San Marcos 14 - Zapoteco de Aloápam

Reguila le ca nu lo gue ca nu Israel gaxasná uncana utticana Jesús

¹ A chupa ubisaba reasa isía laní nu te láni Pascua, atti ro ca benni Israel ttaxtila nu bittu dia lenna levadura. Ca nu lo gue ca bixxudiha lencana ca nu ruleꞌe nu rá lo ca ley bocaꞌana Moisés reguila lecani gaxasná uncana qui udaxxucana Jesús. Lacana nna cuentaba uncana xiyya guee dequi benie ttu nu bittu dica unie qui aca utticane.

² Ttiaca lacana nna rácana: —Bittu unri aná lheꞌe laní-ni qui bittu utsatsari benni.

Ttu nuila rudona seti rure xixxi iqui Jesús

³ Atti do Jesús lheꞌe yiesi nu te láni Betania, lisi Simón biꞌini teequinna lábi nu uca lepra. Laca doe go etta nna bisíntteba ttu nuila nojana ttu cantito ancana leni ttu iyya tsee nu te láni alabastro, taꞌa seti rure xixxi daca yaxi lheꞌeni. Seti rure ixixxiha nna ancana gue ttu yaga nu te láni nardo. Nuilaha nna udhalttebana roꞌo canti atta taꞌa setiha, atti bedottebana nua iqui Jesús.

⁴ Ttulhe ca nu sia nía nna bisaꞌattebaquinna. Nianna rátteba loescani: —¿Biaca güia latti seti nu rure ixixxi-ni?

⁵ Tseerla ttirca bitoꞌo seti-na. Bennarlacana belhi gue tsunna gayua (300) ubisa sina gueonna, qui uteri leni ca benni bittu te guequinna. Lacana nna riguisalacana nuilaha.

⁶ Ttiaca Jesús ráttebe: —Nan do gueonna. ¿Biaca unná risále? Nu beni nuila-ni len neti, ancana ttu nu tsee.

⁷ Cumu ca benni bittu te guequinna satíaba tseꞌe ca unná len lebiꞌi. Larcala nna guacaba ugüele ca unná nu reasaquinna nucaxaba raca lele. Ttiaca neti nna läga aní dhoa len lebiꞌi ttu dia lii.

⁸ Nuila do-ni nna benba unná len neti bedaa nu udábana benna. Cumu chi beguꞌu gana neti seti rure ixixxi-na qui chi do tseea igatsia gansi chi uttia.

⁹ Neti nna gualíbatia rpea le, gaxaba lheꞌe ca yiesi seꞌe itúba yies lo yu-ni atta quixxiꞌa ca benni ca tisa quia-ni, quixxiꞌaguaba ca benni nu beni nuila-ni qui exxale benni nu benna.

Judas reguila leni gaxasná unna utena Jesús las ná ca nu utticana Benniha

¹⁰ Judas Iscariote, ttu ca benni tsiꞌinu rudheti ca tisa ruleꞌe Jesús, güiattebana atta seꞌe ca nu lo gue ca bixxudiha guanne lenna ca nua gue gaxasná unna utena Jesús las ná ca nua.

¹¹ Atti bina ca bixxudiha nu rá nua nna beꞌo tsitsia lecani. Laniala nna begüeecana tisa utecana belhi leni Judas. Lana nna udulottebana beguila leni gaxasná unna utena Benniha las ná ca nua.

Jesús lenie ca benni rudheti ca tisa ruleꞌe roque rse gue laní Pascua

¹² Primerba sá gue laní Pascua atti ro ca benni Israel ttaxtila nu bittu levadura dia lennaha, lania nua rutticana carneꞌe nu gaꞌana gattiha qui rocana laní Pascua. Ca benni rudheti ca tisa ruleꞌe Jesús unnaba tisattebacabi rácabi Benniha: —¿Gonni raca lelu tsiatu sasía tseetu nu go rseri laní Pascua-ni?

