San Marcos 5 - Zapoteco de Aloápam

Jesús beonie ttu unbiyuu yuꞌu be xxegüi lheꞌe cuerpu gueni

¹ Bisínba Jesús lenie ca benni rudheti ca tisa ruleꞌe attu ladu gue indattooha roꞌo yu gue yiesi te láni Gadara.

² Atti chi goadi Jesús lo barcoha nna xeaba biríatteba ttu unbiyuu yuꞌu be xxegüi lheꞌe cuerpu gueni lheꞌe campioniha, dana esána Benniha.

³ Unnuha nna atta sia ca baa gue ca nu yatti yuꞌu níaba anca lis nua. Tsaba nuttu nu ridána uxxicana nua, niba leni cadena.

⁴ Ixe libe chi bexxicacana niꞌa ná nua leni cadena, ttiaca lana nna richúttebana ca nua atti ruduyyan ca nua. Tsaba nuttu nu ridána loni.

⁵ Rela resába ribenna ribesiꞌana lheꞌe campioniha, ca lo lhilhiha lhe run güee cuerpu gueni len ca iyya lhe.

⁶ Ttiaca atti bilenna Jesús, idittuli daa Benniha, lana nna bigaattebana guatsána Benniha bedú xibini loe,

⁷ atti ribesiꞌanina ráne: —¿Bittu ettegaꞌa guelu len neti, Jesús Xiꞌini Tata Do Iyyabaaha Benni ra xxeni lee? ¡Neti rinnaba lolu benchi lo niꞌa gue Tata Do Iyyabaaha bittu utelu elha disa quia!

⁸ Anía rána cumu Jesús re na: —¡Be xxegüi, bería lheꞌe cuerpu gue unbiyuu-na!

⁹ Jesús unnaba tisattebe be xegüiha re na: —¿Bi lálu? Unnuha nna becabina rána: —Legiónba lá neti, cumu ixe riꞌitu raca.

¹⁰ Ududitilhabana unnabana leni Jesús qui bittu cuequie cana lo yu atta seꞌecanaha.

¹¹ Gaxxaba nía, lati iꞌiya do nía, yuꞌu ixeru ca cutsi go.

¹² Ca be xxegüiha nna unnabaxxattacana lo Jesús rácane: —Udhelhachi riꞌitu atta yuꞌu ca cutsi-na qui gaꞌatu lheꞌe ca unná.

¹³ Jesús uxielhabe. Ca be xxegüiha nna beríatteba ca nua lheꞌe unbiyuuha, atti utaꞌattebacana lheꞌe ca cutsiha. Attiba tu chupa mil ca cutsiha raca, ca unnuha nna bigaattebacana diacana bitoetticana roꞌo ttu belhaꞌa daa nía biyinnacana lheꞌe indattooha. Níaba utti ca nua de gopicana inda.

¹⁴ Ca nu rapa ca cutsiha nna bigaattebacana deyyacana guattixxiꞌaquinna ca benni seꞌe lheꞌe yiesiha, ca benni seꞌe lheꞌe ca ranchuha lhe gue nu ucaha. Ca unnuha nna güiattebacana güegüia bixa nua uca.

¹⁵ Atti bisíncana atta du Jesús, níaba biláquinna unbiyuu nu uyuꞌu ca be xxegüi lheꞌe cuerpu gueniha dona, chi bedoenna nibisa lhe chi nucu xoni lhe lacana nna uslaquinna.

¹⁶ Ca nu begüiacana nu guate nu uyuꞌu ca be xxegüi lheꞌe cuerpu gueniha lhe nu guate ca cutsiha lhe utixxiꞌattebaquinna ca benni bisína nía iyába nu ucaha.

¹⁷ Laniala nna unnabaxxattacana lo Jesús qui eríe lo yu guecaniha.

¹⁸ Atti chi reopie lo barcoha nna rátteba unbiyuu nu uyuꞌu ca be xxegüi lheꞌe cuerpu gueniha Benniha ugüelhe na tsiana len lee.

¹⁹ Ttiaca Jesús läga begüeelhe. Nianna ráttebe na: —Beyya len ca benni datíalu seꞌe lheꞌe yoꞌo gueluha, guatixxiꞌaquinna gue iyá nu chi beni Benni bananie lu-na len lu, gue ttixuca besiꞌinie lu lhe.

²⁰ Unbiyuuha nna güequittebana deyyana. Nianna udulottebana utixxiꞌenna ca benni seꞌe lheꞌe ca yiesi seꞌe lo yu te láni Decápolis gue nu beni Jesús len lana. Iyába ca benni, tsitsiba bebanquinna.

Jesús beonie nuila utana roꞌo xoe lhe xiꞌiniunná Jairo lhe

²¹ Dequide chi besini Jesús len barcoha daca attu ladu gue indattooha, bebiꞌatteba ixeru ca benni benniha atta due roꞌo indattooha.

