhacana itacana laní-ni.

⁹ Nnanna nna gualtsia dhuti ca atta resá lo loesi ca neda-na, gualgási iyába ca benni etiꞌale itacana laní.”

¹⁰ Ca nu riben sina gueniha nna biríattebacana lo ca nedaha, uxttebacana iyáloba benni guattiꞌacana, ca nu du tsee leni lhe ca nu bittu du tsee leni lhe. Lheꞌe yoꞌo atta raca laníha nna bisatina benni.

¹¹ ’Atti utaꞌa benni rinnabiaha qui ugüiana ca benni biyaxi laníha nna nía bilenna do ttu unbiyuu bittu nucu xoni atti nucu xo ca nu biaxi tsee laníha.

¹² Lana nna rána nua: “Xa betsito, ¿gasná uca utaꞌalu ni nna läga nucu xolu atti nucu xo ca nu biaxi tsee laní-ni?” Ttiaca unbiyuuha nna tsa bittu unnena.

¹³ Nianna nu rinnabiaha nna ráttebana ca nu riben sina gueniha: “Gualuxxica niꞌa nonna. Atti gualudelha na atta anca chulha-na, na nua atta cuesna lhe go lo layani lhe.”

¹⁴ Cumu ixeba benni raxi Tata Do Iyyabaaha, ttiaca babarba benni rucue qui acacana guee.

Rinnaba tisacana Jesús gansi gua dica quixacana belhi nu deyya Roma

¹⁵ Nianna deyyatteba ca fariseo qui unnee len loescani gue gaxasná uncana ibixxi Jesús innee ttu tisa nu ixuuquinna qui udelhiyyacane.

¹⁶ Lacana nna udhelhacana ttu chupa ca benni rudheti ca tisa ruleꞌecanaha leni attu chupa ca benni denoo nu rinnabia lá Herodes, qui gácana Jesús: —Maestro, riꞌitu nna yutu, lu nna läga run lelu, ruleꞌebalu lhixxa suba gue gaxasná raca le Tata Do Iyyabaaha tseꞌe benni. Bittuguaba rasinlu gue cadiga bi inná benni lhe cumu lu nna läga rugüialu ttixa anca ttu ttu ca benni.

¹⁷ Utixxiꞌa sanguin riꞌitu, ¿si guagaꞌana quixari len güequixa belhi nu deyya atta do nu rinnabia do lheꞌe yiesi Roma? ¿Si bittuba, aca?

¹⁸ Ttiaca Jesús yuxeabe läga anca tsee nu rulaba le ca nua uncana, nianna re cana: —Lebiꞌi, ca nu ni lo ni tisaba runi dequi ancale nu runi nu anca tsee, ¿biaca neti rdacale dhi yiele?

¹⁹ Gualuleꞌen neti ttu belhi nu rixuinri rixari na. Lacana nna beleꞌettebaquinna Benniha belhiha.

²⁰ Laniala nna unnaba tise cana re cana: —¿Nú lo unná du lo belhi-na? ¿Nú beaca láni nu dia lo unná lhe?

²¹ Lacana nna becabicana rácana: —Gue César nu rinnabia do Roma. Lania la rá Jesús cana: —Gualugüeba nu rinnabia-na nu ralhana dhína. Gualugüeguaba Tata Do Iyyabaaha nu ralhe dhie lhe.

²² Atti bienquinna nu rá Benniha nna bebanlhabaquinna. Níaba bedúcana Benniha deyyacana.

Nu aca gansi chi beacani ca benni yatti-na

²³ La sáhaguaba nna bisína ca nu saduceo atta du Jesús. Ca unnuha nna rácana dequi läga gualí reacani ca nu yatti-na. Lacana nna unnaba tisacana Jesús, rácane:

²⁴ —Maestro, lo sitsi bodhaꞌana Moisés nna rá: “Gansi ttu unbiyuu chi betsá náni gattina, lana nna nuttu xiꞌinni useꞌe leni nuila gueniha, betsi unbiyuu uttiha nna daa loni edína nuila bidabiha qui anáchu nna ca xiꞌinni tseꞌe len nuilaha nna acacana attisiba xiꞌini betsini chi uttiha.”