¹³ Laniala nna udhelhe chupa ca benni rudheti ca tisa ruleꞌe re ca biꞌiniha: —Gualtsia lheꞌe yies-na. Na etiꞌale ttu unbiyuu denojana ttu reꞌe detaꞌa inda lheꞌeni. Lebiꞌi nna sanottele na.

¹⁴ Atta etaꞌa nua nna gualgásitte nu beaca gueni yoꞌoha: “Aní rá maestruha: ¿Gonni do yoꞌo atta go rsea gue laní Pascua-ni, lania ca benni rudheti ca tisa ruleꞌa?”

¹⁵ Unnuha nna guleꞌebinna le ttu yoꞌo chupa coa xeni, lheꞌe yoꞌo nu do berupa coa chi do tsee-na lhe chi yapa lheꞌeni lhe. Nía gualusía tsee iyába nu eyasinri gue rseri gori laní Pascua-ni.

¹⁶ Ca benni rudheti ca tisa ruleꞌe nna biríattebacabi diacabi lheꞌe yiesiha. Lacabi nna guattiꞌabacabi iyába attiba rába Jesús. Nianna benttebacabi rse gue laní Pascua nía.

¹⁷ Ucaba ela nna bisíntteba Jesús nía lenie ca biꞌini tsiꞌinu rudheti ca tisa ruleꞌe.

¹⁸ Atti chi siacabi roꞌo mexaha go rse nna unnetteba Jesús re ca biꞌiniha: —Neti nna gualíbatia rpea le, nuxa ttule lebiꞌi ca nu ro rse lania-ni utele neti las ná ca nu utticana neti.

¹⁹ Ca biꞌiniha nna useꞌe siꞌittebacabi. Nianna, udulottebacabi ttuttu ttuttubacabi unnaba tisacabi rácabi Benniha: —¿Si läba netiba nua?

²⁰ Jesús becabittebe re: —Ttu nu sela lheꞌe delo tsiꞌinule niba nua. Unnuha nua rugutuna ttaxtila gueni lheꞌe platu quia.

²¹ Gualíba, neti Benni unbiyuu daa iyyabaaha nna labíaba satea iyába nu chi gaꞌana lo ca sitsi gue Tata Do Iyyabaaha. Ttiaca, ¡carusiꞌiru nu utena neti las ná ca nu utticana neti! Tseerla salíana nua ttirca bittuba ulina.

²² Laca siacabi go nna bedaxxutteba Jesús ttu ttaxtila. Dequide begüee xquixaru Tata Do Iyyabaaha, ulhaꞌattebe Benniha begüee ca biꞌini rudheti ca tisa ruleꞌe. Nianna re ca biꞌiniha: —Gualgo ben-ni. Cumu ben-ni anque cuerpu quia.

²³ Lenla nna bedaxxuttebe ttu copa taꞌa vinu lheꞌeni. Dequide begüee xquixaru Tata Do Iyyabaaha nna betettebe copaha leni ca biꞌini rudheti ca tisa ruleꞌe. Iyába ca biꞌiniha uꞌuyacabi vinuha.

²⁴ Nianna re ca biꞌiniha: —Benni anque reni quia. Len benni eyaꞌan tsitsi ca tisa cubi chi begüee Tata Do Iyyabaaha len ca benni. Benni nua ilali qui lhá ca benni bittu tsia nitticana.

²⁵ Neti nna gualíbatia rpea le, bedá nnanna bitturu iꞌiya inda xixxi gue besuli-na attu libe, axta liba gansi chi bisía sá atti iꞌiya vinu cubi atta rinnabia Tata Do Iyyabaaha.

Rixxiꞌa Jesús Pedro bittu dhi roꞌobi gualí anca bienbi benniha

²⁶ Dequide bilhaque ttu salmo nna diattebaque lo lhilhi Atta Daa Ca Ya Olivuha.

²⁷ Jesús ráttebe ca biꞌiniha: —Iyábale udhá iquile neti nnela, cumu anába chi dia lo ca sitsi gue Tata Do Iyyabaaha atta rinne benniha re: “Neti nna uttia benni ruyú ca carneꞌeha, lania nna iyába ca carneꞌeha gatti laduba udaxxucana.”