²² Attirba chi bisína Jairo ttu ca nu banani yoꞌo atta rudheti ca benni Israel ca tisa gue Tata Do Iyyabaaha. Atti bilen nua Jesús, bedútteba xibini lo Benniha.

²³ Nianna unnesiꞌixxattattebana ráne: —Chi ratti xiꞌiniunnáyaha. Utáxxi bexxúa nálu iquini qui eyacana, bittu gattina.

²⁴ Jesús diatteba lenie na. Ixeru ca benni dia denocana Benniha, larcala ruquílhabacane.

²⁵ Lagüi ca benni dia denoha, nía nutsa ttu nuila chi uca tsiꞌinu (12) ida yuꞌuna isagüe rulalna reni.

²⁶ Nuilaha nna chi guatelhabana lo ixe ca nu run ramedi. Iyába nu tee gueni chi bea bennitti lona qui rixan ca nua, ttiaca niba saroꞌo lä rilhida gana gueni, adílaba diana rielhana.

²⁷ Atti binana gue nu run Jesús, utaꞌattebana lagüi ca benni deno Benniha qui uca ubigana daca cuꞌe Benniha utanana roꞌo xoe,

²⁸ cumu raquinna: “Gansi dhaba satana ladiba roꞌo xo Ben-na, lania nna güeyacaba.”

²⁹ Atti utanana roꞌo xo Jesús, la laniatteba nna udú si nu ritsigana. Lana nna guannittebinna chi bitúa isagüeha latini.

³⁰ Jesús ute daattebanie beaca ttu benni rani len elha ra xxeni lee guee. Lee nna bequittebe begüie lo iyába ca nu seꞌe nía atti ráttebe: —¿Núnna bettettanana roꞌo xoa?

³¹ Ca benni rudheti ca tisa ruleꞌe nna ráttebacabi Benniha: —La gua rugüiabalu aníli de ruquí ca benni seꞌe-ni lu nna gua rárlu: “¿Núnna bettettanana roꞌo xoa?”

³² Ttiaca Jesús ttu besiguibe rugüie sabiꞌaba atta due qui ilánie nuxa nua utanana roꞌo xoe.

³³ Nuilaha nna cumu yu galábana nu uca len lana, nuarca rixidinina de rasbinna atti güiattebana guadú xibini lo Benniha. Nianna utixxiꞌattebinna Benniha gue iyába nu chi guatena.

³⁴ Jesús nna ráttebe nuilaha: —Xiꞌini, cumu de güia lelu guadába eyonia lu, nuarca beacalu. Xen su lee beyya nnanna. Chiba bitúa isagüe gueluha latilu.

³⁵ Sna duba Jesús rinnee, attirba chi bisína ttu chupa ca benni daa lheꞌe yoꞌo gue Jairo nu banani yoꞌo atta rudheti ca benni Israel ca tisa gue Tata Do Iyyabaaha, rácana Jairo: —Chi utti xiꞌiniunnáluha. ¡Bitturu utsitsinlu Maestro-na!

³⁶ Ttiaca Jesús tsa läga bedo nague gue ca nua. Nianna ráttebe Jairo: —Bittu gasinlu. Lu nna suntteba güia lelu neti.

³⁷ Tsa nutturu nurua begüeelhe sanone, suntterba Pedro lenbi Jacobo, Juan betsi Jacobo nna.

³⁸ Atti chi bisíncabi atta do yoꞌo gue Jairo, biláttebanie ca benni chi risatsa nía, nu ribesba lhe ca nu tsitsiba de nu runcana de rexiyyaxxattaquinna lhe.

³⁹ Lee nna utaꞌattebe lheꞌe yoꞌoha re ca nua: —¿Biaca análi de nu runle, ribesixxattale lhe? Nuilato-na läga utti unná. Tiꞌedhi bunna.

⁴⁰ Ca benni seꞌe nía nna bedacalaquinna gue Jesús, ttiaca lee nna benttebe mandadu bería iyárecha ca benni seꞌe nía, atti utaꞌattebe atta te nuilatoha lanie ca tata nan gue nua, a tsunna ca benni rudheti ca tisa ruleꞌe nna.

⁴¹ Nianna bedaxxuttebe ná nuilatoha re na: —Talita cumi. (Ca tisa-ni nna diaquinna innácana: Nuilato, lu rulisa, guadha.)

⁴² Uncuitiha nna chiba anquinna tsiꞌinu (12) ida, larcala xeaba guadhatteba nua udána. Ca benni seꞌe nía nna tsitsiba bebanquinna.

⁴³ Jesús tsitsiba belise cana re cana: Tsa bittu quixxiꞌaquinna ni ttu benni gue nu ucaha. Nianna ráttebe cana ugüecana nuilatoha yetta gona.