²⁵ Ttu libe nna useꞌe gasi betsi ca unbiyuu. Betsi xen guecaniha nna betsátteba náni, ttiaca uttittebana, niba ttu xiꞌinni bittu bisía, larcala nna beꞌanba nuila gueniha leni attu betsiniha.

²⁶ Unnuhaguaba guate nu berupaha lhe nu beyonnaha lhe ni beaba gasi betsi ca nua utti.

²⁷ Dequila nna uttiguaba nuilaha.

²⁸ Gansi chi bisía sá eyacani ca benni yatti-na, ¿núla delo gasi ca unbiyuuha aca nuilaha latselani? Cumu iyába gasicana betsá nácani len nuilaha.

²⁹ Laniala becabi Jesús re cana: —Lebiꞌi nna läga gualínle gue nu rulaba lele-na, cumu läga radú lele gue nu rá lo ca sitsi gue Tata Do Iyyabaaha, niguaba gue elha ra xxen le gue Ben-na lhe.

³⁰ Atti isía sá eyacani ca benni yatti-na, ca unbiyuu-na lhe ca nuila-na lhe lärga dica utsá nácani, lä uterguabacana ca xiꞌinquinna qui utsá nácani lhe cumu attiba anca ca ingeli seꞌe iyyabaaha, eyacacana.

³¹ Ttiaca gue gansi güeyacani ca benni yatti-na, ¿si bittuba chi belabale lo ca sitsi gue Tata Do Iyyabaaha atta re?:

³² “Neti anca Tata Do Iyyabaa gue Abraham lhe gue Isaac lhe gue Jacob lhe.” Tata Do Iyyabaaha läga anque Dios gue ca benni yatti-na, Ben-na anque Dios gue ca benni bani-na.

³³ Atti bienquin ca benni seꞌe nía iyába unní nna bebanbaquinna gue nu ruleꞌe Benniha.

Delo iyá ca ley bodhaꞌana Tata Do Iyyabaaha, ¿nú ca nua racaru duelha dho tisa gueni?

³⁴ Atti ubina ca fariseo beni Jesús beaca si ca nu saduceo nna beaxitteba loescani.

³⁵ Nianna ttu fariseo nu ancana nu ruleꞌe nu rá lo ca ley bocaꞌana Moisés unnaba tisana Jesús, uluꞌubiana dhana lo Benniha nianna ráne:

³⁶ —Maestro, ¿nú ca tisa dia lo ca ley bocaꞌana Tata Do Iyyabaaha leni Moisés racaru duelha dho tisa guee?

³⁷ Jesús becabie re: —“Aquinlu gue Tata Do Iyyabaaha Benni bananie lu itú iqui itú lelu, leni itúxea lastoolu lhe leni itú elha rieni guelu lhe.”

³⁸ Ley-na anque nu primero, benni racaru duelha dho tisa guee.

³⁹ Ley berupaha nna anque attiba benni: “Aquinlu gue ca benni attiba raquinlu gue la luba.”

⁴⁰ Delo irupa ca ley-ni nna ancaque benni deni iyába ca ley gue Tata Do Iyyabaaha, ca tisa unne ca benni uca profeta gue Ben-na lhe.

Cristuha anque benni datía David

⁴¹ Laca sna seꞌeba ca fariseo ttu reba nía, unnaba tisatteba Jesús ca nua re cana:

⁴² —¿Bi rulaba lele gue Benni anque Cristuha? ¿Nú beaca benniola gue Benniha? Lacana nna becabicana rácana: —Davidba beaque benniola gue Benniha.

⁴³ Lee nna re cana: —Gansi David ancabi benniola gue Cristuha nna ¿biacala, atti yuꞌu Espíritu gue Tata Do Iyyabaaha lheꞌe cuerpu gue biꞌiniha nna rábi Benniha: “Lu ancalu benni Baninlu neti”? Cumu David rábi:

⁴⁴ Tata Do Iyyabaaha re Cristu Benni bananie neti: “Ni udo daca lhuitta derechu quia, axta liba unia aca ca nu lä raca uyúcan lu na nu udú niꞌalu iquicani.”

⁴⁵ ¿Gansi David rábi Cristuha: “Lu ancalu Benni baninlu neti”, gasná aca David benniola gue Cristuha?

⁴⁶ Tsaba niba ttucana bittu uca guecani ecabicana gue Jesús. Bedá laniaba nna niba ttucana bitturu beaxquinna innába tisacana Benniha adí.