²⁸ Ráguaba Jesús: —Ttiaca dequide eyacatia nna lola neti nnerua lole tsiaya daca lo yu te láni Galilea.

²⁹ Laniala nna rá Pedro Benniha: —Masquiba udhequi iyá ca benni seꞌe-ni lu, neti nna läga udhequia lu.

³⁰ Jesús becabie re Pedro: —Neti nna gualíbatia rpea lu, nnela antisla erupa libe ixxá roꞌo berudi-na, lu nna chila beyonna libe bittu ridí roꞌolu gualí anca bienlu neti.

³¹ Ttiaca Pedro nna udú ditibabi rábi: —Masquiba gattia len cuinalu, neti nna dhiba roꞌa gualíba ancabiatia lu. Aníaguaba rá iyábacabi lhe.

Jesús rinnee leni Tata Do Iyyabaaha atta te láni Getsemaní

³² Bisínba Jesús lenie ca benni rudheti ca tisa ruleꞌe ttu re atta te láni Getsemaní. Nianna re ca biꞌiniha: —Ni tte gualcuia, laca neti nna tsiaya sannea len Tata Do Iyyabaaha.

³³ Atti diatteba lenie Pedro lhe Jacobo lhe Juan lhe. Lee nna udulottebe bedú siꞌina lee, bedú guatexxattana lee lhe.

³⁴ Nianna re ca biꞌiniha: —Lastooa-ni nna chi rudú siꞌixxattan nna guannalu chitteba daa elhuttia loa. Ni tte gualtseꞌe. Bittu gaꞌadhile.

³⁵ Nianna biriestteba Jesús ttu roꞌo, atti bedútteba xibie axta liba binna loe lo yu. Lee nna unnetteba lenie Tata Do Iyyabaaha unnabe lo Benniha gansi bittuba dica utsiatte elha disa chi daa uyúe.

³⁶ Lee nna re: —Tata xisto quia, lu nna iyába raca guelu runlu. Betsiattachi neti lo elha disa daa uyúa-ni. Ttiaca läga ria aca nu raca lasia, sinuqui nu innába cuinalu unnuhaba aca.

³⁷ Atti bequittebe deyye atta seꞌe a tsunna ca benni rudheti ca tisa ruleꞌe. Lee nna níaba guattiꞌe ca biꞌiniha tecabi tiꞌedhicabi. Nianna, ráttebe Pedro: —Simóni, ¿si tebalu tiꞌedhilu? ¿Si niba ttu ura bittu událu uchíalu bittu gaꞌadhilu?

³⁸ Gualebani, bittu gaꞌadhile. Gualnne len Tata Do Iyyabaaha qui bittu dha nu xxegüiha dhi yien le. Lebiꞌi nna gua seꞌebale uchíale, ttiaca cuerpu guele-na bittu rdana uchíana.

³⁹ Lee nna dedheyyattebe attu libe güenne len Tata Do Iyyabaaha, nianna redea dacabe Benniha attu libe nu chi re Benniha.

⁴⁰ Atti bequie besine attu libe atta seꞌe ca biꞌiniha, níaba guadittiꞌe ca biꞌiniha dedetiꞌedhicabi cumu de taꞌaxxatta bisiela locabi. Lacabi nna tsaba bittu bería niꞌelhaquinbi bixa innácabi.

⁴¹ Atti beyonna libe bequie besine atta seꞌe ca biꞌini rudheti ca tisa ruleꞌe, nianna ráttebe ca biꞌiniha: —¿Si sna tebale tiꞌedhile, redí lele lhe? Chi banca ttonába cumu chi bisía ura atti utecana neti Benni unbiyuu daa iyyabaaha las ná ca nu runi nu lä anca tsee-na.

⁴² ¡Chinca gualchadha, gualtsá! ¡Ni nu utena neti las ná ca nu utticana netiha chi dana!

