San Marcos 6 - Zapoteco de Aloápam

Ca benni seꞌe lheꞌe yiesi Nazaret riguꞌu niꞌacani Jesús

¹ Bedába Jesús nía nna deyyattebe lenie ca benni rudheti ca tisa ruleꞌe lheꞌe yiesi atta doe.

² Atti bisía sá redí le ca benni Israel, udulottebe beleꞌenie ca benni seꞌe lheꞌe yoꞌo atta rudheti ca benni Israel ca tisa gue Tata Do Iyyabaaha. Atti bienquin nua ca tisa rinne Benniha nna ixerucana bebanquinna nianna unnaba tisa loescani rácana: —¿Ga guadheti unná iyá ca tisa rinnen-na? ¿Nú betena elha rieni gueni lhe gasná runna raca gueni runna ca milagru-na lhe?

³ ¿Läba carpintero xiꞌini María bunni nna betsi Jacobo lhe José lhe Judas lhe Simón lhe? ¿Si läba niguaba seꞌe ca dana unní len riꞌi lheꞌe yiesi-ni lhe? Lo niꞌa gue unnuha nna udulottebacana ucaquinna.

⁴ Ttiaca Jesús ráttebe cana: —Gaxaba nua nna gua riaba lecani ttu benni anca profeta, ttiaca lheꞌe yiesi atta beaca lasniha tsa läga ria lecan nua, niguaba ca nu datíana lhe niguaba ca nu seꞌe lheꞌe lisni lhe.

⁵ Nioca nuarca bittu uca unie ca milagru nía. Sunruba ttu chupa ca benni rani bexxúa nee iquicaniha beacacana.

⁶ Lee nna rebanbanie gue ca nua cumu bittu ria lecanie. Laniala beríe nía die lheꞌe adí ca yiesi seꞌe gaxxa güeleꞌeni ca benni.

Jesús ridhelhe ca benni rudheti ca tisa ruleꞌe satixxiꞌacabi ca tisa gue Tata Do Iyyabaaha

⁷ Jesús uxttebe ca benni tsiꞌinu rudheti ca tisa ruleꞌe qui idhelhe chupa chupacabi. Beteguabe derechu len ca biꞌiniha qui uría lacabi ca be xxegüi.

⁸ Nianna benttebe mandadu: —Tsa bittubi ujale gue neda guele, suntterba ttu garroti dhenle. Bittuguaba ujale chuba atta cuꞌu guele lhe niguaba nu gole lhe niguaba belhi lhe.

⁹ Guacaba cuꞌu niꞌale guaracha, ttiaca bittu dica ujale attu cue xole.

¹⁰ Ráguabe cabi: —Gansi chi utaꞌale lheꞌe ttu yoꞌo, níaba gualtseꞌe axta liba gansi chi bedále eríale nía.

¹¹ Gansi lheꞌe tu yiesi bittu ulabican le, bittuguaba udo nagacani guele lhe gualería nía, gualucuibi tte biste yu anca niꞌaleha, cumu unnuha uleꞌe lo läga beꞌo le Tata Do Iyyabaaha nu ben ca nua. [Gualíbatia ria le, gansi chi bisía sá lhuxa yies lo yu-ni tsitsirla elha disa uyú ca nua atti ca nu beaca lascani yiesi lá Sodoma len Gomorra.]

¹² Laniala nna biríatteba ca benni rudheti ca tisa ruleꞌe diacabi riguixxiꞌencabi ca benni qui odú xiyyancana, odaxxucana neda gue Tata Do Iyyabaaha lhe.

¹³ Ixeru ca be xxegüi bebeacabi lheꞌe cuerpu gue ca benni, ixeguaba ca nu rani beoncabi lhe rigabicabi ca nua seti lhe.

Juan biꞌini rugadi indaha uttibi

¹⁴ Herodes nu rinnabiaha binattebana gue nu runi Jesús, cumu lheꞌe iyába ca yiesi seꞌe nía chi bina benni gue nu run Benniha, ttu lhe benni nna rácana: —Juan biꞌinni begadi ca benni indahaba biꞌiniha beaquinbi attu libe, beríabi lheꞌe baa atta yuꞌu ca nu yatti-na. Nuarca ridábi runbi ca milagru-na.

¹⁵ Adí benni nna redenácana: —Gaxa profeta Elíasba biꞌin-na. A ttulhecana nna redenácana: —Gaxa profetaba unná o ttu ca profeta ra xxeni leni useꞌe atti nía bunna.

¹⁶ Ttiaca atti bienin Herodes rá ca benni anía, ráttebana: —Juan nu benia mandadu uchecucana choettuiquiniha bunna. Nnanna nna beacabinna attu libe.

¹⁷ Cumu cuinaba Herodes benna mandadu ca nu güia guadaxxucana Juan, ca unnuha nna bexxicacan biꞌiniha len cadena atti bedelhacan bi lisiyya lo niꞌa gue nuila gueni lá Herodías, nu uca nuila gue betsini Felipe, cumu Herodesba utúan nua udo lenna.

