San Mateo 15 - Zapoteco de Aloápam

Nu runi raca ttu benni nu anca tsiga lo Tata Do Iyyabaaha

¹ Nianna ttulhe ca fariseo lencana ttu chupa ca benni ruleꞌe nu rá lo ca ley bocaꞌana Moisés daa lheꞌe yiesi Jerusalén, ubigacana unnaba tisacana Jesús rácane:

² —¿Biaca bittu rudo ca benni rudheti nu ruleꞌelha tisa gue nu beleꞌen ca benniola gueriha ri unri? Lacana läga rii nácani attiba chi labiri runri gansi chi rori etta.

³ Jesús becabie guecani re cana: —Lebiꞌi nna ¿biaca riguꞌu niꞌale nu beni Tata Do Iyyabaaha mandadu unri, qui raca rudole tisa gue nu rá ca benniola gueriha unri?

⁴ Cumu Tata Do Iyyabaaha benie mandadu re: “Gapalu respeto tata guelu lhe nan guelu lhe.” Anáguaba re: “Nu quena iqui tata gueniha o nan gueniha nna ralhaba nua gattina.”

⁵ Ttiaca lebiꞌi nna rálale dequi gua dicaba gá ttu benni tata gueniha o nan gueniha: “Bittu aca unna ttu bixa te quia guelu, cumu nu dica utea len luha nna chiba ancana úna gue Tata Do Iyyabaaha.”

⁶ Nianna nuxaba innána anía nna lärgaga daa loni utena nu reasani tata gueniha lhe nan gueniha lhe. Atti runle aná nna riguꞌuba niꞌale nu beni Tata Do Iyyabaaha mandadu unri, qui raca rusiguile rudole tisa gue nu labile runle beleꞌen ca benniola gueriha le.

⁷ ¡Lebiꞌi ca nu ni lo ni tisaba runle dequi ancale nu runi nu anca tsee! Gualíbani profeta Isaías atti unnebi utixxiꞌabi gue nu runle rábi:

⁸ Ca benni seꞌe-ni nna cuentaba rinne ca unná rácana dequi ria lecani neti, ttiaca läga gualícani ca unná racaquinna quia itú iqui itú lecani.

⁹ Cuentarba te la dequi rudú xibicani loa, cumu nu anca gue ca benni seꞌe yies lo yu-niba ruleꞌequinna ca benni, läga ruleꞌecana nu ancatia mandadu uleꞌecana.

¹⁰ Laniala nna uxi Jesús iyába ca benni seꞌe nía, nianna re cana: —Gualdo nagale quia, gualiyienini gue nu innía-ni lhe.

¹¹ Läganu ro ca benni runna acacana nu anca tsiga lo Tata Do Iyyabaaha, sinuqui nu riría roꞌo libácani runna acacana nu anca tsiga lo Ben-na.

¹² Laniala ubiga ca benni rudheti ca tisa ruleꞌe rácabi Benniha: —¿Si gua yulu, udo díbani ca fariseo-na atti bienquinna ca tisa unnelha?

¹³ Jesús becabie re: —Iyába yaga nu bittu uda Tata quia do iyyabaaha ilupibana itupa lhu-ni qui iruꞌunana.

¹⁴ Nanseꞌe gue ca unná. Nu xua loni neru lo attu nu xua loniba anca ca unná. Cumu gansi ttu nu xua loni nneruna lo attu nu xua loni nna irpaba ca nua itoetticana lheꞌe belea.

¹⁵ Pedro nna ráttebabi Jesús: —Utixxiꞌen riꞌitu bixa dia le ejemplu-na.

¹⁶ Lee nna ráttebe cabi: —¿Si niguaba lebiꞌi lä radú lele gue nu ria-ni?

¹⁷ ¿Si bittuba yule, iyába nu rori, lheꞌebari diana? Lenla nna dia nua lheꞌe atta ria benni güesaa.

¹⁸ Ttiaca ca tisa riría roꞌori, lheꞌe lastoori riríana. Unnáli bunna runna acari nu anca tsiga lo Tata Do Iyyabaaha.

¹⁹ Cumu lhiꞌu lheꞌe lastoo ca benni liba riría nu lä anca tsee rulaba lecani, nu runi racacana nu runi elhutti lhe nu runi racacana nu risá nu bittu anca latselani lhe nu runi racacana nu rutsá roꞌoni nutti nuttiba lhe nu runi racacana ubana lhe nu runi racacana nu run leni lhe nu runi racacana nu rinne güee gue benni lhe.

²⁰ Ca unná libunna runcana aca benni nu anca tsiga lo Tata Do Iyyabaaha, läganu bittu eyari nári atti gori yetta runi acari nu anca tsiga lo Ben-na.