Rudaxxucana Jesús

⁴³ Sna duba Jesús rinnee, atti chi bisína Judas ttu nu babaguaba leni ca biꞌini tsiꞌinu (12) rudheti ca tisa ruleꞌe Benniha leni ixeru benni, dencana espada lhe yaga lhe. Ca unnuha nua udhelha ca nu anca nu lo gue ca bixxudiha lencana ca nu ruleꞌe nu rá lo ca ley bocaꞌana Moisés, ca nu teru elha rieni gueni gue ca benni Israel lhe.

⁴⁴ Judas nu utena Benniha las ná ca nua nna chila utixxiꞌenna ca nua gaxasná unna qui eyonbia ca nua Benniha. Lana nna rán ca nua: —Benni utsá loa xxaganiha, unnuha nua. Lebiꞌi nna udaxxuttele na echele na, tsitsi uxxicale na.

⁴⁵ Cuantusiba bisína Judas atta du Jesús, ráttebana Benniha: —¡Maestro! Atti betsátteba loni xxaga Benniha.

⁴⁶ Laniala nna bedaxxutteba ca nua Benniha qui echecane.

⁴⁷ Ttiaca ttu ca biꞌini du len Jesús nía, ulequittebabi espada guebiha uchúbi naga nu riben sina gue bixxudi xeni rinnabiaha.

⁴⁸ Jesús unnaba tisattebe ca benni seꞌe nía re cana: —¿Biaca dale leni espada lhe leni yaga lhe güedaxxu neti attiba ttu ubana?

⁴⁹ Inqui ttu ttu sába udúa len lebiꞌi lheꞌeliꞌa gue yotu-na güeleꞌen le nna lebiꞌi nna bittu bedaxxule neti. Ttiaca iyába unní raca qui saxxína aca nu chi rá lo ca sitsi gue Tata Do Iyyabaaha.

⁵⁰ Lania nna iyába ca biꞌini rudheti ca tisa ruleꞌe Jesús bexunnicabi, a tturba Benniha bodhaꞌancabi nía.

⁵¹ Atturu ttu uncuiti guadenorna Benniha, nucuna sunruba ttu lari. Ca nu seꞌe nía nna bedaxxuttebacana uncuitiha,

⁵² ttiaca unnuha nna bedhá bixxi iquini lariha, aníaba ttunttuna bexunnina.

Rutsá du Jesús lo ca nu runi elha uxtisi gue ca benni Israel

⁵³ Uchettebacana Jesús guadúcane lo bixxudi xeni rinnabiaha. Nianna, bitupatteba iyárecha ca bixxudi anca nu loha nía, lencana iyába ca nu teru elha rieni gueni gue ca benni Israel lhe ca nu ruleꞌe nu rá lo ca ley bocaꞌana Moisés lhe.

⁵⁴ Pedro nna idittu liba denobi Benniha, ni utaꞌababi lhiꞌu gue lheꞌeliꞌa gue yoꞌo lagüi atta do nu anca bixxudi xeni rinnabiaha. Labi nna níaba udobi rutsaꞌabi roꞌo teha lenbi ca nu riseꞌe rapa yoꞌo lagüiha.

⁵⁵ Ca nu lo gue ca bixxudiha lencana iyába ca nu runi elha uxtisi gue ca benni Israel, tsitsiba reguila lecani bipaxa xiyya uncana gue Jesús qui te roꞌocani utticana Benniha. Ttiaca bittu reselquinna bixa lo niꞌa guee.

⁵⁶ Cumu ixeru ca benni run lecani runcana xiyya gue Benniha, ttiaca läga riría li nu rácanaha, cumu de bitti bittiba anca nu rácana.

⁵⁷ Ttu lhecana nna udulíttebacana ben lecani bencana xiyya gue Benniha rácana:

⁵⁸ —¿Riꞌitu nna chi bienintu rinneonni rána?: “Neti nna uttapa yotu ben ca benni seꞌe yies lo yu-ni, nianna lheꞌe tsunna ubisaba nna elhidha attu yotu subi nu bittu ancana nu beni ca benni seꞌe yies lo yu-ni.”

⁵⁹ Ttiaca niguaba leni unnuha bittu guaxxína nu rácana.