¹⁸ Denua nna rá Juan Herodes: —Bittu dica edo lenlu nuila gue betsilha.

¹⁹ Lo niꞌa gue unnuha nna uluꞌutteba le Herodías Juan. Nuarcala nna rdacana uttina biꞌiniha. Ttiaca läga rdana,

²⁰ cumu Herodes nna rasbinna lo biꞌiniha denuala nna läga rugüelhana nuxa bixa udhaquinna biꞌiniha cumu guayú xeabana anca biꞌiniha ttu benni runi nu anca tsee, ancabi benni do riesi anca gue Tata Do Iyyabaaha lhe. Masquiba gansi chi rienin Herodes rinne biꞌiniha nna tsaba bittuba rería niꞌelhinna bixa unna ttiaca tseeba reꞌo leni rudo nagani nu rá biꞌiniha.

²¹ Axta liba bisía sá atti bedaxxu Herodes attu ida subi, lania nua beni Herodías nu raca leni. La sáha nna beni Herodes ttu laní. Lana nna uxttebana ca nu rinnabia riseꞌe cuꞌeniha, ca nu lo gue ca soldadoha lhe ca benni ra xxeni ru lecani seꞌe lo yu te láni Galilea lhe qui uto lenna ca nua yetta.

²² Xiꞌiniunná Herodías nna utaꞌattebana beyaꞌana atta sia ca nua go. Herodes nna beꞌo juisiaba leni gue nua, anáguaba ca nu sia lenna go yettaha lhe. Larcala rána uncuitiha: —Unnaba neti bixaba raca lelu, neti nna guteba nua len luu.

²³ Nianna axtaba bocaꞌan tsitsi tisa gueni lo nua rán-na: —Bixaba innábalu len neti nna gunnaba nua, masquiba innábalu salhe xea lo ca yu atta rinnabiaya-ni.

²⁴ Uncuitiha nna beríatteba nua deyyana guannaba tisana nan gueniha rán-na: —¿Bi innába? Unnuha nna becabittebana rán-na: —Iqui Juan nu rugadi ca benni inda-na unnaba.

²⁵ Uncuitiha nna ruxunnini nua betaꞌana atta do Herodes, nianna ráttebana nua: —Neti nna raca lasia, nnannatte unnalu choettuiqui Juan nu rugadi ca benni inda-na yuꞌuna lheꞌe ttu platu.

²⁶ Herodes nna attulade siꞌirurba runna atti bieninna nu rá nua, ttiaca cumu chi begüeena tisa aníba lo ca nu sia lenna nía, nuarca bedobana tisa gue nu rá uncuitiha na.

²⁷ Laniala nna udhelhattebana ttu ca soldado gueniha tsiana saxxína iqui Juan. Soldadoha nna güiattebana guachecuna iqui Juan lheꞌe lisiyyaha.

²⁸ Nianna beguꞌuttebana nua lheꞌe ttu platu denojana deyyana begüeena uncuitiha. Uncuitiha nna begüeettebana nan gueniha nua.

²⁹ Atti bina ca benni bedheti nu beleꞌe Juan gue nu ucaha nna güiattebacabi guaxícabi cuerpu gue biꞌiniha qui guacatsicabi cuerpuha lheꞌe baa.

Jesús rugoe gayu mil ca benni ttaxtila

³⁰ Dequide besini ca biꞌini rudheti ca tisa ruleꞌe Jesús nna beselattebacabi Jesús. Nianna uttixxiꞌattebaquinbi Benniha iyába nu bencabi lhe nu beleꞌencabi ca benni lhe.

³¹ Jesús ráttebe cabi: —Gualtá tsiari suntteba riꞌi attu atta subi atta nuttu nu benni seꞌe qui aca edí leri ttu satti. Aníaba rá Jesús cumu de dia lhe dedaa lhe ixeru benni atta seꞌecabiha nuarca niba yetta lä raca gocabi.

³² Nioca nna diatteba suntteba laque lo ttu barco atta nuttu benni seꞌe.

³³ Ttiaca ixeru ca benni atti biláquinna biríaque diaque lo barcoha nna beonbiattebacana ca benniha. Larcala ca benni seꞌe lheꞌe iyába ca yiesi seꞌe nía, bigaattebacana diacana atta chinca isín ca benniha. Lola ca unnuha bisína nía atti ca benni dia lo barcoha.

³⁴ Atti guadi Jesús lo barcoha nna biláttebanie ixeru benni chi seꞌe nía. Lee nna besiꞌittebanie ca nua cumu ancacana attiba carneꞌe nuttu xxanni te. Lee nna ixe loba nu uduloe beleꞌenie cana.

³⁵ Atti chi ulha sá nna ubigatteba ca benni rudheti ca tisa ruleꞌe Jesús rácabi Benniha: —Chiba ulha sá nna ni nna tsa lägabi yoꞌo sia.

