San Mateo 1 - Zapoteco de Aloápam

Ni dia lá ca benni datía Jesucristu

¹ Lo sitsi-ni dia lá ca benni datía Jesucristu. Lee anque benni datía David, benni datía Abraham lhe.

² Abraham ucabi tata gue Isaac. Isaac ucabi tata gue Jacob. Jacob ucabi tata gue Judá, adí ca betsibiha lhe.

³ Judá ucabi tata gue Fares, Zara lhe. Nan guecabi nna uca Tamar. Fares ucabi tata gue Esrom. Esrom ucabi tata gue Aram.

⁴ Aram ucabi tata gue Aminadab. Aminadab ucabi tata gue Naasón. Naasón ucabi tata gue Salmón.

⁵ Salmón ucabi tata gue Booz. Nan gue Booz nna lábi Rahab. Booz ucabi tata gue Obed. Nan guenna lábi Rut. Obed ucabi tata gue Isaí.

⁶ Isaí ucabi tata gue David biꞌini unnabia ca benni Israel. David ucabi tata gue Salomón. Nan gue Salomón nna ucabi nuila gue Urías.

⁷ Salomón ucabi tata gue Roboam. Roboam ucabi tata gue Abías. Abías ucabi tata gue Asa.

⁸ Asa ucabi tata gue Josafat. Josafat ucabi tata gue Joram. Joram ucabi tata gue Uzías.

⁹ Uzías ucabi tata gue Jotam. Jotam ucabi tata gue Acaz. Acaz ucabi tata gue Ezequías.

¹⁰ Ezequías ucabi tata gue Manasés. Manasés ucabi tata gue Amón. Amón ucabi tata gue Josías.

¹¹ Josías ucabi tata gue Jeconías tata gue ca betsi biꞌiniha lhe. La idaha nua atti bedaxxu ca nu Babilonia ca benni Israel bechecan cabi daca lo yu guecaniha.

¹² Dequide chi bisíncabi Babilonia nna Jeconías nna ucabi tata gue Salatiel. Salatiel ucabi tata gue Zorobabel.

¹³ Zorobabel ucabi tata gue Abiud. Abiud ucabi tata gue Eliaquim. Eliaquim ucabi tata gue Azor.

¹⁴ Azor ucabi tata gue Sadoc. Sadoc ucabi tata gue Aquim. Aquim ucabi tata gue Eliud.

¹⁵ Eliud ucabi tata gue Eleazar. Eleazar ucabi tata gue Matán. Matán ucabi tata gue Jacob.

¹⁶ Jacob ucabi tata gue José biꞌini uca unbiyuu gue María, nan gue Jesús, Benni anque Cristu.

¹⁷ Larcala nna sitá (14) libixxi chi utee desdeba Abraham axta atti uli David. A sitá (14) libixxi chi ute ridú lori leni David axta atti beche ca nu Babilonia ca benni Israel daca lo yu guecaniha. A sitá (14) libixxi chi ute ridú lori desde lania axta atti bisía Benni anque Cristu.

Aní uca atti uli Jesús

¹⁸ Aní uca atti uli Jesucristuha: María, nan gue Jesús, chiba du José rinnababi biꞌiniha qui utsá nácabi, ttiaca antisla tseꞌe len loescabi nna beni Espíritu gue Tata Do Iyyabaaha bija xiꞌini María.

¹⁹ José biꞌini dhi María nna ancabi ttu benni du tsee lebi. Denuala nna bittu raca lebi inne güe benni gue María. Larcala nna belaba le José sigába uquiettabi lo biꞌiniha.

²⁰ Ttiaca laca rulaba lebi unbi anía, lo bisiela guebi nna beleꞌenbi ttu ingeli udhelha Tata Do Iyyabaaha, nianna rá ingeliha bi: —José, biꞌini datía David, bittu gasinlu utsá nálu leni María-na, cumu Espíritu gue Tata Do Iyyabaahaba benie qui ujabi unto nujabi-na.

²¹ Labi nna cuꞌubi ttu unbiyuuto. Benniha nna quixxalu lee Jesús. Aná gatta lee cumu Ben-na odile ca benni guee lo nu lä anca tsee runcana.

²² Iyába unní uca qui guaxxína nu chi rá Tata Do Iyyabaaha profeta Isaías. Biꞌiniha nna utixxiꞌabi rábi:

²³ Ttu nu rbani uja xiꞌinbi, Labi nna cuꞌubi ttu unbiyuuto. Untoha nna gatta lee Emanuel. Emanuel nna dienna innána: Tata Do Iyyabaaha due len riꞌi.

²⁴ Atti bebani José nna benbabi nu beni ingeli gue Tata Do Iyyabaaha mandadu unbi, labi nna betsába nábi leni María.

²⁵ Ttiaca läga bisá loescabi, axta liba dequide chi uli untoha. Labi nna begüeebi lá untoha Jesús.