Jesús beonie xiꞌiniunná ttu nuila dittu

²¹ Atti chi bedá Jesús nía, diattebe lo ca yu gue yiesi nu te láni Tiro leni yiesi nu te láni Sidón lhe.

²² Nía biría ttu nuila beaca lasni yiesi nu te láni Canaán, ribesiꞌanina rinnabana lo Benniha rána: —¡Benni datía David, guatúachi lelu neti, xa tata! Xiꞌiniunnáya nna yuꞌu ttu be xxegüi lheꞌe cuerpu gueni, tsitsiba nu rudhaca unnuha na.

²³ Ttiaca Jesús tsa läga becabie gue nuilaha. Ca benni rudheti ca tisa ruleꞌe Benniha nna ubigattebacabi atta due qui unnabacabi loe rácabi Benniha: —Gusi nuila-na eyyana, qui ribesiꞌana dana denalhan ri.

²⁴ Lee nna becabie re: —Tata Do Iyyabaaha nna sunruba atta seꞌe ca benni Israel-na udhelhe neti.

²⁵ Laniala nna ubiga nuilaha bedú xibini lo Jesús, nianna rána Benniha: —¡Ucachi len neti, xa tata!

²⁶ Ttiaca Benniha nna becabie gueni re na: —Läga anca tsee cuaya ttaxtila ro ca xiꞌinia-na qui udelha lo ca becu-na.

²⁷ Nuilaha nna becabina rána: —Gualíbinlu, xa tata, ttiaca axta ca becu-na rocana nu riyinna xan mexa gue ca benni beaca guecani ca unná.

²⁸ Laniala becabi Jesús re: —¡Cattipa sitsi ria lelu xa nuila! Acaba nu unnabalha. Snaba lania beaca xiꞌiniunná nuilaha.

Jesús begoe guatela ttapa mil benni

²⁹ Dequide bería Jesús nía, besinttebe roꞌo indattoo gue Galilea. Nianna gopittebe lo lhilhi do nía, atti udottebe.

³⁰ Ixeru ca benni bisína atta do Benniha. Ca unnuha nna checana ca benni xi lhe ca nu xua locani lhe ca biría lhe ca nu bittu ttu lhaꞌa niꞌacan o ttu lhaꞌa nácani te lhe adírba ca nu rani lhe. Iyába ca unnuha beseꞌecana lo Jesús. Lee nna beonttebe ca nua.

³¹ Iyába ca benni seꞌe nía bebanquinna atti biláquinna rinne ca nu uca biríaha, ca nu bittu ttu lhaꞌa niꞌacani o lhaꞌa nácani te nna beacacana idaꞌa, ca nu xiha nna raca ridacana, ca nu xua locaniha nna riláquinna. Lacana nna udulottebacana ulequi xencana Tata Do Iyyabaaha, Benni anque Dios gue ca benni Israel.

³² Uxitteba Jesús ca benni rudheti ca tisa ruleꞌe, nianna re ca biꞌiniha: —Resiꞌirutia ca benni seꞌe-ni, cumu chi uca tsunna ubisa seꞌecana len neti, lacana nna tsa bittu te bixa gocana. Neti nna bittu raca lasia edhelha cana bittu chi utocana, qui cadirba satú lecani neda.

³³ Ca benni rudheti ca tisa ruleꞌe nna ráttebacabi Benniha: —Güelha, ¿ga saxxíri xxeni ttaxtila qui go ttonáli ca benni, inqui lo yu bisi bunni seꞌeri nna?

³⁴ Jesús unnaba tise re ca biꞌiniha: —¿Balha ttaxtila te guele? Lacabi nna becabicabi rácabi: —Gasirba ttaxtila te, a ttu chupa ca belha chicaꞌa nna.

³⁵ Laniala nna benie mandadu bebía iyába ca benni seꞌe nía lo yu.

³⁶ Lee nna bedaxxuttebe gasi ca ttaxtilaha len ca belhaha. Dequide chi begüee xquixaru len Tata Do Iyyabaaha, ulhaꞌattebe ca benniha begüee ca benni rudheti ca tisa ruleꞌe. Ca biꞌiniha nna utidhittebacabi benniha gue iyába ca benni seꞌe nía.

³⁷ Iyába ca benni seꞌe nía utocana axta qui belquinna bodaparla ca benni rudheti ca tisa ruleꞌe a gasi sumi ca pedazu bexxa uto ca nua.

³⁸ Attiba tu ttapa mil ca unbiyuu uto ttaxtilaha, bittu lä bibaba ca benni nuilaha len ca untoha.

³⁹ Dequide bechú tisa Jesús ca benni seꞌe nía, beopittebe lo barcoha deyye daca lo yu te láni Magdala.