⁶⁰ Laniala nna udulí nu anca bixxudi xeni rinnabiaha lagüi gue ca nu seꞌe nía unnaba tisana Jesús rána Benniha: —¿Si bittuba ecabilu bixa innálu? ¿Bila rátticabalu gue nu run ca benni seꞌe-ni xiyya guelu dequi runlu?

⁶¹ Ttiaca Jesús siba uque, tsa läga becabie bixa innee. Laniala nna bedennaba tisa bixxudi xeni rinnabiha Benniha attu libe ráne: —¿Si lu nua Cristu, Xiꞌini Tata Do Iyyabaaha benni anca leꞌa?

⁶² Jesús becabie re na: —Agu, netiba nua. Lebiꞌi nna güilabinle neti Benni unbiyuu daa iyyabaaha dhoa daca ladu derechu gue Tata Do Iyyabaaha Benni ra xxeni lee, iláguabinle neti dedaaya lheꞌe ca bea daa iyyabaaha lhe.

⁶³ Lania nna, uchedatteba xo bixxudi xeni rinnabiaha de bisaꞌaxxattabinna. Atti ráttebana: —¿Tsa lärga nurua reasinri quixxiꞌenna ri gue bixa runi unní?

⁶⁴ Cuinaba lebiꞌi chi bieninle rinne güena gue Tata Do Iyyabaaha leni ca tisa rinnena. Lebiꞌi nna, ¿bila rále? Iyába ca nu seꞌe nía nna bedelha iyyacana Jesús, denua nna ralhaba Benniha gattie.

⁶⁵ Ttulhe ca nu seꞌe nía nna udulottebacana bettu ttu xxencani lo Benniha, lacana nna bedheattebacana loe, atti begüeettebacane, nianna rácane: —Unne yaꞌa sanga, ¿núnna begüeen lu? Ca nu riseꞌe rapa yoꞌo lagüiha nna ralhicana gui loe.

Pedro bittu ridí roꞌobi, anca bienbi Jesús

⁶⁶ Pedro nna níaba dubi liree lheꞌeliꞌa gue yoꞌoha, attirba chi bisína ttu ca nuila riben sina lheꞌe yoꞌo gue nu anca bixxudi xeni rinnabiha.

⁶⁷ Atti bilen nua Pedro dubi rutsaꞌabi roꞌo teha nna bedútteba nuilaha ttulíba begüiana lobi. Nianna rátteba nua bi: —Anáguaba luu denoguabalu Jesús gue Nazaret.

⁶⁸ Ttiaca Pedro, läga uxí roꞌobi, tseꞌe lolabi rábi: —¡Läga anca biatia unná! ¡Bittuguaba yua gue bixunna rálha lhe! Laniala nna biríabi guadhúbi atta do ritaꞌacana roꞌo yoꞌo lagüiha, attirba chi uxxá roꞌo ttu berudi.

⁶⁹ Nuilaha nna bedeláttebinna Pedro attu libe, nianna udulotteba nua rána adí ca nu seꞌe nía: —Unbiyuu du-ni lhe unnáguaba selunna.

⁷⁰ Ttiaca bedequi dacaba Pedro redenábi bittu anca bienbi Jesús. Sattigarba uca nna redeatteba ca nu seꞌe nía Pedro attu libe: —Gualíba, ca unnába selalu. Cumu Galilea guaba beaca laslu, nuarca attiba rinne ca unná rinnelu.

⁷¹ Ttiaca Pedro nna udulottebabi rábi: —¡Tata Do Iyyabaaha rudettia, läganu unbiyuu rudettile na ancabiatia! Cuina Ben-na unie bixa satea gansi run lasia.

⁷² Unnuhaba rábi dubi, attirba chi berupa libe uresi berudiha. Nianna bexxatteba le Pedro gue ca tisa unne Jesús atti re: “Lu nna chi erupala libe cuesi berudi-na, lu nna chila beyonna libe bittu ridí roꞌolu anca bienlu neti.” Atti bexxale Pedro nu rá Benniha nna uresttebabi.