³⁶ Larcala nna bechú tisa ca benni seꞌe-ni qui eyyacana ca ranchu-na, lheꞌe ca lheꞌesi seꞌe gaxxa-na lhe qui sayoꞌocana ttu bixa gocana.

³⁷ Ttiaca Jesús becabittebe re cabi: —Lebiꞌiba gualute nu gocana. Ca benni rudheti ca tisa ruleꞌe nna becabittebacabi rácabi: —¿Na belhi gue chupa gayua ubisa sina qui sadhenna iyoꞌo ttaxtila go iyá ca unní?

³⁸ Jesús ráttebe cabi: —Gualtsia gualsagüia, ¿balha taxtila te guele? Dequide chi guagüiacabi nna ráttebacabi: —Sunruba gayu ttaxtila nna chupa belha nna te.

³⁹ Laniala nna benie mandadu ebía ttu ttu xxia ca nua lo ixxi gaꞌaha.

⁴⁰ Lheꞌe ttu ttu ca xxiaha nna seꞌe medi gayua (50) nna ttu gayua (100) nna ca benni.

⁴¹ Jesús bedaxxuttebe gayu ca ttaxtilaha leni irupaba ca belhaha, nianna ulhidhatteba loe begüie iyyabaaha, begüee xquixaru Tata Do Iyyabaaha. Atti ulhaꞌattebe lheꞌe ca ttaxtilaha begüee ca benni rudheti ca tisa ruleꞌe qui quidhicabi gue ca benni sia nía. Aníaguaba benie len ca belhaha lhe.

⁴² Iyába ca benni seꞌe nía utocana bedaa belbaquinna.

⁴³ Bodaparlacabi a tsiꞌinu sumi bisá ttitti ca pedazu ttaxtilaha lhe ca belha bexxa utocanaha lhe.

⁴⁴ Attiba tu gayu mil ca unbiyuu uto ttaxtilaha.

Jesús ridee lo indattooha

⁴⁵ Dequide unnuha nna bentteba Jesús mandadu eyopi ca benni rudheti ca tisa ruleꞌe lo barcoha qui enerucabi elhácabi attu ladu gue indattooha, tsiacabi daca lheꞌe yiesi Betsaida, laca lee nna rechú tise ca benni seꞌe nía.

⁴⁶ Dequide chi bechú tise ca benni seꞌe nía nna gopittebe lo lhilhi do nía qui innee lenie Tata Do Iyyabaaha.

⁴⁷ Atti chi uca lo relaha nna rulha gue indattooha lí chi dia barcoha. Atturba Jesús beꞌane lo yu te roꞌo indattooha.

⁴⁸ Lee nna biláttebanie ca benni tsiꞌinu rudheti ca tisa ruleꞌe tsapatteba ratecabi diacabi rudhacabi barcoha, cumu de daa xxatta be daca atta diacabiha. Atti chi daa raniha nna udátteba Jesús lo indattooha die daca atta seꞌe ca biꞌini rudheti ca tisa ruleꞌe. Lee nna benttebe tte xeabe atta seꞌe ca biꞌiniha.

⁴⁹ Atti biláquinbi benniha die ridee lo indattooha nna uresiꞌattebacabi, cumu ucaquinbi ga nu iꞌiyaba nua.

⁵⁰ Iyábacabi usincabi atti bilencabi Benniha. Lee nna unnettebe re ca biꞌiniha: —Neti bunni. ¡Tsitsi gualcuequi lele, bittu gasinle!

⁵¹ Gopibe lo barcoha nna uretteba beha. Ca biꞌiniha nna rebantsitsiabaquinbi, raca teequinbi lhe

⁵² cumu itú ttuaba nna läga chi guadú lecabi gue nu ben Jesús len ca ttaxtilaha de sna yayaba elha rieni guecabi.

⁵³ Dequide chi ulhácabi ttu ladu gue indattooha nna bisínttebacabi lo yu nu te láni Genesaret. Níaba bexxicacabi barcoha roꞌo indattooha.

⁵⁴ Cuantusiba goadicabi lo barcoha nna beonbiatteba ca benni seꞌe nía Jesús.

⁵⁵ Bigaattebacana beyyacana lheꞌe iyába ca yiesi seꞌe nía, guaxícana ca nu rani guecaniha. Ca unnuha nna lo bretaba xua ca nua dia lencan cana atta chi binacana bisín Jesús.

⁵⁶ Gaxaba risine si lheꞌe yiesi xxeni lhe si lheꞌe ca lheꞌesi lhe o atta seꞌe ca ranchu lhe ribequitteba ca benni seꞌe nía ca nu rani guecaniha roꞌo ca neda, atti rinne siꞌittebacana loe qui ugüelhe ca nu raniha udaxxucana ladiba roꞌo xoe. Iyába ca nu radaxxu roꞌo xo Benniha nna reacattebacana.